Deuteronomium 22:1-30
22 Efu yu si taki wan kaw noso wan skapu fu yu kondreman lasi pasi, dan yu no musu du leki yu no si noti. Awinsi fa a no fa, yu musu tyari a meti go baka na a kondreman fu yu.
2 Ma efu a sma di abi a meti no de na ini a birti fu yu, noso yu no sabi suma abi a meti, dan yu musu tyari a meti go na yu oso. Yu musu hori en drape teleki a sma di abi a meti kon suku en. Dan yu musu gi en a meti.
3 Na so yu musu du tu te yu feni wan buriki, wan dyakti, noso iniwan tra sani di yu kondreman lasi. Yu no musu du leki yu no sabi noti.
4 Te yu si taki wan buriki noso wan kaw fu yu kondreman fadon na pasi, dan yu no musu du leki yu no si san pasa. Awansi fa a no fa, yu musu yepi yu kondreman fu opo a meti baka.
5 Nowan uma musu weri mansma krosi èn nowan man musu weri umasma krosi. Yehovah un Gado e tegu gi iniwan sma di e du den sani disi.
6 Kon meki wi taki dati yu si wan fowrunesi na wan pasi, na ini wan bon, noso na gron, èn pikin fowru noso eksi de na ini. Efu a mama e sidon na tapu den pikin fowru noso na tapu den eksi, dan yu no musu teki a mamafowru makandra nanga den pikin fu en noso den eksi fu en.
7 Yu kan teki den pikin fowru noso den eksi, ma ala ten yu musu meki a mama gowe. Dan sani o waka bun nanga yu èn yu o libi langa.
8 Efu yu bow wan nyun oso, yu musu bow wan pikin skotu na tapu a daki, so taki sma no fadon komoto fu a daki. Na so yu no o kisi brudu-paiman.
9 Yu no musu sai tu sortu siri na ini yu droifidyari. Efu toku yu du dati, dan yu abi fu teki ala den droifi nanga den tra sani di yu prani na ini a gron, èn yu abi fu tyari den go na a santa presi.
10 Te yu o plugu wan gron, dan yu no musu fasi wan kaw nanga wan buriki na a srefi plugu.
11 Yu no musu weri krosi di meki fu tu difrenti sortu titei, soleki krosi di meki fu skapu-wiwiri moksi nanga linnen-titei.
12 Un musu tai wan tu pisi titei makandra fu meki fo kwasi, dan un nai den kwasi na den fo uku fu a krosi di unu e gebroiki fu tapu unsrefi.
13 Kon meki wi taki dati wan man trow nanga wan uma èn a didon nanga en, ma bakaten a no lobi en moro.
14 Ne a go taki dati na uma du wan lo ogri èn a gi na uma porinen. Kande a taki: ’Mi ben teki na uma disi, ma di mi didon nanga en, mi kon si taki a didon nanga wan man kaba.’
15 Dan a papa nanga mama fu na uma musu go na den owru man di de na a portu fu a foto, fu sori den taki na umapikin fu den no didon nanga wan man noiti.
16 A papa fu na uma musu taigi den owru man: ’Mi meki a man disi trow nanga mi umapikin, ma bakaten a no ben lobi en moro.
17 Now a e taki dati mi umapikin du wan lo ogri. A taki: „Mi kon si taki yu umapikin didon nanga wan man kaba.” Ma luku, disi na a buweisi di e sori taki mi umapikin ben de wan nyunwenke ete.’ Dan a papa nanga mama musu bradi a krosi fu na umapikin na fesi den owru man fu a foto.
18 Dan den owru man fu a foto dati musu strafu a man.
19 Den musu meki a man pai a papa fu en wefi wan butu fu wán hondro solfru moni, bika a pori a nen fu wan nyunwenke na ini Israel. Na uma o tan en wefi. Noiti a o kisi primisi fu broko trow nanga na uma disi.
20 Ma efu a tru taki na uma didon nanga wan man kaba,
21 dan den musu tyari en go na a mofodoro fu en papa oso. Drape den man fu a foto musu trowe ston na en tapu teleki a dede. Den musu du disi, fu di na uma ben e huru di a ben de na ini en papa oso ete. Na wan don sani a du èn na wan bigi syen na ini Israel. Na so unu musu puru ogri na un mindri.
22 Efu wan man go didon nanga wan uma di abi wan masra kaba èn sma si den, dan ala tu musu dede. Un musu kiri a man di didon nanga na uma, èn na uma. Na so unu musu puru ogri na ini Israel.
23 Efu wan man na ini wan foto didon nanga wan nyunwenke di abi mofo fu trow nanga wan tra man,
24 dan un musu tyari den go na a portu fu a foto dati, èn un musu trowe ston na den tapu teleki den dede. Na uma musu dede, fu di a no bari na ini a foto. A man musu dede, fu di a didon nanga a wefi fu en kondreman. Na so unu musu puru ogri na un mindri.
25 Ma efu na dorosei fu a foto, wan man grabu wan uma di abi mofo fu trow, èn a didon nanga en, dan a man di didon nanga na uma musu dede. Un musu kiri en wawan.
26 Ma un no musu du noti nanga na uma. A no du wan sondu di ben o meki taki unu musu kiri en. A sani disi di a man du, de a srefi leki te wan man go feti nanga wan trawan èn a kiri en.
27 A man grabu na uma na dorosei fu a foto. Na uma di ben abi mofo fu trow ben e bari, ma nowan sma ben de drape fu yepi en.
28 Ma kon meki wi taki dati wan man grabu wan nyunwenke di no abi mofo fu trow èn a didon nanga en. Te sma kon sabi a tori disi,
29 dan a man di didon nanga na uma musu gi a papa fu na uma, feifitenti solfru moni. Na uma o tron en wefi, fu di a dwengi en fu didon nanga en. Noiti a o kisi primisi fu broko trow nanga na uma disi.
30 Nowan man musu didon nanga en papa wefi, noso a o gi en papa syen.
