Esekièl 31:1-18
31 Na a fosi dei fu a di fu dri mun na ini a di fu erfu yari, Yehovah taigi mi:
2 „Manpikin fu libisma, taigi Farao, a kownu fu Egepte nanga en pipel:
’Leki suma yu bigi?
3 Yu de leki wan Asiriasma, iya, leki wan sedrebon fu Libanon di abi moi taki nanga furu wiwiri èn di e gi furu skaduw. A sedrebon hei. Na ede fu en e doro te na den wolku.
4 Na watra meki a gro kon bigi. Furu watra meki a gro so hei. Liba ben de na ala sei pe a ben de. Den kriki fu den liba ben gi watra na ala den tra bon na ini den gron.
5 Dati meki a gro moro hei leki ala den tra bon na ini a gron.
A ben e kisi moro nanga moro bigi taki. Den taki ben kon moro langa, fu di a ben e kisi furu watra fu den liba.
6 Ala den fowru di e frei na loktu ben meki den nesi na den bigi taki fu a bon. Na ondro den taki ala den busimeti ben meki den pikin. Ala den bigi pipel ben go tan na a skaduw fu en.
7 A ben kon bigi èn moi èn a ben abi langa taki nanga furu wiwiri. Den rutu fu en ben doro na furu presi pe watra de.
8 Nowan tra sedrebon na ini a dyari fu Gado ben gersi en. Den taki fu den yaneifer-bon no ben gersi den taki fu en srefisrefi. Den taki fu den platanbon no ben de leki den bigi taki fu en. Nowan tra bon na ini a dyari fu Gado ben moi leki en.
9 Mi meki taki a ben abi furu wiwiri èn dati meki a ben moi. Ala den tra bon na ini Eden, a dyari fu a tru Gado, ben dyarusu na en tapu.’
10 Dati meki a Moro Hei Masra Yehovah taki: ’A ben hei èn na ede fu en ben doro te na den wolku. A kisi heimemre fu di a ben hei.
11 Fu dati ede mi o meki na ogri-ati tiriman fu den kondre teki en abra. A tiriman o kon du ogri nanga en trutru. Na fu di a du ogri, meki mi o yagi en.
12 Wan pipel di unu no sabi, iya, den ogri-ati sma fu tra kondre, o koti en trowe. Dan sma o libi en na tapu den bergi. Ala den wiwiri fu en o fadon na den lagipresi èn sma o broko den taki fu en meki den fadon na den liba fu grontapu. Ala sma o saka komoto na a skaduw fu en èn den o gowe libi en.
13 Ala den fowru di e frei na loktu o tan na tapu a bon disi di fadon. Ala den ogri busimeti o de na tapu den taki fu en.
14 Dan nowan fu den bon di ben e kisi watra o gro kon hei èn den ede fu den bon no o doro den wolku. Nowan fu den bon disi o hei leki den wolku, bika den alamala o dede èn den o saka go na ondro gron. Makandra nanga den manpikin fu libisma den o saka go na ini grebi-olo.’
15 Disi na san a Moro Hei Masra Yehovah taki: ’Te a o saka go na ini Grebi,* mi o meki sma row. Na fu en ede mi o tapu den watra-olo, so taki watra no e lon moro èn den liba no e kisi watra moro. Na fu en ede mi o meki soso sari de na Libanon. Na fu en ede mi o meki den bon na den gron kon drei.
16 A o fadon nanga wan bigi babari. Dan mi o meki den pipel seki. Mi o tyari en go na ini Grebi makandra nanga den sma di o go na ini grebi-olo. Na ondro gron ala den bon fu Eden, den moro bun bon fu Libanon èn ala den bon di ben e kisi watra, o kisi trowstu.
17 Makandra nanga a bon, densrefi go na ini Grebi pe den sma de di trawan kiri nanga feti-owru. Sosrefi den siri fu en di ben tan na a skaduw fu en na mindri den pipel, de na ini Grebi.’
18 ’Na ini Eden nowan bon ben abi a glori fu yu èn den no ben bigi leki yu. Ma now sma o koti yu trowe makandra nanga den bon fu Eden èn yu o go na ondro gron. Yu o go didon nanga den sma di no besnèi èn nanga den wan di sma kiri nanga feti-owru. Disi na san o pasa nanga Farao, a kownu fu Egepte, èn a pipel fu en’, na so a Moro Hei Masra Yehovah taki.”
Futuwortu
^ Hebrew wortu: syeol. Luku „Moro sani”, nr. 10.