Amos 5:1-27
5 „Un Israelsma, arki a sari singi disi, bika a abi fu du nanga unu:
2 A nyunwenke Israel fadon.A no man opo moro.
Den gowe libi en na en eigi gron.Nowan sma e opo en.
3 A Moro Hei Masra Yehovah taki: ’Soso wán hondro man o tan abra na a foto di go na feti nanga wán dusun man. Soso tin man o tan abra na a foto di go na feti nanga wán hondro man. Na dati o pasa nanga den Israelsma.’
4 Disi na san Yehovah taigi den Israelsma: ’Un suku mi, dan unu o tan na libi.
5 Un no musu suku yepi na Betel, èn un no musu kon na Gilgal. Un no musu abra go na Berseiba tu. Den o tyari den sma fu Gilgal go na ini katibo. Betel o tron wan presi pe sma e du afkodrei.
6 Un sma fu Yosef, suku Yehovah, dan unu o tan na libi, noso a o kon na un tapu leki wan faya èn a o bron unu. Nowan sma o man kiri a faya na Betel.
7 Unu meki retidu kon de leki wan bitabon, èn unu trowe retifasi go na gron.
8 Yehovah na a nen fu a sma di meki a starigrupu Kima nanga a starigrupu Keisil. En na a sma di e meki bigi dungru tron leki mamanten, a sma di e meki deiten kon dungru leki neti, a sma di e kari a watra fu se kon, so taki a kan kanti en trowe na grontapu.
9 En na a sma di man kiri wan tranga sma esi-esi. A e pori srefi wan foto di abi bigi skotu.
10 A pipel disi no lobi a sma di e piri-ai gi den na den portu. Den e tegu gi a sma di e taki san tru.
11 Unu e dwengi den mofina sma fu pai rente gi a gron pe den e prani sani, èn unu e tan teki a nyanyan di den prani na den gron fu den. Unu bow oso fu ston di sma koti puru na ini bergi, ma unu no o tan libi na ini. Unu prani moi droifidyari, ma unu no o tan dringi a win fu den droifi fu den.
12 Bika mi sabi den furu sondu di unu e du èn mi sabi omeni leisi unu opo unsrefi. Unu e libi takru nanga den sma di e du san reti, unu e teki tyuku, èn na den portu unu no e krutu den afersi fu den pôti sma na wan reti fasi.
13 Fu dati ede, a koni sma o tan pî na a ten dati, bika a o de wan ten fu rampu.
14 Suku san bun. No suku san no bun. Dan unu o tan na libi èn Yehovah, a Gado di e tiri den legre, o de nanga unu soleki fa unu taki.
15 Un no musu lobi ogri kwetikweti. Ma un musu lobi san bun èn un musu koti krutu na wan reti fasi na den portu fu a foto. Kande Yehovah, a Gado di e tiri den legre, o sari den sma fu Yosef di tan abra.’
16 Fu dati ede Yehovah, a Gado di e tiri den legre, iya, Yehovah srefi taki: ’Na ala den pren sma o bari krei èn na ala den strati sma o taki: „Ke! Ke bâ!” Meki den kari wan gronman fu kon row. Meki den kari den sma di sabi den sari singi, fu kon bari krei.’
17 ’Na ini ala droifidyari sma o krei, fu di mi o pasa na un mindri’, na so Yehovah taki.
18 ’Helu fu den wan di e wakti fayafaya te a dei fu Yehovah o kon! Ma san a dei fu Yehovah o wani taki gi un pipel? A o dungru èn leti no o de.
19 A o de leki te wan man e lon gi wan lew, dan a tuka nanga wan beer. A o de leki te a go na ini wan oso, dan wan sneki beti en na en anu di a poti na wan skotu na ini na oso.
20 Sobun, a dei fu Yehovah o dungru èn leti no o de. A o dungru pikapika èn faya no o de.
21 Mi no lobi den fesa fu unu kwetikweti. Mi e tegu gi den. Mi no lobi a smeri fu den srakti-ofrandi di unu e tyari na den spesrutu konmakandra fu unu.
22 Mi no o prisiri efu unu tyari heri bron-ofrandi gi mi, awinsi na ofrandi di unu gi mi leki kado. Mi no o poti prakseri na den fatu meti di unu e tyari leki freide-ofrandi.
23 Un tapu nanga a babari di unu e meki te unu e singi. No meki mi yere a poku di unu e prei nanga den pokusani fu unu.
24 Meki retidu lon leki watra èn meki retifasi lon doronomo leki wan liba di e lon ala ten.
25 Un Israelsma, di unu ben de na ini a sabana fotenti yari langa, dan a no gi mi unu ben tyari srakti-ofrandi èn a no gi mi unu ben tyari tra ofrandi tu.
26 Unu o tyari un kownu Sakut nanga Keiwan, dati na den popki fu den starigado di unu meki gi unsrefi, go na ini katibo.
27 Mi o meki unu go na ini katibo na presi di fara moro Damaskus’, na so a sma taki di nen Yehovah, a Gado di e tiri den legre.”
