Deuteronomium 15:1-23
15 Na a kaba fu ibri seibi yari, sma no abi fu pai den paiman fu den.
2 Disi na san musu pasa: ibriwan sma di leni wan trawan wan sani, musu taigi a trawan taki a no abi fu pai en na ini a yari dati. A sma no musu dwengi en kondreman noso en brada fu pai en. A seti disi e gi Yehovah grani.
3 Efu wan trakondre sma abi wan paiman na unu, dan unu kan dwengi en fu pai unu. Ma efu un brada abi wan paiman na unu, dan a no abi fu pai unu.
4 Nowan fu unu o pôti, bika Yehovah un Gado o blesi unu na ini a kondre di Yehovah gi unu fu tan.
5 Ma Yehovah un Gado o blesi unu, soso te unu e gi yesi na en èn te unu e du ala sani soifri leki fa mi e taigi unu tide.
6 Yehovah un Gado o blesi unu soleki fa a pramisi. Furu tra pipel o kon panti sani na unu, ma unu srefi no o abi fu leni sani na den. Unu o basi furu tra pipel, ma den no o basi unu.
7 Efu unu de na ini wan fu den foto na ini a kondre di Yehovah un Gado gi unu, èn wan kondreman fu unu kon pôti, dan un musu abi sari-ati gi en èn un no musu gridi fu yepi en.
8 Nanga un heri ati un musu yepi en. Awinsi fa a no fa, leni en ala san a abi fanowdu èn meki a gi unu wan panti.
9 Kon meki wi taki dati a di fu seibi yari, sobun a Sabat-yari,* de krosibei èn un pôti kondreman de na nowtu. Un no musu kisi na ogri prakseri taki unu no o leni noso gi en wan sani, soso fu di unu sabi taki a no o abi fu pai unu na ini a yari dati. A o bari suku yepi na Yehovah, fu di unu du a sondu disi.
10 Awinsi fa a no fa, un musu yepi en èn un no musu gridi. Te unu yepi en, dan Yehovah un Gado o blesi unu èn a o blesi ala sani di unu o du.
11 Ala ten pôti sma o de na ini a kondre. Fu dati ede mi e taigi unu: ’Nanga un heri ati un musu yepi un pôti kondreman di de na nowtu.’
12 Kon meki wi taki dati unu bai wan Hebrew man noso wan Hebrew uma, leki srafu èn a wroko siksi yari gi unu. Na ini a di fu seibi yari un musu seni en gowe leki wan sma di fri.
13 Te unu o seni en gowe leki wan sma di fri, dan un no musu meki a gowe nanga leigi anu.
14 Un musu gi en wan tu fu den meti fu unu, oli, win, nanga sani soleki aleisi. Un no musu gridi fu gi en den sani disi, bika Yehovah un Gado gi unu furu blesi.
15 Un no musu frigiti taki unu ben de srafu na ini a kondre Egepte, èn taki Yehovah un Gado frulusu unu. Dati meki mi e taigi unu den sani disi tide.
16 Kon meki wi taki dati a Hebrew srafu taigi unu taki a wani tan nanga unu, fu di a lobi unu nanga un osofamiri, èn fu di unu e libi bun nanga en.
17 Efu a wani tan nanga unu, dan un musu meki a poti en yesi na wan doro, èn un musu boro en yesi nanga wan prin. Dan ala ten a sa de un srafu. Un musu du a srefi sani nanga wan umasrafu fu unu.
18 A no musu hati unu fu seni en gowe leki wan sma di fri, bika na siksi yari langa a wroko gi unu. A moni di unu ben musu pai en fu a wroko di a du gi unu, na tu tron so furu leki san unu ben o pai wan wrokoman fu unu. Boiti dati, Yehovah un Gado ben blesi ala sani di unu du na ini a pisi ten dati.
19 Ibri fosi pikin fu wan kaw noso wan skapu musu de wan santa sani gi Yehovah un Gado. Un no musu meki a fosi pikin fu wan kaw wroko. Un no musu koti a wiwiri fu a fosi pikin fu den skapu fu unu.
20 Ibri yari unu nanga un osofamiri musu go na a presi di Yehovah o sori unu, èn drape un musu nyan a meti na fesi Yehovah un Gado.
21 Ma efu wan sani no bun nanga wan meti, efu a malengri, efu a breni, noso efu a abi iniwan tra sortu mankeri, dan un no musu tyari en leki ofrandi gi Yehovah un Gado.
22 Unu kan nyan den sortu meti disi na ini den foto fu unu. Awinsi wan sma krin noso a no krin, toku a kan nyan a meti neleki fa a kan nyan meti soleki dia.
23 Na a brudu wawan un no musu nyan. Neleki watra un musu trowe en na gron.
Futuwortu
^ Noso: „a yari pe sma nanga sani e kon fri.”
