Hosea 8:1-14
8 „Poti wan tutu na yu mofo fu bro en! Wan sma o kon leki wan aka na tapu na oso fu Yehovah, fu di den sma drape no hori mi frubontu èn den trangayesi den wèt fu mi.
2 Nanga wan tranga sten den e taigi mi: ’Yu na a Gado fu Israel, èn wi sabi yu.’
3 Israel trowe bun sani gowe. Meki den feanti fu en lon na en baka.
4 Den poti kownu gi densrefi, ma a no mi taigi den fu du dati. Den poti granman gi densrefi, ma den no aksi mi fu du dati. Den teki den eigi solfru nanga gowtu, dan den meki popki fu anbegi dati. Dati meki den o dede.
5 Samaria, mi trowe a gado fu yu di gersi wan pikin kaw. Mi ati bron srefisrefi nanga yu, Samaria. O langa a o teki fosi yu kon krin baka?
6 Bika a gado di gersi wan pikin kaw komoto fu Israel. A no de a tru Gado. Na wan wrokoman meki en. Sma o broko a gado fu Samaria na pisipisi.
7 Na winti den e sai èn na draiwinti den o koti. Nowan aleisi de na den aleisitiki. Nowan pransun e gi nyanyan fu sma kan meki blon fu dati. Ma efu toku wan pransun e gi nyanyan, dan na tra sma o nyan en.
8 Sma o pori a kondre Israel. Na mindri ala den tra pipel den Israelsma musu kon de leki wan prapi di nowan sma wani.
9 Neleki wan tranga-ede sabanaburiki den go na Asiria. Den Efrayimsma go na den huru-uma.
10 Ma awinsi den e go na den huru-uma di de na mindri tra pipel, toku mi o tyari den kon na wán now. Fu wan syatu pisi ten den o kisi hebi pen, fu di kownu nanga granman o kwinsi den.
11 Efrayim bow moro altari fu du sondu. A abi altari fu du moro sondu.
12 Furu sani di de na ini den wèt fu mi, mi skrifi gi en. Ma a du leki a no sabi nowan fu den sani dati.
13 Ibri tron baka a ben e tyari meti leki srakti-ofrandi gi mi èn a ben e nyan sani di mi, Yehovah, no lobi. Ma now mi o memre sortu sondu Efrayim du èn mi o aksi en frantwortu fu dati. Efrayim drai go baka na Egepte.
14 Ne Israel bigin frigiti a Mekiman fu en èn a bigin bow tempel. Yuda srefi bigin bow moro foto di abi bigi skotu. Mi o seni faya go na den foto fu en. Na ini ibri foto a faya o bron den toren pe sma e tan.”
