Deuteronomium 27:1-26
27 Ne Moses nanga den owru man fu Israel go tanapu na fesi a pipel. Moses taigi a pipel: „Un musu gi yesi na ala den komando di mi e taigi unu tide.
2 Te unu abra Yordan-liba fu go na ini a kondre di Yehovah un Gado gi unu, dan un musu poti wan tu bigi ston leti-opo. Meki den kon weti nanga karki.
3 Dan un musu skrifi ala den wèt disi na tapu den ston te unu abra a liba. Baka dati unu kan go na ini a kondre di Yehovah un Gado gi unu, a kondre di lai merki nanga oni. Na a kondre disi Yehovah, a Gado fu den afo fu unu, pramisi fu gi unu.
4 Sobun, te unu abra Yordan-liba, dan un musu poti den ston na Eibal-bergi, èn un musu meki den kon weti nanga karki, soleki fa mi taigi unu.
5 Boiti dati, un musu bow wan altari drape gi Yehovah un Gado. A musu de wan altari fu ston èn nowan fu den ston musu koti nanga wan isri wrokosani.
6 Un no musu meki na altari gi Yehovah un Gado nanga ston di unu koti puru fu bergi. Na tapu na altari un musu tyari bron-ofrandi gi Yehovah un Gado.
7 Boiti dati, un musu tyari freide-ofrandi tu èn na drape un musu nyan den ofrandi. Dan un musu prisiri na fesi Yehovah un Gado.
8 Te unu skrifi den wèt na tapu den ston, sma musu man frustan den krin.”
9 Dan Moses nanga den priester, sobun den Leifisma, taigi ala Israelsma: „Un Israelsma, tan tiri èn arki. Tide unu tron a pipel fu Yehovah un Gado.
10 Un musu arki san Yehovah un Gado e taki, èn un musu hori den komando nanga den wèt fu en di mi e taigi unu tide.”
11 A dei dati, Moses taigi a pipel tu:
12 „Te unu abra Yordan-liba, dan wan grupu sma musu tanapu na fesi Gerisim-bergi fu piki te den yere sortu blesi den kan kisi. Disi na den sma: den bakapikin fu Simeon, den bakapikin fu Leifi, den bakapikin fu Yuda, den bakapikin fu Isaskar, den bakapikin fu Yosef, nanga den bakapikin fu Benyamin.
13 Den sma di musu tanapu na fesi Eibal-bergi fu piki te den yere sortu fluku den kan kisi, na den bakapikin fu Ruben, den bakapikin fu Gad, den bakapikin fu Aser, den bakapikin fu Seibulon, den bakapikin fu Dan, nanga den bakapikin fu Naftali.
14 Meki den Leifisma taki nanga wan tranga sten, so taki ibri Israelsma kan yere den. Den musu taki:
15 ’Fluku musu kon tapu a sma di meki wan popki fu udu noso isri, dan a poti en na wan kibripresi fu anbegi en. Yehovah no lobi en kwetikweti te sma meki popki fu anbegi dati.’ (Dan a heri pipel musu taki: ’Amen!’*)
16 ’Fluku musu kon tapu a sma di wisiwasi en papa noso en mama.’ (Dan a heri pipel musu taki: ’Amen!’)
17 ’Fluku musu kon tapu a sma di skoifi den marki fu wan tra sma en gron.’ (Dan a heri pipel musu taki: ’Amen!’)
18 ’Fluku musu kon tapu a sma di meki wan breniwan lasi pasi.’ (Dan a heri pipel musu taki: ’Amen!’)
19 ’Fluku musu kon tapu a sma di e du kruka sani te a musu koti krutu gi wan trakondre sma di e tan na un mindri, gi a pikin di no abi papa, èn gi na uma di en masra dede kaba.’ (Dan a heri pipel musu taki: ’Amen!’)
20 ’Fluku musu kon tapu a sma di didon nanga en papa wefi, bika a gi en papa syen.’ (Dan a heri pipel musu taki: ’Amen!’)
21 ’Fluku musu kon tapu a sma di abi seks nanga iniwan meti.’ (Dan a heri pipel musu taki: ’Amen!’)
22 ’Fluku musu kon tapu a sma di didon nanga en sisa, awinsi na a umapikin fu en papa, noso na umapikin fu en mama.’ (Dan a heri pipel musu taki: ’Amen!’)
23 ’Fluku musu kon tapu a sma di didon nanga en wefi mama.’ (Dan a heri pipel musu taki: ’Amen!’)
24 ’Fluku musu kon tapu a sma di luru wan trawan èn a kiri en.’ (Dan a heri pipel musu taki: ’Amen!’)
25 ’Fluku musu kon tapu wan sma di teki moni fu wan trawan fu kiri wan sma di no du noti.’ (Dan a heri pipel musu taki: ’Amen!’)
26 ’Fluku musu kon tapu a sma di trangayesi a wèt disi èn di no du san a wèt taki.’ (Dan a heri pipel musu taki: ’Amen!’)
Futuwortu
^ Disi wani taki: „Na so a de.”
