Hosea 11:1-12
11 „Di Israel ben de wan boi, mi ben lobi en. Mi kari mi manpikin komopo na Egepte.
2 Sma ben e kari den Israelsma. Ma o moro sma ben e kari den, o moro den ben e gowe libi den sma dati. Den ben e tyari srakti-ofrandi gi den Bâal-popki èn smoko-ofrandi gi den tra popki di den ben e anbegi leki gado.
3 Ma na mi leri Efrayim fu waka. Nanga mi anu mi ben opo en, ma a no ben e si mi leki a sma di dresi en.
4 Nanga titei fu libisma, iya, nanga titei fu lobi mi ben e tyari mi pipel. Mi ben tron leki wan sma di e puru a tyatyari na den neki.* Na wan switi fasi mi tyari nyanyan gi ibriwan fu den.
5 Den no o drai go na Egepte. Asiria o tiri den, fu di den no wani drai kon baka na mi.
6 Fu di den abi takru sani na prakseri, meki wan feti-owru o pori den foto fu den. A o broko den sroto fu den foto èn a o kiri sma.
7 Mi pipel lobi fu trangayesi mi. Sma e kari den fu go na a Moro Heiwan, ma nowan fu den e opo du wan sani.
8 Fa mi kan gowe libi yu, Efrayim? Fa mi kan libi yu gi den feanti fu yu, Israel? Fa mi kan meki yu tron leki Adma? Fa mi kan du a srefi sani nanga unu leki san mi du nanga Sebowim? Mi kenki prakseri now. Mi o sori sari-ati gi unu.
9 Mi no o puru atibron na un tapu. Mi no o pori Efrayim baka, bika mi na Gado. Mi a no libisma. Mi na a Santawan na un mindri èn mi no o kon na un tapu nanga atibron.
10 A pipel o waka baka Yehovah. Leki wan lew a o bari. Te a o bari, den pikin fu en o komoto na west-sei èn beifibeifi den o kon na en.
11 Den o beifi leki wan fowru te den o komoto na Egepte. Leki wan doifi den o komoto na Asiria. Mi o meki den tan na ini den eigi oso”, na so Yehovah taki.
12 „Soso lei Efrayim e lei gi mi èn na soso bedrigi Israel e bedrigi mi. Ma Yuda e waka nanga Gado ete. Ala ten a e gi yesi na a Moro Santawan.”
Futuwortu
^ Noso: „kakumbe.”