Deuteronomium 28:1-68
28 Efu ala ten unu e arki Yehovah un Gado èn unu e sorgu taki unu e hori den komando di mi e taigi unu tide, dan Yehovah un Gado o meki unu kon moro hei leki ala tra pipel fu grontapu.
2 Efu unu e arki Yehovah un Gado ala ten, dan a o blesi unu. Iya, unu o kisi ala den blesi disi trutru:
3 Unu o kisi blesi, awinsi unu e tan na ini den foto noso awinsi unu e tan dorosei fu den foto.
4 Gado o blesi un pikin, den sani di unu prani, den osometi fu unu, èn den yongu kaw nanga den yongu skapu fu unu.
5 A o blesi unu, so taki unu o abi furu nyanyan na ini un baskita èn na ini den baki pe unu e masi blon.
6 A o blesi ala sani di unu e du.
7 Yehovah o meki unu wini den feanti di o kon feti nanga unu. Den o waka wán pasi fu kon feti nanga unu, ma na seibi pasi den o teki fu lon gowe.
8 Yehovah o span den maksin fu unu, èn a musu blesi ala sani di unu o du. Yehovah un Gado o blesi unu na ini a kondre di a gi unu.
9 Efu unu o tan hori den komando fu Yehovah un Gado èn unu e du san a taki, dan Yehovah o meki unu tron en santa pipel, soleki fa a ben pramisi unu.
10 Dan ala pipel fu grontapu o si taki unu e tyari Yehovah en nen, èn den o frede unu.
11 Yehovah o meki unu kisi furu pikin èn bun furu meti. Boiti dati, unu o koti bun furu nyanyan na den gron fu unu na ini a kondre di Yehovah gi unu, soleki fa a pramisi den afo fu unu.
12 Neleki fa wan sma e opo en maksin di lai sani, na so Yehovah o opo hemel fu meki alen fadon na a yoisti ten na ini a kondre fu unu, èn a o blesi ala sani di unu o du. Dan furu kondre o kon leni sani na unu, ma unu no o leni sani na den.
13 Te unu e gi yesi èn unu e hori den komando fu Yehovah un Gado di mi taigi unu tide, dan Yehovah o meki unu kon bigi moro den tra pipel èn den no o basi unu. Unu o go na fesi, èn unu no o go na baka.
14 Sorgu taki unu du ala sani di mi e taigi unu tide. Un no musu go dini tra gado.
15 Efu unu no arki san Yehovah un Gado taki èn unu no e hori den komando nanga den wèt fu en di mi e taigi unu tide, dan wan lo ogri o miti unu. Fu tru, ala den ogri sani disi o pasa nanga unu:
16 Gado o fluku unu, awinsi unu e tan na ini den foto noso awinsi unu e tan dorosei fu den foto.
17 A o fluku unu, so taki unu o abi pikinso nyanyan nomo na ini un baskita èn na ini den baki pe unu e masi blon.
18 A o fluku un pikin, den sani di unu prani, èn den yongu kaw nanga den yongu skapu fu unu.
19 A o fluku ala sani di unu e du.
20 Awinsi san unu o pruberi fu du, Yehovah o fluku unu. A o meki unu kon bruya èn a o strafu unu. Dan un alamala o dede te fu kaba. A no o draidrai fu kiri unu te unu du ogri sani èn te unu drai baka gi en.
21 Yehovah o meki unu kisi ala sortu takru siki, teleki a figi un alamala puru na ini a kondre pe unu o go tan.
22 Yehovah o meki unu kisi wan takru siki* nanga hebi korsu. A o meki unu kisi poisipoisi nanga krasikrasi. A o meki un skin kon faya neleki unu abi korsu. Sma o kiri unu nanga feti-owru. Den sani di unu prani o dede, fu di faya winti o wai èn den bon o kon siki. Ala den sani disi o miti unu, teleki un alamala dede.
23 Hemel o tron leki kopro. Grontapu o kon de leki isri.
24 Yehovah o meki santi nanga finifini doti fadon na tapu a kondre fu unu. Den o fadon komoto fu hemel neleki alen, teleki un alamala dede.
25 Yehovah o meki den feanti wini unu. Unu o waka wán pasi fu kon feti nanga den, ma na seibi pasi unu o teki te unu o lon gowe gi den. Ala den tra kownukondre na grontapu o frede te den si den ogri sani di e pasa nanga unu.
26 Den busimeti èn den meti di e frei o nyan den dedeskin fu unu. Nowan sma o meki den frede.
27 Yehovah o meki unu kisi butsweri neleki di fu den Egeptesma. Unu o kisi sweri na ini un bille èn unu o kisi krasikrasi nanga poisipoisi. Unu no o man dresi den siki disi.
28 Yehovah o meki unu du lawlaw sani. A o meki taki unu no o man si bun èn a o meki unu kon bruya.
29 Srefi na deiten unu o firifiri na un lontu neleki fa wan breniman e firifiri na en lontu, fu di a no e si noti. Sani no o waka bun gi unu. Ala ten sma o bedrigi unu èn den o fufuru sani fu unu. Nowan sma o yepi unu.
30 Unu o abi mofo fu trow nanga wan uma, ma nanga tranga wan tra man o didon nanga en. Unu o bow oso, ma unu no o tan na ini. Unu o prani droifidyari, ma unu no o nyan den froktu.
31 Leti na un fesi sma o srakti den mankaw fu unu, ma unu srefi no o nyan nowan pisi fu den. Leti na un fesi sma o fufuru den buriki fu unu. Unu no o kisi den baka. Den feanti fu unu o teki den skapu fu unu. Nowan sma o yepi unu.
32 Leti na un fesi wan tra pipel o teki den manpikin nanga umapikin fu unu. Ala ten unu o angri fu si den pikin baka, ma unu no o man du noti.
33 Wan pipel di unu no sabi o kon nyan den sani di unu koti na den gron èn ala tra nyanyan di unu abi. Ala ten sma o bedrigi unu èn den o kwinsi unu.
34 Te unu o si ala den sani disi e pasa, dan unu o du lawlaw sani.
35 Yehovah o meki unu kisi takru butsweri na un tu kindi èn na un tu futu. Fu un ondrofutu te na un ede unu o kisi butsweri, èn unu no o man dresi den.
36 Yehovah o yagi unu nanga un kownu gowe na a kondre fu wan pipel di unu nanga un afo no ben sabi. Drape unu o abi fu dini tra gado di meki fu udu nanga ston.
37 Den sma pe Yehovah o yagi unu go, o skreki fu den sani di pasa nanga unu. Den o koti odo gi unu èn den o spotu unu.
38 Unu o sai furu siri na un gron, ma unu no o koti furu nyanyan, fu di sprenka o nyan den sani di unu prani.
39 Unu o prani droifi na un gron èn unu o sorgu den sani di unu prani, ma unu no o piki den droifi èn unu no o dringi a win fu den, fu di woron o nyan den droifi.
40 Na ini a heri kondre olèifbon o de, ma unu no o feni na oli fu den fu lobi na un skin, bika den froktu o fadon fu den bon.
41 Unu o kisi manpikin nanga umapikin, ma den no o tan nanga unu, fu di sma o tyari den go na ini katibo.
42 Bun furu meti soleki sprenka o kon na tapu ala sani di unu prani na un gron.
43 Den trakondre sma di e tan nanga unu o kon gudu moro nanga moro, ma unu o kon pôti moro nanga moro.
44 Unu o abi fu leni sani na den, ma den no o kon leni sani na unu. Den o go na fesi, ma unu o go na baka.
45 Te unu no arki san Yehovah un Gado taki èn unu no hori den komando nanga den wèt di a gi unu, dan ala den ogri sani disi o miti unu, awinsi pe unu e go. Iya, ala den fluku disi o kon na unu tapu, teleki un alamala dede.
46 Den sani disi di o miti unu nanga un bakapikin, musu de wan marki èn wan warskow gi sma fu ala ten.
47 Den sani disi o miti unu te unu no e dini Yehovah un Gado nanga prisiri èn te unu no de nanga tangi fu den sani di a gi unu bogobogo.
48 Unu o tron futuboi fu den feanti di Yehovah seni gi unu. Unu no o abi nyanyan, unu no o abi sani fu dringi, èn unu no o abi krosi fu weri. Ala ten unu o pina. Gado o poti wan isri tyatyari na tapu un skowru, dan un alamala o dede.
49 Dan Yehovah o meki wan pipel di e tan farawe kon feti nanga unu. Den e taki wan tra tongo di unu no e frustan, èn den o kon na unu tapu neleki fa wan aka e grabu wan meti.
50 A de wan ogri-ati pipel di no o sori switifasi gi owru sma èn di no o abi sari-ati gi yongu sma.
51 Den o nyan den pikin fu den meti di unu e kweki, èn den o nyan a nyanyan fu un gron. Un alamala o dede. Den no o libi nowan sani soleki aleisi, nyun win, oli, pikin kaw nanga skapu gi unu. Den o kiri un alamala.
52 Unu denki taki den bigi èn tranga skotu fu un foto o man kibri unu. Ma den feanti disi o lontu den foto èn den o broko ala den skotu fu unu. Den o lontu unu di e tan na ini den foto fu a kondre di Yehovah un Gado gi unu.
53 Te den feanti lontu unu, dan unu o pina èn unu o bruya. Unu o nyan den pikin fu unu. Unu o nyan den manpikin nanga den umapikin di Yehovah un Gado gi unu.
54 Srefi a man di abi switifasi èn di abi wan bun libi, no o libi bun nanga en kondreman, en lobi wefi, nanga den manpikin fu en di de na libi ete.
55 Bika te a o nyan wan manpikin fu en, a no o prati en nanga den. A o du disi, fu di den feanti fu unu di lontu a foto, e pina èn e kwinsi en so te, taki a no abi noti fu nyan.
56 Son uma abi switifasi èn den abi so wan bun libi taki den no wani waka go na nowan presi. Ma na a ten dati, den o du ogri-ati sani. Den no o libi bun nanga den lobi masra, den manpikin, nanga den umapikin fu den.
57 Srefi te den meki pikin, den o nyan den eigi pikin nanga den eigi murukuku na wan kibri fasi. Den o du disi, fu di den feanti fu unu di lontu a foto, e pina èn e kwinsi den so te, taki den no abi noti fu nyan.
58 Efu unu no hori ala den wèt di skrifi na ini a buku disi, sobun efu unu no abi frede èn lespeki gi a bigi nen fu Yehovah un Gado,
59 dan Yehovah o tyari rampu kon gi unu nanga den bakapikin fu unu. Den rampu disi o hebi srefisrefi, den o bigi, èn den o tan wan langa pisi ten. Boiti dati, a o meki unu kisi ala sortu takru siki di e tan wan langa pisi ten.
60 Iya, ala den siki di a ben gi den Egeptesma èn di unu ben e frede, o kon na unu tapu èn unu no o man dresi den.
61 Boiti dati, unu o kisi ala sortu tra siki di no skrifi na ini a wètbuku disi. Yehovah o meki unu kisi den siki disi, dan un alamala o dede.
62 Aladi unu kon furu leki den stari na hemel, toku na wan tu fu unu nomo o tan abra te unu no arki san Yehovah un Gado taigi unu.
63 Neleki fa Yehovah ben prisiri fu du bun gi unu èn fu meki unu kon furu, na so Yehovah o prisiri tu fu kiri unu èn fu figi un alamala puru. A o rutu unu puru na ini a kondre pe unu o go tan.
64 Yehovah o yagi unu go na ala sei fu grontapu. Dan unu o abi fu tan na mindri tra pipel èn unu o abi fu dini tra gado di meki fu udu nanga ston, gado di unu nanga un afo no ben sabi.
65 Drape unu no o de korostu èn unu no o abi nowan presi fu tan. Yehovah o meki un ati beifi, unu no o si bun moro, èn unu o lasi-ati.
66 Unu o frede srefisrefi taki unu o dede. Dei nanga neti unu o frede trutru èn unu o de nanga dyompo-ati.
67 Te a de mamanten, dan unu o winsi taki a de neti. Na neti unu o winsi taki dei opo, bika unu o frede srefisrefi fu den sani di unu e si.
68 Nanga sipi Yehovah o tyari unu go baka na Egepte, aladi a ben taigi unu taki noiti unu ben o go drape baka. Drape ala un mansma nanga umasma o wani seri densrefi leki srafu gi den feanti fu unu, ma nowan sma o wani bai den.”
Futuwortu
^ Noso: „a siki tuberculose.”
