Gi den Hebrewsma 12:1-29
12 We dan, efu someni kotoigi de na wi lontu neleki wan bigi wolku, dan meki wi puru ala hebi na wi tapu tu nanga a sondu di kan kisi wi makriki. Meki wi horidoro te wi e lon a streilon di wi musu lon ete,
2 aladi wi e poti ala wi prakseri na Yesus, a Moro Prenspari Fesiman fu wi bribi èn a sma di meki a bribi fu wi kon bun dorodoro. Na fu di a ben sabi taki prisiri ben e wakti en, meki a ben de klariklari fu dede na a pinapostu sondro fu broko en ede taki a ben o kisi syen. A go sidon na a reti-anusei fu a kownusturu fu Gado.
3 Iya, poti prakseri finifini na a sma di ben horidoro, srefi te sondari ben e taki ogri fu en, aladi na densrefi den ben e du ogri na a fasi dati. Na so fasi unu no o kon weri èn unu no o lasi-ati.
4 Na ini a feti di unu e feti nanga sondu, noiti unu ben abi fu feti teleki un brudu lon.
5 Boiti dati, unu frigiti krinkrin sortu rai unu leki manpikin ben kisi: „Mi manpikin, no si a strafu fu Yehovah leki wan pikin sani èn no lasi-ati tu te a e piri-ai gi yu,
6 bika Yehovah e strafu a sma di a lobi. Fu taki en leti, a e wipi ala sma di a e teki leki en manpikin.”
7 Un musu horidoro, so taki unu kan leri wan sani. Gado e si unu leki en manpikin. Sortu manpikin no e kisi strafu fu en papa?
8 Ma efu unu alamala no ben kisi a leri disi, dan trutru unu ben o de hurupikin. Unu no ben o de trutru manpikin.
9 Boiti dati, den libisma papa fu wi ben gwenti strafu wi fu leri wi wan sani èn wi ben e lespeki den. We dan, wi no musu de klariklari fu saka wisrefi na ondro a Tata moro ete èn libi? En na a Tata di e meki taki wi e libi leki sma di poti na wroko nanga a yeye fu en.
10 Den papa fu wi strafu wi wan syatu pisi ten nomo, soleki fa den ben denki taki a bun. Ma te Gado e strafu wi, a e du dati fu sani kan go bun nanga wi, so taki wi kan kon santa tu neleki en.
11 A tru taki te sma e kisi strafu, dan a no de wan prisiri sani na a momenti dati, ma a e hati. Ma bakaten den wan di e leri wan sani fu a strafu disi, e kisi blesi di e tyari freide kon èn den e du san reti.
12 Fu dati ede opo den anu di e anga èn meki den kindi di kon swaki, kon tranga baka.
13 Tan meki un pasi kon grati gi un futu, so taki a futu di malengri no komoto na en skrufu, ma taki a kon betre.
14 Du muiti fu libi bun nanga ala sma èn fu kon santa, bika nowan sma no o si Masra efu a no santa.
15 Ma luku bun taki nowan fu unu meki taki Gado no sori unu bun-ati moro. Luku bun taki nowan takru rutu gro kon, di kan tyari problema kon èn di kan pori furu sma.
16 Luku bun tu taki nowan huruman de na un mindri, noso wan sma di no e warderi santa sani, leki fa a ben de nanga Esau di a ben gi en reti leki fosi pikin na wan tra sma, soso fu kan kisi wán preti nyanyan,
17 bika unu sabi taki bakaten, di a ben wani a blesi, a no kisi en. Aladi a ben e krei watra-ai fu meki en papa kenki a bosroiti fu en, toku a no kisi a blesi.
18 Iya, unu no kon na wan sani di sma kan fasi, di e bron nanga faya, èn di abi blaka wolku nanga deki dungru na en lontu èn pe bigi winti e wai.
19 Unu no yere a babari fu trompeti nanga wan sten di ben e taki sani. Di a pipel yere a sten disi, den begi Moses fu a sten no taki moro nanga den,
20 bika den kon frede srefisrefi di den yere a komando: „Efu wan meti futu fasi a bergi, dan un musu ston en kiri.”
21 Boiti dati, a sani di den si, frede den so te, taki Moses taki: „Mi e frede, mi e beifi.”
22 Ma unu kon na a Sion-bergi, na a foto fu a libilibi Gado, a Yerusalem na hemel, èn na den dusundusun engel
23 di ben kon makandra, na a gemeente fu den fosi pikin fu Gado di nen skrifi na ini hemel. Unu kon na Gado di de Krutuman fu ala sma èn na a libi fu den reti-ati sma di poti na wroko nanga a santa yeye fu en èn di kon bun dorodoro.
24 Unu kon na Yesus, a mindriman fu wan nyun frubontu èn na a brudu di a ben gebroiki fu natinati wi. A brudu disi e taki na wan moro betre fasi leki a brudu fu Abel.
25 Luku bun taki unu no trangayesi a sma di e taki nanga unu. Den wan di ben trangayesi a sma di fruteri den den warskow di Gado ben gi sma na grontapu, no ben man wai pasi gi strafu. Sobun, wi no o man wai pasi gi strafu tu efu wi drai wi baka gi a sma di e taki komoto fu hemel.
26 Na a ten dati a sten fu Gado seki grontapu. Ma now a pramisi: „Mi o seki grontapu ete wan leisi. Ma a no grontapu wawan. Mi o seki hemel tu.”
27 We, den wortu „ete wan leisi”, e sori taki Gado o puru den sani di man seki (sobun, sani di Gado no ben meki), so taki den sani di no man seki, kan tan.
28 Fu dati ede, now di wi sabi taki wi o kisi wan kownukondre di no man seki, dan meki wi sorgu taki Gado tan sori wi bun-ati. Na dati o meki taki wi man du santa wroko gi Gado na wan fasi di a feni bun, fu di wi e frede en èn e lespeki en,
29 bika a Gado fu wi de leki wan faya di e bron sani krinkrin.
