Habakuk 3:1-19
3 Disi na a begi fu a profeiti Habakuk di a singi leki wan sari singi:
2 „Yehovah, mi ben yere fu yu. Yehovah, mi kon frede di mi yere san yu du.
Te a ten fu yu doro,* yu musu du dati baka! Te a ten fu yu doro, yu musu meki sma kon sabi san yu du. Te yu ati e bron, yu no musu frigiti fu sori sari-ati.
3 Ne Gado srefi komoto fu Teiman. Iya, wan Santawan komoto fu Paran-bergi. Sela.*
A glori fu en tapu heri hemel èn na heri grontapu sma e prèise en.
4 A leti fu en ben e skèin leki a leti fu a son. Tu faya ben e skèin komoto fu en anu èn na drape a krakti fu en ben de.
5 Ala sortu takru siki ben e waka na en fesi èn hebi korsu ben e waka na en baka.
6 Ne a tan tanapu fu seki grontapu. Na luku a luku nomo, dan den pipel bigin dyompo.
A masi den bergi di e tan fu ala ten. Den pikin bergi di e tan fu ala ten, boigi go na gron. Na so a e du sensi ten.
7 Mi si fa den tenti fu Kusan ben de na ini banawtu. Den tentikrosi fu a kondre Midian bigin bruya.
8 Yehovah, na bron yu ati ben bron nanga den liba noso a se? Yu ben e rèi na tapu den asi fu yu èn den asiwagi fu yu ben tyari frulusu kon.
9 A bo fu yu kon de krin fu si. Den lo ben meki wan sweri. Sela. Nanga liba yu priti grontapu.
10 Di den bergi si yu, den kisi hebi pen. Dondru bari èn wan hebi sibibusi kon. A watra ondro gron ben meki furu babari. A opo en anu go na loktu.
11 A son nanga a mun tan tanapu na den presi na hemel. Yu peiri frei esi-esi leki faya di e koti na hemel. Yu lansri e brenki so te, taki a e skèin leti.
12 Nanga atibron yu ben e waka na heri grontapu. Nanga atibron yu masi den pipel neleki fa sma e masi aleisi.
13 Yu go fu frulusu yu pipel. Yu go fu frulusu a salfuwan fu yu. Yu masi na edeman fu na oso fu na ogriwan. Yu broko a heri oso, fu a daki te na gron, so taki a fondamenti kon de fu si. Sela.
14 Di den fetiman fu en lon kon na mi tapu leki wan bigi winti, den ben wani yagi mi go na ala sei. Den ben e bari fu prisiri neleki den sma di e luru na wan kibripresi teleki den kisi den mofinawan fu pina den. Ma dan yu boro na ede fu den nanga den eigi fetisani.
15 Nanga den asi fu yu, yu waka na ini a se, na ini dipi watra.
16 Di mi yere ala den sani disi, mi bere bigin trubu. Di mi yere a boskopu, mi mofobuba bigin beifi. Mi bonyo bigin pori gowe. Ne mi bruya, fu di mi ben e frede. Ma toku mi o tan pî, aladi mi e wakti a dei fu banawtu. A dei dati o kon leki wan man di kon fu feti nanga a pipel.
17 Kande den figabon no o gi figa èn den droifibon no o abi froktu. Kande den olèifbon no o gi bun froktu èn den gron no o gi nyanyan. Kande skapu no o de na ini den skapupen moro èn kaw no o de na ini den kawpen moro.
18 Toku mi o de nanga bigi prisiri fu Yehovah ede. Mi o prisiri nanga a Gado di o frulusu mi.
19 A Moro Hei Masra Yehovah na a sma di e gi mi krakti. A o meki mi futu kon de leki den di fu dia. A o meki mi waka na tapu hei presi.”
Gi a fesiman. A singi disi musu prei
nanga den pokusani fu mi di gersi harpu.
Futuwortu
^ Hebrewtongo: „Na mindri fu den yari.”
^ Kande a wortu disi wani taki dati den singiman musu tan pî wan pisi ten, aladi a poku e prei go doro.
