Esekièl 5:1-17
5 Manpikin fu libisma, teki wan srapu feti-owru. Gebroiki en leki wan skermes fu koti yu ede-wiwiri nanga yu barba. Dan yu musu teki wan wegi èn prati a wiwiri na ini dri pisi.
2 Yu musu bron wan pisi nanga faya na ini a foto, te yu kaba feti nanga a foto. Dan yu musu teki wan tra pisi fu a wiwiri. Yu musu naki en nanga a feti-owru na ala sei fu a foto. Yu musu meki winti panya a tra pisi go na ala sei, dan mi o seni wan feti-owru go na den baka.
3 Yu musu teki pikinso wiwiri fu a pisi disi èn domru en na ini yu krosi.
4 Teki a wiwiri di tan abra èn trowe dati na ini faya meki a bron dorodoro. A faya disi o bron ala den Israelsma.
5 Disi na san a Moro Hei Masra Yehovah taki: ’Disi na Yerusalem. Mi poti en na mindri tra pipel èn tra kondre de na en lontu.
6 A no hori den wèt fu mi èn a ogri moro den tra pipel. A trangayesi den komando fu mi, moro den kondre di de lontu en. Iya, a no hori den wèt nanga den komando fu mi.’
7 A Moro Hei Masra Yehovah taki: ’Unu opo unsrefi teige mi moro leki den tra pipel na un lontu. Unu no hori den wèt nanga den komando fu mi, ma unu hori den komando fu den pipel di de na un lontu, a no so?
8 Fu dati ede a Moro Hei Masra Yehovah taki: „Ai foto, mi o strafu yu èn mi o krutu yu na fesi den tra pipel.
9 Fu di yu du so furu tegu sani, meki mi o du wan sani nanga yu di mi no du noiti ete èn di mi no o du noiti moro.
10 Fu dati ede papa o nyan den pikin èn den pikin o nyan den papa. Mi o strafu yu, èn ala den sma fu yu di tan abra mi o panya go na ala sei pe winti e wai.”’
11 A Moro Hei Masra Yehovah taki: ’Neleki fa a de seiker taki mi de na libi, na so a de seiker taki mi o meki yu pipel kon moro pikin. Mi no o firi gi yu èn mi no o sori sari-ati gi yu, fu di yu doti mi santa presi nanga den fisti gado fu yu èn nanga na afkodrei di yu e du.
12 Wan grupu sma na ini a foto o dede, fu di siki nanga angri o kiri den. Wan tra grupu o dede, fu di feti-owru o kiri den na ala sei fu a foto. Den wan di tan abra mi o panya go na ala sei pe winti e wai, dan mi o seni wan feti-owru go na den baka.
13 Baka te mi puru atibron na den tapu, mi ati o kon kowru èn mi o firi bun baka. Te mi puru atibron na den tapu, dan den sa musu fu sabi taki mi, Yehovah, taki nanga den fu di mi wani taki den musu anbegi mi wawan.
14 Mi o meki yu tron wan brokopresi. Ala den pipel na yu lontu èn ala den sma di e waka pasa, o spotu yu.
15 Yu o kisi syen èn sma o kosi yu. Den sani di o pasa nanga yu o de leki wan eksempre èn wan warskow gi den pipel na yu lontu. Den o frede te mi o puru atibron na yu tapu, te mi o krutu yu èn te mi o strafu yu. Misrefi, Yehovah, taki dati disi o pasa.
16 Mi o meki angriten kiri unu, neleki te peiri e kiri sma. Mi o meki na angriten kon moro hebi gi unu èn mi o broko den tiki di unu e gebroiki fu anga lingakuku.
17 Mi o meki angriten nanga ogri meti kiri den pikin fu unu. Takru siki nanga feti-owru o kiri unu èn furu brudu o lon. Misrefi, Yehovah, taki dati disi o pasa.’”
