Hosea 6:1-11
6 „Un pipel, grantangi, meki wi drai go baka na Yehovah, bika ensrefi priti wi na pisipisi, ma a o dresi wi. A tan naki wi, ma a o tai den soro fu wi.
2 Baka tu dei a o meki wi kon na libi baka. Na a di fu dri dei a o meki wi opo èn wi o libi na en fesi.
3 Dan wi o kisi sabi, iya, wi o du ala muiti fu kon sabi Yehovah. A o kon safrisafri neleki fa leti e kon te dei e broko. A o kon na wi neleki fa alen e fadon. A o kon neleki alen di e fadon na bakayari fu nati a gron.”
4 „Efrayim, san mi o du nanga yu? Èn san mi o du nanga yu, Yuda? A bun-ati fu unu de leki wolku na mamanten-yuru èn leki dow di e gowe esi-esi.
5 Fu dati ede, mi o gebroiki mi profeiti leki wan feti-owru fu kapu den, èn mi o kiri den nanga den sani di mi e taki. Mi o krutu den safrisafri neleki fa dei e broko.
6 Bika a no te wan sma tyari srakti-ofrandi gi mi, dan mi e prisiri, ma na te a e sori bun-ati. A no te sma e tyari heri bron-ofrandi gi mi, dan mi e prisiri, ma na te den sabi Gado.
7 Den de neleki den tra libisma, fu di den no hori a frubontu. Den drai baka gi mi na a presi pe den e tan.
8 Gilead na wan foto pe sma gwenti du ogri. Den e waka na ini brudu.
9 Fu taki en leti, den priester na ogri-ati fufuruman. Den de leki sma di e luru fu du trawan ogri. Iya, na soso ogri den e du. Dati meki den e kiri sma na seipasi na Sikem.
10 Mi si wan bun ogri sani na ini Israel. Na drape Efrayim e du hurudu. Israel doti ensrefi.
11 Mi poti wan spesrutu ten fu du kotiwroko na yu mindri, o Yuda. Mi o tyari unu kon na wán, neleki fa sma e tyari nyanyan kon na wán na a ten fu a kotiwroko. Mi o puru mi pipel na ini katibo èn mi o tyari den kon baka na ini a kondre fu den.”
