Gi den Hebrewsma 10:1-39
10 A Wèt na soso wan skaduw fu den bun sani di musu kon ete, ma a no de a trutru sani srefi. Dati meki den srakti-ofrandi di libisma e tyari ibri yari, noiti no kan meki sma di e anbegi Gado, kon de sondro sondu.
2 Efu dati ben de so, dan a no ben o de fanowdu moro taki sma e tyari srakti-ofrandi, bika den sma di e du santa wroko ben o de krin fu ala ten. Den no ben o sabi moro san na sondu.
3 Ma disi no de so, bika ibri yari den srakti-ofrandi disi e meki sma memre den sondu fu den,
4 fu di a brudu fu mankaw nanga bokoboko no man puru sondu.
5 Sobun, di Krestes ben kon na grontapu, a taigi Gado: „’Yu no ben wani srakti-ofrandi nanga tra sortu ofrandi, ma yu ben sreka wan skin gi mi.
6 Yu no ben prisiri nanga bron-ofrandi noso sondu-ofrandi.’
7 Ne mi taki: ’Luku, mi kon. Na ini a bukulolo den skrifi fu mi. Mi Gado, mi kon fu du yu wani.’”
8 A ben taki: „Yu no ben wani srakti-ofrandi, tra sortu ofrandi, bron-ofrandi, nanga sondu-ofrandi èn yu no ben prisiri nanga den.” Sma e tyari den ofrandi disi soleki fa a Wèt e taki.
9 Baka dati a taki: „Luku, mi kon fu du yu wani.” A e puru a sani di ben de fosi fu kan seti wan tra sani.
10 Na a „wani” fu Gado di den e taki fu en dyaso, meki wi kon santa, fu di Yesus Krestes gi en skin leki wan ofrandi wán leisi nomo fu ala ten.
11 Sosrefi ibri priester e go tanapu na en presi fu du a wroko fu en ibri dei baka èn fu tyari den srefi ofrandi furu tron. Ma noiti den sortu ofrandi disi man puru ala sondu.
12 Ma a man disi tyari wan srakti-ofrandi gi sondu wán leisi nomo fu ala ten èn a go sidon na a reti-anusei fu Gado.
13 Sensi a ten dati, a e wakti teleki Gado meki den feanti fu en tron leki wan bangi gi en futu,
14 bika nanga wán srakti-ofrandi a puru a sondu fu den sma di e kon santa. A du dati fu ala ten.
15 Boiti dati, a santa yeye e taigi wi krin tu taki disi de so. A ben taki:
16 „’Disi na a frubontu di mi o meki nanga den baka a ten dati’, na so Yehovah taki. ’Mi o poti mi wèt na ini den ati èn mi o skrifi den na ini den frustan.’”
17 Baka dati a yeye e taki: „Mi no o memre den sondu nanga den ogri fu den kwetikweti moro.”
18 We, te wan sma kisi pardon fu den sondu disi, dan a no de fanowdu moro fu tyari ofrandi fu tapu sondu.
19 We dan, un brada, a brudu fu Yesus e meki taki wi no abi fu frede moro fu teki a pasi di e go na ini a santa presi.
20 Di a pasa a garden go na inisei, a opo wan nyun pasi gi wi di e tyari wi go na libi. A garden dati na en skin.
21 Fu di wi abi wan priester tu di de moro hei èn di e tiri na oso fu Gado,
22 meki wi musu anbegi Gado nanga wan krin ati èn wi musu abi wan tranga bribi, fu di a krin wi ati,* so taki wi no abi wan takru konsensi moro. A wasi wi skin nanga krin watra.
23 Meki wi tan fruteri sma fu a howpu fu wi sondro fu tweifri, bika wi kan bribi a sma di pramisi wi den sani disi.
24 Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko.
25 Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei.
26 Efu wi tan du sondu fu espresi, baka di wi kon sabi a tru leri finifini kaba, dan nowan srakti-ofrandi no de moro fu tapu den sondu fu wi.
27 Na presi fu dati wi kan fruwakti taki wi o kisi krutu na wan fasi di takru srefisrefi èn taki nanga bigi atibron Gado o kiri den wan di e gens en.
28 Te wan sma wisiwasi a wèt di Gado gi Moses, dan a sma disi musu dede sondro taki sma firi sari gi en, efu tu noso dri sma taki dati a wisiwasi a wèt trutru.
29 We, kon meki wi taki dati wan sma trapu a Manpikin fu Gado nanga en futu èn taki a si en leki wan pikin sani taki a brudu fu a frubontu meki en kon santa, noso taki a no abi nowan lespeki gi a yeye fu Gado di e sori sma a bun-ati fu en. Yu no denki taki so wan sma o kisi moro hebi strafu?
30 Wi sabi a sma di ben taki: „Na mi o puru atibron na den tapu. Mi o pai den baka gi den ogri di den du.” A ben taki tu: „Yehovah o krutu en pipel.”
31 A de wan tumusi takru sani fu fadon na ini na anu fu a libilibi Gado.
32 Ma tan prakseri den dei fu fositen, fa unu horidoro èn fa unu pina fu di furu tesi ben miti unu, baka di unu ben kon frustan sani moro krin.
33 Son leisi sma ben e gi unu syen na fesi trawan èn den ben e pina unu. Son leisi unu ben e horibaka gi den wan di ben e ondrofeni den sani disi,
34 bika boiti taki unu ben e firi gi den brada di ben de na strafu-oso, dan unu ben e prisiri tu te sma ben e fufuru den sani fu unu, fu di unu sabi taki unu abi wan moro betre gudu di no e lasi gowe.
35 Sobun, tan taki sondro frede, fu di unu o kisi wan bigi pai fu dati,
36 bika a de fanowdu taki unu horidoro, so taki baka te unu du a wani fu Gado, unu kan kisi san a ben pramisi unu.
37 Ete „wan syatu pisi ten”, dan „a sma di e kon, o doro. A no o draidrai”.
38 „Ma a reti-ati futuboi fu mi o tan libi, fu di a abi bribi” èn „efu a e drai baka gi Gado fu di a e frede, dan mi* no o prisiri nanga en”.
39 We, wi a no sma di e drai baka gi Gado fu di wi e frede, bika a bakapisi fu dati na dede. Ma wi na sma di abi bribi, bika a bakapisi fu dati na taki wi o tan na libi.
Futuwortu
^ Grikitongo: „natinati”, dati wani taki natinati nanga a brudu fu Yesus.
^ Griki wortu: psuke. Luku „Moro sani”, nr. 8.
