Esekièl 15:1-8
15 Yehovah taigi mi:
2 „Manpikin fu libisma, fa a droifibon noso wan yongu taki fu en e difrenti fu iniwan tra bon na ini a busi?
3 Sma man meki wan postu fu na udu fu en fu wroko nanga dati? Sma man meki wan aka fu na udu fu en fu anga wan sani na dati?
4 Nôno! Den e gebroiki en leki drei udu gi a faya. Faya e bron a biginpisi nanga a kabapisi fu en èn te na inisei srefi. A bun fu du wan wroko nanga en?
5 Efu sma no man gebroiki en fu du wan wroko te a bun ete, dan den no man gebroiki en kwetikweti tu te faya bron en krinkrin!”
6 „Fu dati ede a Moro Hei Masra Yehovah taki: ’Neleki fa mi trowe a drei udu fu a droifibon di ben de na mindri den tra bon na busi, na ini a faya, na so mi o du nanga den sma di e tan na ini Yerusalem.
7 Mi drai baka gi den. Den komoto na ini a faya, ma toku a faya o kiri den. Te mi strafu den, dan unu o sabi taki mi na Yehovah.’”
8 „’Mi o meki a kondre tron wan presi pe nowan sma e tan, fu di den trangayesi mi’, na so a Moro Hei Masra Yehovah taki.”
