Gi den Hebrewsma 6:1-20
6 Fu dati ede, now di wi leri den fosi sani kaba di abi fu du nanga Krestes, dan meki wi du ala muiti fu tron lepi sma. No meki wi poti wan fondamenti baka, fu di wi e go leri baka taki sma musu abi berow fu ala soso sani di den e du, taki den musu bribi na ini Gado,
2 noso taki difrenti sortu dopu de, taki sma e poti anu na tapu trawan, taki dede sma o kisi wan opobaka èn taki sma o kisi têgo krutu.
3 Efu Gado gi wi na okasi, dan wi o meki ala muiti fu tron lepi sma.
4 We, nowan enkri fasi de fu meki sma kisi berow baka, te den ben kon frustan sani krin wan leisi kaba, te den ben kon sabi kaba san na a fri presenti fu hemel, te den ben kisi a santa yeye,
5 te den ben ondrofeni kaba san na a bun leri fu Gado èn te den ben kon sabi kaba sortu blesi* den o kisi na ini a ten di e kon.
6 Den sma disi gowe libi a bribi, fu di densrefi e spikri a Manpikin fu Gado na wan postu ete wan tron èn den e gi en syen na fesi ala sma.
7 Te wan gron e soigi na alenwatra di e nati en furu tron, so taki a gron e meki sani gro di bun gi den sma di wroko en, dan Gado e blesi en.
8 Ma te takru wiwiri nanga makabon e gro na a gron, dan sma no o wani en èn a no o teki langa fosi den fluku en. Te fu kaba, den o bron en.
9 Ma un lobiwan, aladi wi e taki na a fasi disi, toku wi sabi taki sani e go moro bun nanga unu leki nanga den wan di gowe libi a bribi. Unu e du sani di o meki taki Gado frulusu unu,
10 bika Gado no e du sani di no reti. Dati meki a no o frigiti a wroko di unu du nanga a lobi di unu sori gi a nen fu en, fu di unu ben dini den santawan èn unu e tan dini den te now ete.
11 Ma wi ben sa wani taki ibriwan fu unu tan wroko fayafaya soleki fa unu gwenti du, so taki unu kan de seiker fu a howpu te na a kaba.
12 Na so fasi unu no o kon lesi, ma unu o teki na eksempre fu den sma di kisi den sani di Gado pramisi den, fu di den ben abi bribi èn fu di den ben abi pasensi.
13 Bika di Gado pramisi Abraham wan sani, dan a sweri na ensrefi, fu di a no man sweri na wan sma di bigi moro en.
14 A ben taki: „Mi o blesi yu trutru. Mi o meki yu bakapikin kon furu.”
15 Sobun, baka di Abraham hori pasensi, a kisi a sani di Gado pramisi en.
16 Libisma e sweri na wan sma di bigi moro den èn a sweri fu den e koti ala trobi, fu di gi den, dati de wan dyaranti di e kruderi nanga a wèt.
17 Na so Gado meki wan sweri. A ben du dati di a ben bosroiti fu meki den sma di o kisi den sani di a pramisi den, kon si moro krin taki san a abi na prakseri fu du, no man kenki.
18 Na so fasi wi di lowe go na a kibripresi fu Gado, kan kisi furu deki-ati. Dati e yepi wi fu hori steifi na a howpu di Gado gi wi, bika tu sani de di no man kenki èn di e sori taki Gado no man lei kwetikweti.
19 A howpu fu wi de leki wan ankra gi wi libi. A tranga èn a e hori wi tanapu. A howpu disi e tyari wi pasa a garden go na inisei,
20 pe wan sma ben go na inisei fosi wi, gi a bun fu wi. A sma dati na Yesus di tron wan granpriester fu têgo, neleki Melkiseidek.
Futuwortu
^ Grikitongo: „krakti.”
