Hosea 7:1-16
7 „Na a ten di mi ben wani meki Israel kon betre, den fowtu fu Efrayim èn den ogri fu Samaria kon na krin. Bika den e bedrigi sma èn fufuruman e kon na ini den oso. Wantronso ogri-ati fufuruman o kon na den tapu na dorosei.
2 Den no e prakseri taki mi o memre ala den ogri di den e du. Now den ogri di den e du de ala sei na den lontu. Leti na mi fesi den e du ogri.
3 Te den e du ogri, a kownu e prisiri èn te den e bedrigi sma, den granman e prisiri.
4 Den alamala na sutaman. Den de leki wan onfu di wan bakriman leti. A bakriman no e meki na onfu kon moro faya, aladi a e masi a blon nanga srudeki èn a e libi a blon meki a sweri.
5 Na a fesadei fu wi kownu, den granman kon siki èn den ati bron, fu di den dringi tumusi furu win. A kownu e moksi nanga den spotuman.
6 Den ati faya leki wan onfu, fu di den wani du soso ogri. A heri neti a bakriman fu den e sribi. Ma te mamanten doro, a faya na ini na onfu kon moro bigi.
7 Den alamala e kon faya leki na onfu èn den e kiri den krutuman fu den. Ala den kownu fu den dede. Ma toku nowan fu den e bari suku yepi na mi.
8 Efrayim go moksi nanga den tra pipel. Efrayim tron leki wan lontu kuku di baka na wán sei nomo.
9 Freimdesma meki a kon swaki, ma a no sabi dati srefi. En ede-wiwiri kon weti, ma a no sabi dati srefi.
10 Na a bigifasi fu Israel meki taki sani no e waka bun gi den. Toku den no drai go baka na Yehovah, a Gado fu den. Den no suku yepi na en, aladi den sani disi e miti den.
11 Efrayim de leki wan don doifi di no abi frustan. Den go suku yepi na Egepte èn den go na Asiria.
12 Awinsi pe den go, mi o fringi mi nèt na den tapu. Mi o fanga den neleki fa sma e fanga fowru di e frei na loktu. Mi o strafu a pipel, soleki fa mi ben warskow den na fesi.
13 Helu fu den, bika den lon gowe fu mi! Meki sma feti nanga den èn fufuru ala den sani fu den, bika den trangayesi mi! Mi ben de fu frulusu den, ma toku den ben e taki lei fu mi.
14 Den ben e bari krei na tapu den bedi, ma toku den no ben wani suku yepi na mi. Den ben lasi ten e nyan sani soleki aleisi èn den ben e dringi switi win tu. Den tan opo densrefi teige mi.
15 Toku mi ben e gi den leri. Mi ben gi den krakti, ma ala ten den ben abi na prakseri fu du ogri. Na so den ben opo densrefi teige mi.
16 Den drai, ma den no drai go baka na a tru anbegi. Den ben tron leki wan bo di no man wroko bun. Nanga den eigi mofo den granman fu den krutu densrefi èn dati meki sma o kiri den nanga feti-owru. Na so den o kisi syen na ini a kondre Egepte.”