Gi den Efeisesma 1:1-23
1 Mi, Paulus, di tron wan apostel fu Krestes Yesus fu di Gado wani, e skrifi a brifi disi gi den santawan di de na Efeise nanga den wan di e gi yesi na Gado ala ten èn di de wán nanga Krestes Yesus:
2 Meki Gado wi Tata nanga Masra Yesus Krestes sori unu bun-ati èn meki a freide fu den de nanga unu.
3 Prèise a Gado èn a Tata fu wi Masra Yesus Krestes, bika a blesi wi na ala sortu fasi nanga yepi fu en santa yeye na hemel, fu di wi de wán nanga Krestes.
4 A kari wi fu de wán nanga Krestes sensi a ten di grontapu seti. Dati meki wi musu sori lobi, wi musu de santa èn wi musu de sondro fowtu na fesi Gado.
5 Bika Gado ben bosroiti na fesi fu teki wi leki en eigi manpikin nanga yepi fu Yesus Krestes, fu di na dati e plisi en èn na dati a wani.
6 Na so fasi sma kan prèise en fu di a sori wi furu bun-ati. A gebroiki en Lobiwan fu du disi.
7 Nanga yepi fu Yesus wi kon fri. A pai a lusu-paiman nanga a brudu fu en. Na so wi e kisi pardon fu wi sondu, bika Gado e sori wi bun-ati pasa marki.
8 A sori wi a bun-ati disi pasa marki èn a gi wi ala koni nanga frustan.
9 A meki wi kon sabi san na a santa kibritori di abi fu du nanga a wani fu en. Fu di a e plisi en èn fu di a feni en bun meki a bosroiti fu
10 seti sani na a kaba fu a ten di a poti. Na so ala sani o kon makandra baka na ondro Krestes. Dati na den sani di de na ini hemel nanga den sani di de na grontapu. Iya, na ondro en ala sani o kon makandra.
11 Wi de wán nanga en èn wi o kisi wan gudu makandra nanga en, fu di Gado bosroiti disi na fesi kaba. En na a sma di e du ala sani soleki fa a wani.
12 Dati meki wi di de den fosiwan di ben howpu tapu Krestes, o meki taki Gado kisi prèise nanga glori.
13 Ma unu srefi ben howpu na en tapu, baka di unu yere a tru boskopu, dati na a bun nyunsu taki unu o kisi frulusu. Baka di unu bigin bribi, dan Gado poti a santa yeye di a pramisi unu leki wan stampu na un tapu nanga yepi fu Krestes.
14 A santa yeye disi na wan dyaranti taki wi o kisi wan gudu. Na so Gado en eigi pipel o kon fri nanga yepi fu wan lusu-paiman, so taki a kan kisi prèise nanga glori.
15 Mi yere taki unu e bribi na ini Masra Yesus. Disi de fu si na a fasi fa unu e libi nanga ala den santawan. Na fu dati ede mi tu
16 e tan taki Gado tangi gi unu. Ala ten mi e taki fu unu na ini den begi fu mi,
17 so taki a Gado fu wi Masra Yesus Krestes, a Tata di abi ala glori, kan gi unu koni èn a kan meki unu frustan den sani di a tyari kon na krin te unu e teki soifri sabi fu en.
18 A opo un ati, so taki unu kan si san na a howpu gi den wan di Gado kari èn san na a kefalek bigi gudu di a sreka gi den santawan.
19 Unu o si tu fa a kefalek bigi makti fu en e wroko na ini a libi fu wi di e bribi. A bigi krakti fu en de fu si na a fasi fa a e gebroiki en makti
20 di a gi Krestes wan opobaka èn di a poti en sidon na en reti-anusei na ini hemel.
21 A poti Krestes moro hei leki ala tirimakti, ala hei makti, ala krakti, nanga a makti fu ala heihei sma, èn a gi en wan nen di bigi moro ala tra nen, no soso na ini a grontapu disi, ma sosrefi na ini a wan di o kon.
22 Sosrefi, a poti ala sani na en ondro èn a meki a tron edeman fu ala sani di abi fu du nanga a gemeente
23 di de en skin. A gemeente disi abi ala den fasi fu en èn Krestes e meki ala sani de bun dorodoro.
