Esekièl 9:1-11
9 Dan mi yere a taki nanga wan tranga sten. A taigi mi: „Meki den wan di o strafu a foto, kon krosibei. Meki ibriwan fu den teki a fetisani fu en fu pori a foto!”
2 Ne mi si siksi man e kon fu a tapusei-portu di de na noordsei. Den alamala ben abi wan fetisani na ini den anu fu naki sma kiri. Makandra nanga den, wán man ben de di ben weri linnen krosi èn wan enkikokro fu wan sekretarsi ben de na en dyonku. Dan den alamala kon na inisei èn den go tanapu na sei a kopro altari.
3 A glori fu a Gado fu Israel di ben de na tapu den kerub-engel, komoto na den tapu èn a go na a doromofo fu a tempel. Ne Gado bigin taki nanga a man di ben weri linnen krosi èn di ben abi wan enkikokro fu wan sekretarsi na en dyonku.
4 Yehovah taigi en: „Pasa na ini a heri foto Yerusalem èn poti wan marki na a fesi-ede fu ala den sma di e soktu èn e geme fu ala den tegu sani di sma e du na ini a foto.”
5 Mi yere di a taigi den trawan: „Go na en baka na ini a foto èn naki den sma kiri. No firi gi den èn no abi sari-ati nanga den.
6 Un musu kiri den owru man, den yonkuman, den uma di no sribi nanga wan man ete, den pikin-nengre, nanga den tra umasma. Iya, un musu kiri den alamala. Ma un no musu go krosibei fu nowan sma di abi a marki. Un musu bigin na mi santa presi.” Dati meki den bigin kiri den owru man di ben de na fesi a santa presi.
7 A taigi den tu: „Doti a santa presi èn furu den dyari nanga den dedewan. Un go now!” Dan den go èn den naki den sma kiri na ini a foto.
8 Den ben e kiri ala den sma, ma den meki mi tan na libi. Dan mi boigi nanga mi fesi go na gron èn mi bari: „Ke mi Moro Hei Masra Yehovah! Fu san ede yu e puru atibron na tapu Yerusalem èn e kiri ala den Israelsma di tan abra?”
9 Dan a taigi mi: „Den Israelsma nanga den sma fu Yuda du kefalek bigi ogri. Sma e kiri trawan na ini a heri kondre èn den e du wan lo kruktudu na ini a foto. Den e taki: ’Yehovah gowe libi a kondre èn Yehovah no e si san e pasa.
10 Mi no o firi gi den tu èn mi no o abi sari-ati nanga den. Mi o strafu den gi den ogri di den du.”
11 Luku! A man di ben weri linnen krosi èn di ben abi na enkikokro na en dyonku, kon baka nanga a boskopu disi: „Mi du ala san yu taigi mi fu du.”
