Gi den Filipisma 3:1-21
3 Te fu kaba, mi brada, tan prisiri fu Masra ede. Mi no abi trobi fu skrifi unu den srefi sani baka, fu di disi kan yepi unu fu wai pasi gi ogri.
2 Luku bun nanga den dagu. Luku bun nanga den sma di e du ogri. Luku bun nanga den sma di lobi besnèi trawan,*
3 bika wi na den wan di besnèi trutru, fu di Gado en yeye e yepi wi fu du a wroko fu Gado. Wi e meki bigi fu den sani di Krestes Yesus du èn wi no e frutrow na tapu libisma sani,
4 aladi mi, moro leki iniwan sma, ben kan frutrow na tapu libisma sani.
Efu tra sma de di denki taki den kan frutrow tapu libisma sani, dan mi kan du dati moro srefi.
5 Mi besnèi na tapu a di fu aiti dei. Mi na wan sma fu Israel fu a lo fu Benyamin, wan Hebrewsma. Mi papa nanga mama ben de Hebrewsma tu. Te yu luku a fasi fa mi ben e hori a wèt, dan mi ben de wan Fariseiman.
6 Mi ben de nanga faya so te, taki mi ben e frufolgu a gemeente srefi. Fu di mi ben e gi yesi na a wèt finifini, meki mi ben e du san reti. Dati meki sma no ben man feni fowtu na mi tapu.
7 Ma fu Krestes ede, meki mi kon si den sani di ben e tyari wini kon gi mi, leki soso sani.
8 Iya, fu dati ede mi kan taki dati mi e si ala sani leki soso sani trutru, fu di den sani di mi kon sabi fu Krestes Yesus, mi Masra, warti moro ala sani. Fu en ede mi drai baka gi ala den sani dati. Mi kon si den leki wan ipi doti, so taki Krestes kan feni mi bun.
9 Na so fasi mi kan de wán nanga en, no leki wan man di tron wan reti-ati sma fu di mi e gi yesi na a wèt, ma leki wan man di tron wan reti-ati sma fu di mi e bribi na ini Krestes. Iya, Gado e si mi leki wan reti-ati sma fu di mi abi bribi.
10 Mi wani kon sabi suma na Krestes èn san na a krakti fu na opobaka fu en. Mi wani kon sabi tu san a wani taki fu pina neleki fa en ben e pina èn dede leki fa en dede,
11 fu si efu mi man de wan fu den fosiwan di o opo baka.
12 A no de so, taki mi kisi kaba san mi e fruwakti, noso taki mi no abi sondu moro. Ma mi e du muiti fu si efu mi kan grabu a sani hori tu gi san Krestes Yesus ben teki mi.
13 Brada, mi no e denki fu misrefi taki mi grabu en hori kaba. Ma wán sani de seiker: Mi frigiti den sani di de na mi baka èn mi e meki tranga muiti fu lon go miti den sani di de na mi fesi.
14 Dati meki mi e lon nanga a marki fu kisi a pai fu Gado. Dati na a libi na ini hemel. Gado meki Yesus Krestes kari mi fu gi mi a libi disi.
15 We dan, meki wi alamala di kon lepi kaba, abi a denki disi. Efu unu e denki pikinso tra fasi srefi, dan Gado o sori unu san na a yoisti denki di un musu abi.
16 Ma awansi fa a no fa, efu a de so taki wi go na fesi kaba, dan meki wi tan go na fesi na a srefi fasi.
17 Brada, un alamala musu teki na eksempre fu mi. Tan luku den wan di e sori taki den e teki na eksempre di wi gi unu,
18 bika yu abi furu sma di mi ben taki fu den someni leisi kaba, ma now mi e krei te mi e taki fu den, fu di den e tyari densrefi leki feanti fu a pinapostu fu Krestes.
19 Den o dede te fu kaba. Den bere na den gado. Den e meki bigi fu sani di den ben musu syen fu den. Na soso grontapu sani den e prakseri.
20 Ma a presi pe wi o tan, de na hemel. Wi e wakti fayafaya fu wan frulusuman, Masra Yesus Krestes, di o komoto fu a presi dati.
21 A o gebroiki a bigi krakti fu en fu kenki a lagi skin fu wi, so taki a kan kon gersi a tumusi moi skin fu en. Na so a e poti ala sani na en ondro.
Futuwortu
^ Grikitongo: „kotikoti a skin.”
