Gi den Hebrewsma 3:1-19
3 Fu dati ede, un santa brada di kisi a kari tu fu go na hemel, poti prakseri na a sma di Gado seni kon,* a granpriester Yesus, a sma di wi e taki dati wi e bribi na ini en.
2 Ala ten a ben e tan gi yesi na a sma di poti en na wroko, neleki fa Moses ben e du na ini a heri oso fu Gado,
3 bika Yesus warti fu kisi moro glori leki Moses, fu di a sma di bow na oso e kisi moro grani leki na oso di a bow.
4 Iya, ibri oso abi wan sma di meki en, ma a sma di meki ala sani na Gado.
5 Moses ben de wan futuboi di ben e gi yesi ala ten na ini a heri oso fu Gado. Den sani di a ben du, ben de wan buweisi fu den sani di sma ben o taki fu den bakaten.
6 Ma Krestes, di de a Manpikin fu Gado, tan du ala sani di a ben musu du fu luku na oso fu en Tata. We, efu wi tan taki sondro frede, efu wi tan hori steifi na a howpu fu wi te na a kaba èn wi e prisiri nanga dati, dan wi na a oso fu Gado.
7 Na fu dati ede a santa yeye e taki: „Te unu e arki en sten tide,
8 dan un no musu meki un ati kon tranga, soleki fa a ben pasa wan leisi di sma ben meki mi kisi bigi atibron, di tesi ben kon na den tapu na ini a sabana.
9 Na a ten dati den afo fu unu tesi mi, aladi den si den sani di mi du gi den fotenti yari langa.
10 Fu dati ede mi ben tegu srefisrefi gi den sma dati. Mi ben taki: ’Ala ten den e drai baka gi mi na ini den ati èn den no kon sabi den pasi fu mi.’
11 Fu dati ede mi ben sweri na ini mi atibron: ’Den no o rostu leki mi.’”
12 Mi brada, luku bun taki nowan fu unu no hari unsrefi puru fu a libilibi Gado, so taki unu kon abi wan takru ati di no e bribi moro.
13 Ma tan gi makandra deki-ati ibri dei, solanga „Tide” no pasa ete, so taki nowan fu unu meki un ati kon tranga, fu di unu meki sondu bedrigi unu.
14 Soso te wi hori steifi na a bribi di wi ben abi biginbigin èn te wi tan du dati te na a kaba, wi kan tron sma di o du den srefi sani di Krestes e du.
15 A de leki fa sma e taki: „Te unu e arki en sten tide, dan un no musu meki un ati kon tranga, soleki fa a ben pasa wan leisi di sma ben meki a kisi bigi atibron.”
16 Suma na den sma di ben yere, ma di meki Gado kisi bigi atibron? A no ala den sma di Moses tyari komoto na ini Egepte?
17 Boiti dati, nanga suma Gado ben mandi srefisrefi fotenti yari langa? A no nanga den sma di ben sondu èn di dede na ini a sabana?
18 Fu suma Gado ben sweri taki den no ben o rostu leki en? A no fu den sma di ben trangayesi en?
19 Sobun, wi e si taki den no ben man rostu leki en, fu di den no ben abi bribi.
Futuwortu
^ Noso: „di de wan apostel.”
