Hosea 5:1-15
5 „Arki, un priester èn poti prakseri, un Israelsma. Meki den sma na ini na oso fu Kownu yere tu, bika un alamala o kisi krutu. Unu de wan trapu gi den sma na Mispa èn wan nèt di bradi na tapu Tabor.
2 Den sma di drai baka gi Gado srakti furu meti.* Ma mi tan warskow den alamala.
3 Mi sabi Efrayim heri bun èn nowan tori fu Israel kibri gi mi. Ma yu Efrayim, yu e libi now nanga den uma neleki den na huru-uma, èn Israel doti ensrefi.
4 Den sani di den e du meki taki den no man drai kon baka na a Gado fu den. Den lobi du hurudu èn den no e teri Yehovah srefi.
5 Na a bigifasi fu Israel meki taki sani no e waka bun gi den. Israel nanga Efrayim fadon, fu di den du sondu. Yuda srefi fadon makandra nanga den.
6 Nanga den skapu èn nanga den kaw fu den, den go suku Yehovah, ma den no man feni en. A gowe libi den.
7 Den drai baka gi Yehovah, bika den meki pikin nanga tra uma. Na ini wán mun nomo den o dede gowe nanga den sani fu den.
8 Bro wan tutu na Gibeya èn wan trompeti na Rama! Meki babari na Bet-Afen neleki te sma e go na feti. Benyamin, wi de na yu baka!
9 Ke Efrayim, sma o skreki te den si taki yu e kisi strafu. Mi fruteri den lo fu Israel san o pasa nanga den trutru.
10 Den granman fu Yuda tron leki sma di e skoifi den marki fu wan tra sma en gron. Neleki watra mi o kanti mi atibron na den tapu.
11 Sma e kwinsi Efrayim. Nanga reti den pina en, fu di a teki a bosroiti fu suku yepi na en feanti.
12 Mi o nyan Efrayim neleki fa uduworon* e nyan udu, èn mi o meki Yuda pori gowe neleki fa wan pisi udu e pori gowe.
13 Efrayim kon si taki a siki èn Yuda si taki a abi wan butsweri. Dan Efrayim go na Asiria èn a seni kari wan makti kownu. Ma a kownu srefi no ben man dresi Efrayim. A no ben abi nowan dresi gi a butsweri fu Yuda.
14 Neleki wan yongu lew mi o kon na Efrayim tapu. Mi o kon na den sma fu Yuda tapu neleki wan yongu lew di abi wiwiri na en bakaneki kaba. Mi o priti den na pisipisi, dan mi o tyari den gowe. Nowan sma o man frulusu den.
15 Mi o gowe. Mi o drai go baka na mi presi èn mi o tan drape, teleki den pai fu den ogri di den du. Dan den o kon suku mi. Te den de na ini bigi banawtu, den o suku mi.”
Futuwortu
^ Noso: „den kiri furu sma.”
^ A Hebrew wortu abi fu du nanga wan sortu pikin meti di e frei èn di e nyan krosi neleki kakalaka. Bakratongo: „mot.”
