Amos 7:1-17
7 Ne a Moro Hei Masra Yehovah meki mi si fa a seni bun furu sprenka kon na a kaba fu a yari te sma e sai siri. Na a ten dati sma ben koti grasi gi Kownu kaba.
2 Di den sprenka kaba nyan ala den sani di ben gro na ini a kondre, mi taki: „Grantangi Yehovah, mi Moro Hei Masra, gi a pipel pardon. Fa den sma fu Yakob o man tan na libi? Den no furu!”
3 Ne Yehovah kenki prakseri. Yehovah taki: „A sani disi no o pasa nanga den.”
4 Dan a Moro Hei Masra Yehovah meki mi si wan tra sani. A Moro Hei Masra Yehovah bigin meki trobi nanga en pipel. Dati meki a seni wan faya di meki den liba kon drei, èn a faya bron wan pisi fu a kondre.
5 Dan mi taki: „Grantangi Yehovah, mi Moro Hei Masra, no du a sani disi. Fa den sma fu Yakob o man tan na libi? Den no furu!”
6 Ne Yehovah kenki prakseri. A Moro Hei Masra Yehovah taki: „A sani disi no o pasa nanga den tu.”
7 Ne Yehovah meki mi si wan skotu di sma ben marki nanga wan pisi loto di tai na wan titei. A ben e tanapu na tapu a skotu èn a ben abi wan loto na ini en anu tu.
8 Dan Yehovah aksi mi: „San yu e si, Amos?” Ne mi piki en: „Mi e si wan loto.” Yehovah taigi mi: „Nanga wan loto mi o marki mi pipel Israel. Mi no o sari den moro.
9 Den hei presi pe den sma fu Isak e anbegi falsi gado o tron brokopresi èn den santa presi fu Israel o pori. Nanga feti-owru mi o go feti nanga den sma fu Yerobeyam.”
10 Amasia, a priester fu Betel, seni taigi Kownu Yerobeyam fu Israel: „Leti dyaso na ini Israel Amos span anu makandra nanga tra sma fu du yu ogri. Den sma fu a kondre no man nanga den sani di a e taki.
11 Amos taki: ’Sma o kiri Yerobeyam nanga feti-owru. A pipel fu Israel no o tan na ini den eigi kondre. Den o go na ini katibo.’”
12 Dan Amasia taigi Amos: „Yu di e kisi fisyun, komoto fu dyaso èn go na a kondre Yuda. Na drape yu musu nyan brede, èn na drape yu kan taki profeititori.
13 Ma na Betel yu no musu taki profeititori moro, bika a de a santa presi fu wan kownu èn a mamafoto fu wan kownukondre.”
14 Dan Amos piki Amasia: „Mi no ben de wan profeiti, èn mi no ben de a manpikin fu wan profeiti. Ma mi ben de wan skapuman èn wan man di e sorgu figabon.
15 Ne Yehovah puru mi na a skapuman-wroko, èn Yehovah taigi mi: ’Go na mi pipel Israel èn fruteri den profeititori.’
16 Arki now san Yehovah abi fu taki: ’Yu e taki: „Te yu e taki profeititori, dan yu no musu taki ogri fu Israel. Yu no musu taki nowan ogri fu den sma fu Isak.”
17 Dati meki Yehovah taki: „Yu wefi o tron wan huru-uma na ini a foto. Sma o kiri den manpikin nanga den umapikin fu yu nanga feti-owru. Den o marki a gron fu yu èn den o prati en. Yu o dede na ini wan kondre di no krin. A pipel fu Israel no o tan na ini den eigi kondre. Den o go na ini katibo.”’”
