Amos 4:1-13
4 „Arki, un kaw fu Basan di de na tapu Samaria-bergi. Unu e bedrigi den mofina sma, èn unu e kwinsi den pôti sma. Unu e taigi un masra: ’Tyari sani gi wi meki wi dringi!’
2 A Moro Hei Masra Yehovah sweri na a santafasi fu en. A taki: ’„Luku, wan ten o kon pe sma o opo unu nanga den aka di sraktiman e gebroiki fu anga meti. Nanga fisi-aka den o opo den sma fu un pipel di tan abra.
3 Den o meki ibriwan fu unu pasa langalanga na ini den olo fu den skotu. Den o trowe unu na Harmon”, na so Yehovah taki.’
4 ’Un kon na Betel èn du sondu. Un musu du furu sondu na Gilgal. Tyari un srakti-ofrandi na mamanten. Na a di fu dri dei un musu tyari a di fu tin pisi fu den sani di unu abi.
5 Bron sani di abi srudeki na ini leki ofrandi fu taki Gado tangi. Un Israelsma, te unu wani gi mi wan sani leki ofrandi, dan meki ala sma sabi, bika na dati unu lobi’, na so a Moro Hei Masra Yehovah taki.
6 ’Na ini ala den foto fu unu, un tifi ben krin, fu di mi no ben gi unu nowan brede na den presi pe unu ben tan. Toku unu no drai kon baka na mi’, na so Yehovah taki.
7 ’Mi no meki alen fadon aladi dri mun ben libi ete fosi a kotiten doro. Na a wan foto mi meki alen fadon, ma na wan tra foto mi no meki alen fadon. Na a wan gron mi meki alen fadon, ma na a tra gron pe mi no meki alen fadon, ala sani kon drei.
8 Den sma fu tu noso dri foto ben tingatinga go na wan tra foto fu dringi watra, ma toku watra ben kiri den ete. Toku unu no drai kon baka na mi’, na so Yehovah taki.
9 ’Mi ben meki faya winti wai, so taki den bon fu unu kon drei èn mi ben meki den bon kon siki. Unu ben kon abi moro dyari fu prani droifi nanga tra sani, ma woron nyan den figabon nanga den olèifbon fu unu. Toku unu no drai kon baka na mi’, na so Yehovah taki.
10 ’Mi ben meki unu kisi takru siki leki den sma fu Egepte. Nanga feti-owru mi meki sma kiri den yonkuman na un mindri èn sma tyari den asi fu unu gowe. Doronomo mi meki wan tingi smeri opo komoto fu den kampu fu unu. Unu srefi ben smeri dati. Toku unu no drai kon baka na mi’, na so Yehovah taki.
11 ’Mi drai a heri kondre fu unu tapu, neleki fa mi drai Sodom nanga Gomora tapu. Unu ben kon de leki wan pisi udu di sma hari puru na ini faya. Toku unu no drai kon baka na mi’, na so Yehovah taki.
12 Fu dati ede mi o du dati nanga unu, Israel. Fu di mi o du a sani dati nanga unu, meki un musu sreka unsrefi fu miti un Gado.
13 Bika mi nen na Yehovah, a Gado di e tiri den legre. Mi na a Mekiman fu den bergi, a Mekiman fu winti, a sma di e taigi libisma san a e prakseri, a sma di e meki mamanten kon dungru, èn a sma di e waka na tapu den hei presi fu grontapu.”
