Deuteronomium 10:1-22
10 Na a ten dati Yehovah taigi mi: ’Koti tu plata ston neleki den fosiwan, èn kren a bergi kon na mi. Yu musu meki wan santa kisi fu udu tu.
2 Na tapu den plata ston mi o skrifi den sani di ben skrifi na tapu den fosi ston di yu trowe panya. Baka dati yu musu poti den ston na ini a santa kisi.’
3 Sobun, mi meki wan santa kisi fu akasia-udu èn mi koti tu plata ston neleki den fosiwan. Ne mi kren a bergi nanga den tu plata ston na ini mi anu.
4 Na tapu den ston disi Gado skrifi den srefi sani di a ben skrifi na tapu den fosi plata ston, iya, a skrifi den Tin Komando gi unu. A dei di unu ben kon makandra na a bergi, Yehovah gi unu den komando disi. Unu ben yere en sten na ini a faya na tapu a bergi. Baka dati Yehovah gi mi den plata ston.
5 Ne mi drai, mi saka fu a bergi, èn mi poti den plata ston na ini a santa kisi di mi ben meki soleki fa Yehovah ben taigi mi. Na drape den musu tan.
6 Ne a heri pipel fu Israel hari gowe fu Beyerot Bene-Yakan fu go na Mosera. Drape Aron dede èn na drape den beri en. Baka dati Eleasar bigin wroko leki priester na presi fu en papa.
7 Fu drape den go na Gudgoda. Fu Gudgoda den go na Yotbata, wan kontren di abi lagipresi pe furu watra de.
8 Na a ten dati Yehovah gi a lo fu Leifi a wroko fu tyari a santa kisi fu Yehovah en frubontu. Na den musu wroko gi Yehovah èn na den e blesi a pipel na ini en nen te na a dei fu tide.
9 Fu dati ede den Leifisma no o kisi wan pisi fu a kondre èn den no o kisi wan famirigudu neleki den tra Israelsma. Ma den abi a grani fu du spesrutu wroko gi Yehovah, soleki fa Yehovah un Gado ben taigi den.
10 Ma neleki a fosi leisi, mi tan fotenti dei nanga fotenti neti na tapu a bergi. A leisi dati Yehovah arki mi tu. Yehovah no ben wani kiri unu.
11 Ne Yehovah taigi mi: ’Opo, meki a pipel sreka densrefi fu hari gowe. Den musu go teki a kondre abra di mi gi den, soleki fa mi pramisi den afo fu den.’
12 We Israel, Yehovah un Gado e aksi unu nomo fu lespeki en. Dan unu o du ala san Yehovah un Gado e aksi unu, unu o lobi en èn unu o dini Yehovah un Gado nanga un heri ati èn nanga un heri libi.*
13 Un musu hori den komando nanga den wèt fu Yehovah di mi e taigi unu tide, so taki sani kan waka bun nanga unu.
14 Luku, na Yehovah un Gado abi hemel nanga ala sani di de na hemel, èn grontapu nanga ala sani di de na grontapu.
15 Ma na soso den afo fu unu Yehovah ben lobi. Dati meki a tai hori na den èn a teki den bakapikin fu den leki en pipel. Fu ala den pipel di de, na unu a teki, te na a dei fu tide.
16 Un musu krin* un ati èn un no musu tranga-ede moro.
17 Bika Yehovah un Gado na Gado fu ala gado èn Masra fu ala masra. En na a gran Gado di tranga srefisrefi èn di musu kisi bigi lespeki. A no lobi a wan sma moro a trawan, èn a no e teki tyuku.
18 Na wan reti fasi a e koti krutu gi a pikin di no abi papa, èn gi na uma di en masra dede. A e gi trakondre sma di e tan na un mindri, brede nanga dyakti, fu di a lobi den.
19 Unu srefi musu lobi den trakondre sma di e tan na un mindri, bika unu ben de trakondre sma na ini a kondre Egepte.
20 Un musu lespeki Yehovah un Gado. Na en un musu dini, èn na en un musu tai hori. Te unu e meki wan sweri, dan un musu sweri na en nen.
21 Na en un musu prèise. En na un Gado di du bigi sani gi unu, sani di e meki sma frede èn di unu srefi si.
22 Nanga seibitenti sma den afo fu unu go na ini Egepte. Ma now Yehovah un Gado meki unu kon de so furu leki den stari na hemel.
