Deuteronomium 3:1-29
3 Baka dati, wi drai go na a pasi fu Basan. Ne Kownu Ok fu Basan kon nanga en heri pipel fu feti nanga wi na Edrei.
2 Dati meki Yehovah taigi mi: ’No frede a kownu, bika mi sa meki yu wini en nanga a heri pipel fu en, èn yu sa kisi a kondre fu en. A srefi sani di yu du nanga Sihon, a kownu fu den Amorietsma di ben e tan na Hesbon, na dati yu musu du nanga a kownu disi tu.’
3 Sobun, Yehovah wi Gado meki wi wini Kownu Ok fu Basan tu, makandra nanga a heri pipel fu en. Wi feti nanga den teleki wi kiri den alamala.
4 Na a ten dati, wi teki ala den foto fu en abra. Nowan foto wi libi gi den. Wi teki ala den siksitenti foto na ini a heri kontren fu Argob, a kownukondre fu Kownu Ok fu Basan.
5 Ala den foto disi ben tranga èn den ben abi hei skotu nanga doro di e sroto nanga stanga. Bun furu pikin foto ben de na ini a kontren dati tu.
6 Toku wi broko den alamala, neleki fa wi broko ala den foto fu Kownu Sihon fu Hesbon. Wi kiri ala den man, den uma, nanga ala den pikin.
7 Ala den osometi nanga den gudu na ini den foto, wi teki gi wisrefi.
8 Na a ten dati, wi teki a kondre fu den tu kownu fu den Amorietsma di ben e tan na ini a kontren fu Yordan-liba, dati na a heri kontren fu Arnon-lagipresi te go miti Hermon-bergi.
9 (Den Sidonsma ben e kari Hermon-bergi, Sirion-bergi. Den Amorietsma ben e kari en Senir-bergi.)
10 Boiti dati, wi teki den foto na den plata kontren fu den bergi, a heri kontren fu Gilead, a heri kontren fu Basan te na den foto Salka nanga Edrei. Den tu foto disi ben de na ini a kownukondre fu Kownu Ok fu Basan.
11 Kownu Ok fu Basan ben de wan fu den lasti Rafasma. Den poti a dedekisi fu en na tapu wan isri sani na ini a foto Raba pe den Amonsma e tan. Efu yu ben o marki na isri sani dati nanga a markitiki di sma gwenti gebroiki, dan a langa sowan fo meter èn a bradi sowan tu meter.
12 Na a ten dati, wi teki den kondre disi abra. Ne mi gi a lo fu Ruben èn a lo fu Gad a kontren fu Arower di de na Arnon-lagipresi èn afu fu Gilead-bergikontren nanga den foto drape.
13 Mi gi na afu lo fu Manase a tra pisi fu Gilead èn a heri kontren fu Basan pe Kownu Ok ben e tiri. Sma e kari a heri kontren fu Argob di de na ini Basan, a kondre fu den Rafasma.
14 Yahir, a manpikin fu Manase, teki a heri kontren fu Argob te na a kondre fu den Geisursma nanga den Makatsma. Ne a gi den pikin foto fu Basan en eigi nen. A kari den Hafot-Yahir. Te na a dei fu tide den abi a nen disi.
15 Mi gi Makir a foto Gilead.
16 Mi gi a lo fu Ruben nanga a lo fu Gad a kontren fu Gilead te na mindrisei fu Arnon-lagipresi. Mi gi den a kontren fu Yabok-lagipresi tu. A kontren fu den Amonsma e doro te na a lagipresi dati.
17 Boiti dati, mi gi den a kontren fu Araba-lagipresi di de na Yordan-liba nanga a syoro fu en. Dati na a kontren fu Kineret te na a se fu Araba, di den e kari Sowtu Se tu. A de na a futu fu Pisga-bergi pe son e opo.
18 Na a ten dati, mi taigi unu: ’Yehovah un Gado gi unu a kondre disi fu tan na ini. Un musu abra a liba fosi un brada, den tra Israelsma. Ala deki-ati man musu abra nanga den fetisani fu den.
19 Den sma di o tan na ini den foto di mi gi unu, na soso un wefi, un pikin, nanga un meti. (Mi sabi taki un abi furu meti.)
20 Un no musu drai go baka, solanga Yehovah no meki unu nanga un brada rostu, èn solanga den no kisi a kondre di Yehovah un Gado gi den na abrasei fu Yordan-liba. Baka dati, ibriwan fu unu kan drai go baka na a presi di mi gi unu.’
21 Na a ten dati, mi taigi Yosua: ’Yu eigi ai si ala den sani di Yehovah yu Gado du nanga den tu kownu disi. Na a srefi sani Yehovah o du nanga ala den kownu di yu o miti drape.
22 Un no musu frede den, bika Yehovah un Gado na a sma di o feti gi unu.’
23 Na a ten dati, mi begi Yehovah. Mi taki:
24 ’O Yehovah, a Moro Hei Masra di de, yu srefi bigin sori yu futuboi fa yu bigi èn fa yu tranga. Sortu gado na hemel noso grontapu man du den bigi sani di yu e du?
25 Grantangi, meki mi abra Yordan-liba fu si a bun kondre di de na abrasei. Meki mi si a moi bergikontren nanga Libanon.’
26 Ma na fu unu ede Yehovah en ati ben e bron nanga mi èn a no arki mi. Yehovah taigi mi: ’A nofo! Noiti moro yu musu taki a tori disi nanga mi.
27 Go na a ede fu Pisga-bergi, dan yu luku go na west-sei, noordsei, zuidsei nanga owstusei. Luku go na ala sei, bika yu no o abra Yordan-liba.
28 Poti Yosua leki fesiman. Gi en deki-ati èn tranga en, bika na en o tyari a pipel go na abrasei fu a liba. Na en o meki den teki a kondre abra di yu o si.’
29 A heri pisi ten dati, wi ben e tan na a lagipresi na fesi Bet-Peor.
