Yoèl 1:1-20
1 Disi na san Yehovah taigi Yoèl, a manpikin fu Petuwel:
2 „Meki den owru man arki èn meki ala den sma fu a kondre poti prakseri. Unu yere wan ten taki so wan sani pasa na ini a ten fu unu, noso na ini a ten fu den afo fu unu?
3 Fruteri un eigi manpikin a sani disi èn meki un manpikin fruteri den manpikin fu den. Meki den manpikin dati fruteri den eigi manpikin a sani disi tu.
4 Woron o nyan den sani di unu o prani. San den woron no nyan, den sprenka o nyan. San den sprenka no nyan, den sprenka di no abi frei ete o nyan. San den sprenka dati no nyan, den kakalaka o nyan.
5 Wiki, un drunguman, dan un krei. Un alamala di e dringi win musu bari krei, bika un mofo no o tesi switi win moro.
6 Wan pipel kon na ini mi kondre. Den tranga èn den furu srefisrefi. Den tifi nanga den kakumbe fu den de leki den di fu wan lew.
7 Den pori mi droifibon krinkrin èn den libi soso a tompu fu mi figabon. Den hari ala buba fu den bon puru èn den trowe en gowe. Ala den pikin taki fu den bon kon weti.
8 Un musu krei leki wan nyunwenke di weri rowkrosi, fu di a man di ben o trow nanga en, dede.
9 Sma no e tyari nyanyan-ofrandi nanga dringi-ofrandi go na a oso fu Yehovah moro. Den priester nanga den dinari fu Yehovah e sari.
10 A gron pori èn a doti e sari. A nyanyan na den gron kon pori, nyun win no de moro, èn oli kon kaba.
11 Den gronman firi syen. Den man di e wroko na den droifidyari bari krei. Sma no koti nyanyan na den gron, fu di nyanyan no de na den gron moro.
12 Den droifibon srefi kon drei èn den figabon dede gowe. Den granaki-aprabon, den palmbon, den aprabon, iya, ala den bon di unu prani dede gowe. Nowan sma o prisiri moro.
13 Un priester, tai rowkrosi na un mindri èn naki tapu un borsu. Meki den man di e wroko na a altari bari krei. Meki den dinari fu mi Gado kon na ini èn meki den didon heri neti na tapu rowkrosi, bika sma no e tyari nyanyan-ofrandi nanga dringi-ofrandi go na a oso fu Gado moro.
14 Un musu poti wan ten fu faste.* Kari ala sma kon na wán fu hori wan spesrutu konmakandra. Kari den owru man èn ala sma fu a kondre fu kon na a oso fu Yehovah un Gado, dan un bari suku yepi na Yehovah.
15 Ai, a dei e kon! A dei fu Yehovah de krosibei. A o de leki te na Almaktiwan e tyari pori kon.
16 Unu no si taki wi no abi nyanyan moro? Unu no si taki sma no breiti èn taki den no e prisiri moro na ini na oso fu wi Gado?
17 Srefi den drei figa unu no man gebroiki moro. Den maksin kon leigi. Sma broko den maksin, fu di a nyanyan na den gron kon drei.
18 Srefi den osometi e soktu! Den ipi kaw e wakawaka lontu, fu di den bruya! Nowan weigron de pe den kan nyan. Na den ipi skapu e pina fu a sondu di unu du.
19 Na yu, Yehovah, mi o kari, bika faya bron den weigron fu a sabana. Wan faya bron ala den bon na den gron.
20 Srefi den busimeti e suku yepi na yu, fu di den liba lon drei èn faya bron den weigron di de na ini a sabana.”
Futuwortu
^ Luku „Moro sani”, nr. 24.
