Esekièl 12:1-28
12 Yehovah taigi mi:
2 „Manpikin fu libisma, yu e tan nanga wan pipel di e opo densrefi teige mi. Den abi ai fu si, ma den no e si. Den abi yesi fu yere, ma den no e yere, bika den na wan pipel di e opo densrefi teige mi.
3 Manpikin fu libisma, sreka yu bagasi fu go na ini katibo. Na deiten yu musu sori den fa yu e go na ini katibo. Meki den si fa yu e komoto na yu presi èn e go na ini katibo na wan tra presi. Kande den o sabi san disi wani taki, aladi den na wan pipel di e opo densrefi teige mi.
4 Na deiten yu musu tyari yu bagasi go na dorosei meki den si. Tyari en neleki yu e go na ini katibo. Meki den si fa yu e go na dorosei na neti leki den sma di trawan e tyari gowe leki katiboman.
5 Meki den si fa yu e meki wan olo na ini a skotu, dan yu musu tyari a bagasi pasa na ini na olo.
6 Meki den si fa yu e tyari a bagasi na tapu yu skowru. Na neti yu musu tyari en go na doro. Dan yu musu tapu yu fesi, so taki yu no e si a gron. Den sani di mi meki yu du o de leki wan marki gi den Israelsma.”
7 Dan mi du ala san Gado taigi mi fu du. Na deiten mi tyari mi bagasi di ben de leki a bagasi fu wan katiboman, go na dorosei. Na neti mi meki wan olo na ini a skotu nanga mi anu. Na neti mi tyari mi bagasi go na dorosei. Mi meki den si fa mi tyari en na tapu mi skowru.
8 Na mamanten Yehovah taigi mi:
9 „Manpikin fu libisma, a pipel fu Israel di e opo densrefi teige mi ben aksi yu san yu e du, a no so?
10 Yu musu taigi den: ’Disi na san a Moro Hei Masra Yehovah taki: „A boskopu disi de gi na edeman èn a de wan warskow gi Yerusalem èn gi ala den Israelsma drape.”’
11 Yu musu taigi den taki yu de leki wan marki gi den, èn taki yu du den sani disi fu sori den san o pasa nanga den. Sma o tyari den go na ini katibo.
12 Na neti na edeman fu den o tyari en bagasi na tapu en skowru èn a o go na dorosei. A o meki wan olo na ini a skotu fu tyari a bagasi fu en go na dorosei. A o tapu en fesi, so taki a no o man si a gron.
13 Mi o trowe mi nèt na en tapu èn mi o fanga en nanga mi nèt. Mi o tyari en go na Babilon, na a kondre fu den Kaldeyasma, ma a no o man si a kondre. Na drape a o dede.
14 Ala den sma na en lontu di e yepi en èn ala den legre fu en, mi o panya go na ala sei pe winti e wai. Mi o seni sma go na den baka nanga feti-owru.
15 Te mi panya den go na den pipel èn te mi yagi den go na tra kondre, dan den sa musu fu sabi taki mi na Yehovah.
16 Mi o meki wan tu fu den tan na libi. Feti-owru, angri, nanga takru siki no o kiri den. Mi o du dati, so taki den kan fruteri den sma na ini den kondre pe den o go, sortu ogri sani den ben du. Den sa musu fu sabi taki mi na Yehovah.”
17 Yehovah taigi mi:
18 „Manpikin fu libisma, beifibeifi yu o nyan brede. Nanga broko-ede èn frede yu o dringi watra.
19 Taigi den sma fu a kondre: ’Disi na san a Moro Hei Masra Yehovah taki fu den sma fu Yerusalem di de na ini a kondre Israel: „Fredefrede den o nyan brede èn beifibeifi den o dringi watra. A kondre fu den o tron wan brokopresi èn sma o tyari ala sani fu a kondre gowe, fu di den sma di e tan drape e du wan lo ogri.
20 Den foto pe sma e tan o tron brokopresi èn nowan sma o tan na ini a kondre moro. Unu sa musu fu sabi taki mi na Yehovah.”’”
21 Yehovah taigi mi tu:
22 „Manpikin fu libisma, den Israelsma e koti na odo disi: ’Someni ten pasa, ma toku nowan fu den fisyun kon tru.’
23 Dati meki yu musu taigi den: ’A Moro Hei Masra Yehovah taki: „Mi o meki taki den no taki disi moro. Nowan sma na ini Israel o taki den wortu disi leki odo moro.”’ Taigi den: ’A ten doro èn ibriwan fu den fisyun o kon tru.’
24 Nowan sma o fruteri fisyun di no o kon tru èn nowan sma o du lukuman-wroko fu kori trawan na ini Israel.
25 ’„Mi, Yehovah, o taki san mi o du èn mi o du en trutru. Un sma di e opo unsrefi teige mi, mi no o wakti moro langa, ma na ini a ten fu unu mi o taki san mi o du èn mi o du en trutru”, na so a Moro Hei Masra Yehovah taki.’”
26 Yehovah taigi mi:
27 „Manpikin fu libisma, arki san den Israelsma e taki. Den e taki: ’A o teki bun langa fosi den sani di a e si na ini a fisyun pasa. A e taki fu sani di o pasa na ini wan ten di de bun fara ete.’
28 Dati meki yu musu taigi den: ’Disi na san a Moro Hei Masra Yehovah taki: „’Mi no o wakti moro langa fu du san mi taki. Ala den sani di mi taki, o kon tru’, na so a Moro Hei Masra Yehovah taki.”’”
