Esekièl 6:1-14
6 Yehovah taigi mi:
2 „Manpikin fu libisma, luku go na den bergi fu Israel èn taigi den san o pasa nanga den.
3 Yu musu taki: ’Bergi fu Israel, arki san a Moro Hei Masra Yehovah taki. A Moro Hei Masra Yehovah taigi den hei bergi, den pikin bergi, den liba, nanga den lagipresi: „Luku! Mi o meki sma kon feti nanga unu èn mi o pori den hei presi pe unu e anbegi tra gado.
4 Mi o broko den altari fu unu pe unu e tyari ofrandi nanga den tra altari pe unu e bron switismeri sani. Mi o trowe den skin fu den wan di dede, na fesi den fisti gado fu den.
5 Mi o poti den dedeskin fu den Israelsma leti na fesi den fisti gado fu den èn mi o panya den bonyo fu unu lontu den altari fu unu.
6 Mi o pori ala den presi nanga den foto pe unu e tan èn nowan sma o de moro na den hei presi pe unu e anbegi tra gado. Den o tron brokopresi. Nowan sma o tyari ofrandi moro na den altari fu unu, bika mi o broko den. Nowan fisti gado fu unu o de moro èn mi o broko den altari fu unu pe unu e bron switismeri sani. Iya, mi o pori ala den sani di unu meki.
7 Mi o kiri furu sma fu unu. Unu sa musu fu sabi taki mi na Yehovah.
8 Mi o meki wan tu fu unu tan na libi èn mi o panya unu go na den tra kondre.
9 Te den wan di tan na libi, de na ini katibo na mindri den tra pipel, den o memre mi. Den o memre taki mi ben firi sari di den drai baka gi mi fu go huru nanga den fisti gado fu den. Na den fesi a o de fu si taki den e syen srefisrefi fu den tegu sani di den du.
10 Dan den sa musu fu sabi taki mi na Yehovah. A no fu soso mi ben taigi den taki mi ben o tyari a rampu disi kon na den tapu.”’
11 A Moro Hei Masra Yehovah taki: ’Naki anu, stampu nanga yu futu èn soktu fu di den Israelsma e du wan lo tegu sani. Feti-owru, angri, nanga takru siki o kiri den.
12 Den sma di de farawe o dede fu di takru siki o kiri den. Den sma di de krosibei o dede fu di feti-owru o kiri den. Den sma di tan abra na ini a foto èn di kisi kibri o dede fu di angri o kiri den. Baka te mi puru atibron na den tapu, mi ati o kon kowru.
13 Den dedewan fu den o didon lontu den fisti gado fu den èn lontu den altari fu den. Den o didon na tapu ibri pikin bergi, na tapu ala den ede fu den tra bergi, na ondro ibri bon di abi furu wiwiri èn na ondro ibri bigi bon di lai bigi taki pe den ben tyari ofrandi di ben de leki wan switi smeri gi ala den fisti gado fu den. Dan den sa musu fu sabi taki mi na Yehovah.
14 Mi o langa mi anu fu naki den èn mi o meki a heri kondre, iya, ala presi pe den e tan, tron wan brokopresi. A o takru moro a sabana na ini a birti fu Dibla. Dan den sa musu fu sabi taki mi na Yehovah.’”
