A di fu tu buku fu Samuel 1:1-27
1 Saul no ben dede so langa ete èn David ben wini den Amalèksma. Ne David drai go baka na Siklak èn a tan drape tu dei.
2 Na a di fu dri dei wan man kon drape di ben komoto fu a legrekampu fu Saul. A man krosi ben priti èn santi ben de na tapu en ede. Di a kon na David, dan wantewante a boigi nanga en fesi go na gron.
3 Ne David aksi en: „Pe yu komoto?” A man taigi en: „Mi lowe komoto fu a legrekampu fu Israel.”
4 David aksi en: „San pasa drape? Mi e begi yu, fruteri mi.” Ne a man piki: „Den srudati lon gowe libi a feti èn furu fu den dede. Srefi Saul nanga en manpikin Yonatan dede.”
5 David aksi a yonkuman di ben e fruteri en a tori: „Fa yu du sabi taki Saul nanga en manpikin Yonatan dede trutru?”
6 Ne a yonkuman taki: „Na de mi ben de na Gilbowa-bergi, di mi si Saul e anga na tapu a lansri fu en fu no fadon. Mi si tu taki man di ben e rèi asiwagi nanga man di ben e rèi asi ben de leti na baka Saul.
7 Di Saul drai luku, a si mi, dan a kari mi kon. Ne mi taki: ’Iya, mi masra!’
8 A aksi mi: ’Suma na yu?’ Mi taigi en: ’Mi na wan Amalèksma.’
9 Dan a taigi mi: ’Kon dyaso, dan yu kiri mi, bika wan hebi krampu teki mi, ma mi de na libi ete.’
10 Ne mi go moro krosibei, dan mi kiri en, bika mi ben sabi taki a no ben o libi langa moro, fu di a ben kisi hebi mankeri. Baka dati mi teki a kownu-ati di ben de na tapu en ede èn a bui di a ben weri na en anu. Dan mi tyari den kon dyaso gi yu, mi masra.”
11 Ne David grabu en krosi hori, dan a priti den èn ala den man di ben de nanga en, du a srefi sani tu.
12 Den bari krei teleki neti fadon èn te na a ten dati den no nyan* noti. Den ben e du den sani disi, fu di den ben e sari taki Saul, en manpikin Yonatan, nanga den srudati fu Yehovah dede, fu di sma kiri den nanga feti-owru. Den sari taki so furu Israelsma lasi libi.
13 Baka dati David aksi a yonkuman di fruteri en a tori: „Fu pe yu komoto?” A man piki en: „Mi na a manpikin fu wan Amalèksma, wan trakondre sma di kon libi dyaso.”
14 Dan David aksi en: „Fa a du kon taki yu no ben frede fu langa yu anu kiri a salfuwan fu Yehovah?”
15 Ne David kari wan fu den tra yonkuman. A taki: „Kon. Kiri a man.” Ne a yonkuman dyuku a man kiri.
16 David taki: „Na yusrefi poti brudu-paiman na yu tapu, bika nanga yu eigi mofo yu taki: ’Na mi kiri a salfuwan fu Yehovah.’”
17 Baka dati David singi wan sari singi. A ben e singi fu Saul nanga en manpikin Yonatan.
18 A taigi den sma fu a lo fu Yuda taki den ben musu leri a singi disi di nen „A bo”. A singi skrifi na ini a buku fu Yasyar. Disi na a singi:
19 „Ke Israel, sma kiri a moi sani na den pikin bergi fu yu.Luku fa den tranga man kon lasi libi!
20 Un pipel, no taigi den sma fu Gat,No fruteri den sma di de na strati na ini Askelon,Noso den umapikin fu den Filisteasma o prisiri,Noso den umapikin fu den man di no besnèi o breiti pasa marki.
21 Un bergi na Gilbowa, no meki nowan dow èn nowan alen kon na un tapu. Nowan gron no musu gi nyanyan di sma kan tyari leki ofrandi na Gado,Bika den skelt fu den tranga man kon tron wan fisti sani.Srefi a skelt fu Saul kon tron wan fisti sani èn nowan skelt de moro di salfu nanga oli.
22 A bo fu Yonatan no ben drai kon baka,Sondro fu meki a brudu fu den feanti lon èn sondro fu meki a fatu fu den tranga man priti opo.A feti-owru fu Saul no ben drai kon baka, sondro bun bakapisi.
23 Saul nanga Yonatan, den lobiwan di sma ben lobi di den ben de na libi,Srefi dede no ben man prati den.Den ben gaw moro aka.Den ben tranga moro lew.
24 Umapikin fu Israel, un krei gi Saul.Na en ben meki unu weri redi krosi di abi moimoi sani na tapuÈn a ben meki sma nai ala sortu gowtu sani na tapu den krosi fu unu.
25 Luku fa den tranga man kon lasi libi na ini a feti!Sma kiri Yonatan na den pikin bergi fu yu!
26 Mi de nanga bigi sari fu yu ede, mi brada Yonatan.Mi ben lobi yu trutru.A lobi fu yu, ben warti gi mi moro leki a lobi fu umasma.
27 Luku fa den tranga man kon lasi libiÈn fa den fetisani fu den lasi gowe!”
Futuwortu
^ Noso: „faste.” Luku „Moro sani”, nr. 24.
