Gi den Galasiasma 5:1-26
5 Krestes meki wi kon fri, so taki wi kan kon fri na a fasi dati. Fu dati ede, tanapu kánkan èn no meki sma poti unu baka na ini katibo.
2 Iya, mi, Paulus, e taigi unu taki efu unu o besnèi, dan Krestes no sa abi nowan wini gi unu.
3 Ete wan leisi mi e taigi ibri sma di wani besnèi, taki a musu du ala sani di a Wèt e taki.
4 Efu unu du san a Wèt e taki fu di unu e denki taki na so Gado o si unu leki reti-ati sma, dan unu prati fu Krestes èn a no o sori unu bun-ati moro.
5 Wi e wakti fayafaya fu Gado si wi leki reti-ati sma. Disi man soso nanga yepi fu a santa yeye èn te wi abi bribi.
6 Gi den sma di de wán nanga Krestes Yesus, a no prenspari efu den besnèi noso efu den no besnèi. Ma a sani di de prenspari na a bribi di den e sori fu di den abi lobi.
7 Unu ben e lon bun. Suma meki taki unu no e gi yesi moro na a tru leri?
8 A no Gado di kari unu meki unu du disi.
9 Na pikinso srudeki nomo e meki a blon sweri.
10 Mi de seiker taki unu di de wán nanga Masra, no sa go denki tra fasi. Ma a sma di e tyari bruya kon sa kisi a strafu di a musu kisi, awansi suma na en.
11 Ma brada, efu mi e preiki ete taki un musu besnèi, dan fu san ede mi e kisi frufolgu ete? Efu mi ben preiki dati ete, dan a pinapostu no ben o meki sma naki futu fadon.
12 Mi winsi taki den man di e pruberi fu meki unu tweifri na ini a tori disi, ben o koti a syenpresi fu den puru tu.
13 Brada, Gado kari unu fu de fri. Ma un no musu teki disi leki wan okasi fu du san a sondu skin wani. Na presi fu dati un musu dini makandra leki srafu fu di un lobi makandra.
14 Bika a heri Wèt kan poti na ini wán komando nomo: „Yu musu lobi tra sma leki fa yu lobi yusrefi.”
15 Ma efu unu e tan feti nanga makandra èn e du hati sani nanga makandra, dan un musu luku bun taki unu no kiri makandra.
16 Ma mi e taigi unu: Tan du san a yeye wani, dan unu no sa du nowan sani di a sondu skin wani.
17 Bika a sondu skin de teige a yeye, èn a yeye de teige a sondu skin. Den e gens makandra èn fu dati ede unu no e du den sani di unu wani du.
18 Boiti dati, efu a yeye e tiri unu, dan a Wèt no abi krakti na unu tapu moro.
19 Iya, den sani di a sondu skin e du de krin fu si. Den sani disi na hurudu, fasi fu libi di no krin, ogri di sma e du sondro fu syen,
20 na anbegi fu falsi gado, afkodrei, feantifasi, kesekese, dyarusu, faya-ati, trobi, pratifasi, falsi leri,
21 bigi-ai, a drungu di sma e drungu, bradyari fesa, èn tra sani leki den sortu sani disi. Na gi den sani disi mi e warskow unu na fesi, neleki fa mi ben warskow unu kaba taki den sma di gwenti du den sani disi, no o kisi a Kownukondre fu Gado.
22 Na a tra sei, den fasi di a yeye e meki sma kisi* na lobi, prisiri, freide, langa pasensi, switifasi, bun-ati, bribi,
23 safri-ati, a dwengi di wan sma man dwengi ensrefi. Nowan wèt e krutu den sani disi.
24 Den sma di de fu Krestes Yesus ben spikri a sondu skin fu den na a postu, makandra nanga den firi èn den lostu fu den.
25 Efu wi e meki a yeye tiri wi libi, dan meki wi tan waka tu na wan fasi di fiti, soleki fa a yeye wani.
26 Wi no musu go denki tumusi furu fu wisrefi, so taki wi e go strei nanga makandra èn so taki wi e dyarusu na tapu makandra.
Futuwortu
^ Grikitongo: „a froktu fu a yeye . . .”
