Gi den Filipisma 1:1-30
1 Mi, Paulus, de nanga Timoteyus èn wi de srafu fu Krestes Yesus. Mi e skrifi ala den santawan di de bakaman fu Krestes Yesus èn di de na Filipi, makandra nanga den brada di e teki fesi na ini a gemeente nanga den dinari ini a diniwroko.
2 Meki Gado wi Tata nanga Masra Yesus Krestes sori unu bun-ati. Meki a freide fu den de nanga unu.
3 Ala ten te mi e prakseri unu, mi e taki mi Gado tangi
4 na ini den fayafaya begi di mi e begi gi un alamala. Ibri leisi te mi e begi gi unu fayafaya, mi e du dati nanga prisiri,
5 bika sensi a fosi dei di unu yere a bun nyunsu, unu horibaka gi en teleki now.
6 Wan sani mi sabi: a sma di bigin du wan bun wroko na un mindri, o go doro nanga a wroko dati, teleki a klari en na a dei fu Yesus Krestes.
7 A fiti srefisrefi taki mi e denki so fu un alamala, fu di mi e tyari unu na ini mi ati. Iya, unu na den sma di Gado sori bun-ati neleki fa a sori mi bun-ati. Disi a du, aladi mi de na strafu èn aladi mi e opo taki gi a bun nyunsu èn e du ala san mi man fu meki lanti gi wi a reti fu preiki.
8 Gado sabi fa mi e angri fu si un alamala, fu di mi lobi unu trutru neleki fa Krestes Yesus lobi unu.
9 Mi e tan begi taki unu kan sori lobi moro nanga moro. Iya, mi e begi taki unu kan kon sabi finifini san na den tru tori fu Gado èn taki unu kan frustan krin san na a wani fu Gado.
10 Mi e begi tu taki unu kan kon sabi san na den moro prenspari sani. Na so fasi sma no o man feni fowtu na un tapu èn unu no o meki trawan fadon teleki a dei fu Krestes.
11 Boiti dati, Yesus Krestes o man yepi unu fu du san reti, unu heri libi langa. Dan unu kan gi Gado glori èn prèise en.
12 Mi brada, now mi wani taki unu sabi taki den sani di miti mi, ben meki a bun nyunsu go na fesi.
13 Na so fasi ala den waktiman fu Grankownu nanga ala tra sma kon sabi taki mi de na strafu, fu di mi na wan bakaman fu Krestes.
14 We, furu fu den brada di e dini Masra kisi moro frutrow, fu di mi de na strafu. Den kon abi moro deki-ati fu taki fu a wortu fu Gado sondro frede.
15 A tru taki wan tu sma e preiki fu Krestes, fu di den e dyarusu èn fu di den lobi strei. Ma trawan e preiki nanga bun prakseri.
16 Den wan di e preiki fu Krestes nanga bun prakseri, e du dati fu di den abi lobi. Den sabi taki mi de dyaso fu opo taki gi a bun nyunsu.
17 Ma den trawan e preiki fu di den lobi meki trobi. Den no e preiki nanga wan krin ati, bika den wani meki mi kisi problema na strafu-oso.
18 San na a bakapisi? We, a wan-enkri bakapisi na taki sma e preiki fu Krestes na ala sortu fasi, awinsi den e du en na wan hoigri fasi noso nanga wan krin ati. Toku a sani disi e gi mi prisiri. Fu taki en leti, mi o tan de nanga prisiri tu,
19 bika mi sabi taki disi o meki mi kisi frulusu fu di unu e begi fayafaya gi mi èn fu di Yesus Krestes e horibaka gi mi nanga a yeye fu en.
20 Mi e howpu èn e fruwakti nanga mi heri ati taki mi no o kisi syen kwetikweti. Ma fu di mi e taki fri sondro fu frede, meki Krestes e kisi glori now, soleki fa dati ben e pasa ala ten kaba. Iya, mi* o gi en glori, awansi mi e libi, noso awansi mi dede.
21 Sobun, efu mi e libi, dan mi e libi gi Krestes èn efu mi dede, dan mi wini.
22 We, efu mi musu tan libi leki libisma, dan dati de a bakapisi fu san mi du. Toku mi no e taki sortuwan fu den mi wani.
23 A tranga gi mi fu taki sortuwan fu den tu sani disi mi wani, bika mi e angri fu kon fri, so taki mi kan de nanga Krestes. Mi de seiker taki dati bun moro ala tra sani.
24 Ma a moro bun fu mi tan libi leki libisma fu unu ede.
25 Fu di mi e frustan disi heri bun, meki mi sabi taki mi o tan libi leki libisma èn taki mi o de nanga un alamala fu kan yepi unu fu go na fesi èn fu firi a prisiri di abi fu du nanga a bribi fu unu.
26 Na so fasi unu di de bakaman fu Krestes Yesus, kan breiti pasa marki te mi de baka nanga unu.
27 Ma tyari unsrefi nomo na wan fasi di fiti a bun nyunsu fu Krestes, so taki awansi mi kon èn mi si unu, noso awansi mi no de nanga unu, mi kan yere fa a e go nanga unu. Na so mi kan kon sabi taki unu e tanapu kánkan, taki unu abi wán denki èn taki unu e feti sei na sei leki wán man gi a bribi di unu kisi di unu yere a bun nyunsu.
28 Na nowan enkri fasi den feanti fu unu musu meki unu kon frede. Den sani disi e sori krin taki den o kisi pori, ma taki unu o kisi frulusu. Na Gado tyari disi kon na krin,
29 bika na unu kisi a grani fu no bribi nomo na ini Krestes, ma fu pina tu fu en ede.
30 Soleki fa unu e si, unu e feti a srefi feti di mi e feti, èn now unu yere taki mi e feti a feti disi te now ete.
Futuwortu
^ Grikitongo: „mi skin.”
