Genesis 49:1-33
49 Bakaten Yakob kari den manpikin fu en, dan a taki: „Un kon na wán, so taki mi kan fruteri unu san o pasa nanga unu na ini a ten di e kon.
2 Un manpikin fu Yakob, un kon makandra èn arki. Iya, arki san un papa Israel abi fu taki.
3 Ruben, yu na mi fosi pikin, a krakti fu mi èn a fosiwan fu ala mi pikin. Yu ben abi biginen èn yu ben abi moro makti leki den trawan.
4 Yu no ben dwengi den firi fu yu, ma yu ben tyari yusrefi leki wan krasi liba. Sobun, yu no o kon bigi moro den brada fu yu, fu di yu go didon na tapu yu papa bedi. Na a ten dati yu doti mi bedi. Iya, a go didon na mi bedi!
5 Simeon nanga Leifi na brada. Den fetisani fu den na wrokosani di den gebroiki fu kiri sma.
6 No meki mi tron wan mati fu den. No meki mi moksi nanga den, so taki mi no lasi a grani fu mi, bika nanga atibron den kiri mansma. Nanga prisiri den ben koti a bakafutu-titei fu den mankaw.
7 Mi e fluku na atibron fu den, bika na dati meki den du ogri-ati sani. Mi e fluku a faya-ati fu den, bika na dati meki den du bigi ogri. Mi o meki den famiri fu den go libi na difrenti presi na ini a kondre fu Yakob. Mi o panya den go na ala sei fu a kondre Israel.
8 Ma yu, Yuda, den brada fu yu o prèise yu. Yu o kisi okasi fu wini den feanti fu yu. Den manpikin fu yu papa o boigi gi yu.
9 Yuda de leki wan pikin lew. Mi boi, baka te yu kiri wan meti èn yu nyan en, dan yu o gowe fu drape. Neleki wan lew, a e kron en baka èn a e hari lesi. Wan lew, suma e prefuru fu wiki en?
10 A kownutiki no o komoto na Yuda sei èn a tiriman-tiki no o komoto na mindri en futu teleki Silo kon. Ala pipel o gi yesi na en.
11 A o tai a buriki fu en na wan droifibon èn a pikin fu en buriki a o tai na a moro bun droifibon. A o wasi den krosi fu en na ini win èn a dyakti fu en a o wasi na ini a redi watra fu droifi.
12 Den ai fu en redi srefisrefi fu a win di a dringi èn den tifi fu en weti fu a merki di a dringi.
13 Seibulon o libi na a sesyoro èn a o tan na a lanpe pe sipi e kon. A moro farawe pisi fu a kontren fu en o de na a sei fu Sidon.
14 Isaskar de leki wan buriki di abi tranga bonyo èn di e didon na mindri den tu saka fu wan sadri.
15 A o si taki a tanpe fu en bun èn taki a kondre switi. A o tyari lai na tapu en skowru èn a o abi fu wroko tranga leki wan srafu.
16 Leki wan fu den lo fu Israel, mi manpikin Dan o krutu en pipel.
17 Meki Dan de leki wan sneki na seipasi, leki wan takrusneki na sei wan futupasi, wan sneki di e beti na asi na en bakafutu, so taki a sma di e rèi en, fadon go nanga baka.
18 Yehovah, na yu mi o wakti fu frulusu mi.
19 We Gad, wan grupu ogri-ati fufuruman o kon feti nanga en. Ma a o hari go na den baka fu feti nanga den wan di de na bakasei.
20 Aser o abi furu nyanyan. A o sorgu gi nyanyan di fiti wan kownu.
21 Naftali na wan moi umadia di gaw. A e taki wortu di switi fu yere.
22 Yosef na wan sproiti fu wan bon di e gi furu froktu, wan bon di e gi furu froktu èn di prani na wan watra-olo. Den taki fu en e gro abra a ston skotu.
23 Ma den sma di sabi sutu bo ben e tan onti Yosef èn den ben e sutu peiri kon na en tapu. Den ben e tan si Yosef leki wan feanti fu den.
24 Ma toku a bo fu en no ben e komoto na en presi. Den anu fu en no ben lasi krakti èn den ben man du sani esi-esi. A Skapuman, a Ston fu Israel, ben e kisi en krakti fu a Maktiwan fu Yakob.
25 Yosef komoto fu a Gado fu yu papa èn na Gado o yepi yu. En de nanga na Almaktiwan èn a o blesi yu nanga watra di e saka komoto fu hemel èn nanga watra di e komoto na ondro gron. A o blesi yu nanga furu pikin èn nanga furu meti.
26 Den blesi fu yu papa o bun moro den bun sani di e komoto na den bergi di e tan fu têgo èn moro den gudu na den pikin bergi di e tan fu ala ten. Yosef, a sma di teki puru na mindri den brada fu en, o tan kisi den blesi disi.*
27 Benyamin o tan priti a nyanyan fu en na pisipisi neleki wan busidagu. Na mamanten a o nyan a meti di a kisi èn na neti a o prati a gudu di a feni.”
28 Na fu den man disi den twarfu lo fu Israel o komoto èn disi na san a papa fu den taigi den di a blesi den. A blesi ibriwan fu den nanga wan blesi di ben fiti den.
29 Baka dati a taigi den den sani disi: „Mi o go rostu neleki den afo fu mi. Beri mi na ini a bergi-olo pe mi papa nanga mi granpapa beri, na a gron fu Efron, a man fu Hèt.
30 A bergi-olo disi de na a gron na Makpela, na abrasei fu Mamre na ini a kondre Kanan. Abraham ben bai a gron disi fu Efron, a man fu Hèt, so taki a ben kan gebroiki en leki grebi.
31 Na drape Abraham nanga en wefi Sara beri. Na drape Isak nanga en wefi Rebeka beri èn na drape mi beri Lea.
32 A gron nanga a bergi-olo di de drape, bai fu den bakapikin fu Hèt.”
33 Na so Yakob kaba taigi den manpikin fu en den sani disi. Ne a hari den futu fu en poti na tapu en bedi. Baka dati a hari en lasti bro èn a go rostu neleki den afo fu en.
Futuwortu
^ Hebrewtongo: „Den blesi o tan na tapu na ede fu Yosef.”
