Gi den Galasiasma 1:1-24
1 Mi, Paulus, na wan apostel. A no libisma poti mi èn a no libisma gi mi a grani disi. Ma na Yesus Krestes èn Gado a Tata di gi en wan opobaka, gi mi a grani disi.
2 Mi nanga ala den brada di de nanga mi, e skrifi den gemeente fu Galasia a brifi disi:
3 Meki Gado wi Tata èn Masra Yesus Krestes sori unu bun-ati, èn meki den sorgu taki ala sani waka bun gi unu.
4 Krestes gi en libi fu puru den sondu fu wi, so taki a kan frulusu wi fu na ogri grontapu disi, soleki fa wi Gado èn Tata wani.
5 Na en musu kisi glori fu têgo, iya, fu ala ten. Amen.
6 A e fruwondru mi taki nownow kaba unu e gowe libi a sma di kari unu nanga a bun-ati fu Krestes, èn taki unu bigin arki wan tra sortu bun nyunsu.
7 Ma nowan tra bun nyunsu de. Toku son sma e tyari bruya kon na un mindri èn den wani drai a bun nyunsu di abi fu du nanga Krestes.
8 Fluku musu kon na tapu a sma di fruteri unu wan bun nyunsu di de tra fasi leki a bun nyunsu di wi fruteri unu, awinsi na wisrefi, noso wan engel fu hemel.
9 Wi ben taki en kaba èn now mi e taki en ete wan leisi: Efu wan sma e fruteri unu wan bun nyunsu di de tra fasi leki san unu e bribi kaba, dan fluku musu kon na en tapu.
10 Suma musu feni mi bun? Libisma noso Gado? Na libisma mi wani plisi? Efu mi ben e plisi libisma ete, dan mi no ben o de wan srafu fu Krestes.
11 Ma brada, mi wani meki unu sabi taki a bun nyunsu di mi fruteri unu a no wan sani fu libisma.
12 A no libisma gi mi en èn a no den leri mi, ma na Yesus Krestes tyari en kon na krin gi mi.
13 A no de fu taki dati unu yere fa mi ben tyari misrefi fosi na ini a Dyu bribi. Na wan ogri-ati fasi mi ben e frufolgu a gemeente fu Gado èn mi ben e pruberi fu puru en na pasi.
14 Mi ben go na fesi na ini a Dyu bribi, moro leki furu fu mi speri na mindri mi pipel, bika mi ben du furu muiti fu hori den gwenti fu den tata fu mi.
15 Ma Gado, di meki mi gebore èn di kari mi fu di a abi bun-ati, ben feni en bun
16 fu gebroiki mi fu fruteri den trakondre sma a bun nyunsu, so taki den kan sabi en Manpikin. Di a gebroiki mi fu du dati, mi no go suku rai na nowan libisma.
17 Mi no go tu na Yerusalem na den wan di ben de apostel fosi mi, ma mi go na Arabia, dan mi drai kon baka na Damaskus.
18 Baka dri yari, mi go na Yerusalem fu go luku Seifas, dan mi tan tinafeifi dei nanga en.
19 Ma mi no si nowan fu den tra apostel, boiti Yakobus, a brada fu Masra.
20 Gado srefi e si taki a no lei mi e skrifi unu.
21 Baka dati mi go na den kontren fu Siria nanga Silisia.
22 Ma den Kresten gemeente fu Yudea no ben sabi mi ete.
23 Den ben yere sma e taki nomo: „Now a man di ben e frufolgu wi, e fruteri a bun nyunsu fu a bribi di a ben wani puru na pasi.”
24 Ne den bigin gi Gado glori fu mi ede.
