Hosea 9:1-17
9 „Israel, yu no musu prisiri. No prisiri leki den tra pipel. Na hurudu meki taki yu drai baka gi yu Gado. Yu lobi den sani di sma e gi yu fu a huru di yu e huru na ala den gron pe sma e masi aleisi.
2 Yu no o feni nyanyan na a gron pe sma e masi aleisi. Yu no o feni win tu na a presi pe sma e meki win. Yu e firi sari, fu di yu no abi switi win moro.
3 A pipel no o tan na ini a kondre fu Yehovah. Efrayim o drai go baka na Egepte. Na ini Asiria den o nyan sani di no krin.
4 Den no o kanti win gi Yehovah moro. Den srakti-ofrandi fu den no o plisi en. Den ofrandi o de leki a nyanyan di sma e nyan te den e row. Ala den sma di o nyan en, no o de krin. A nyanyan dati na gi densrefi. Den no musu tyari en na ini na oso fu Yehovah.
5 San unu o du te unu musu kon makandra èn te unu abi wan fesa gi Yehovah?
6 A pipel o abi fu gowe libi a kondre, fu di a kondre kon pori. Na Egepte sma o tyari den kon makandra èn na Memfis sma o beri den. Krasiwiwiri o gro na tapu den diri solfru sani fu den èn makabusi o gro na ini den tenti fu den.
7 Wan ten o kon te Gado o strafu den, èn wan ten o kon te a o pai den fu den ogri di den e du. Den sma fu Israel o sabi te a ten dati doro. Den profeiti o du leki donman èn den man di e tyari boskopu di gersi leki den kon fu Gado, o du leki lawman, fu di a pipel e du soso ogri. Den alamala abi bita-ati.”
8 A waktiman fu Efrayim ben de nanga mi Gado. A profeiti de na tapu ala den pasi fu Efrayim leki wan trapu fu den sma di e fanga fowru. Soso bita-ati de na ini na oso fu a Gado fu a profeiti.
9 A pipel sungu go dipi na ini den ogri di den du. Na soso takru bakapisi den o kisi. Den de leki den sma di ben e libi na Gibeya fosi. Gado o memre den ogri di den e du èn a o strafu den gi den sondu di den e du.
10 „Di mi feni Israel, a ben de leki droifi na ini a sabana. Mi ben e si den afo fu unu leki den fosi figa fu wan yongu figabon. Den go na a Bâal fu Peor èn den gi densrefi abra na a soso gado dati. Den tron tegu sani neleki a tegu sani di den lobi.
11 A glori fu Efrayim frei gowe leki wan fowru. Dati meki nowan uma e meki pikin, nowan uma de nanga bere, èn nowan uma e teki bere.
12 Den e kweki manpikin, ma mi o kiri den alamala, so taki nowan mansma o de. Helu fu den te mi o drai baka gi den!
13 Di Efrayim ben de leki wan bon di prani na ini wan weigron, mi ben feni taki a gersi Tirus. Ma srefi Efrayim o tyari den manpikin fu en go na wan kiriman.”
14 Yehovah, grantangi, gi den san den musu kisi. Sorgu taki den uma lasi bere èn taki den no man gi den pikin fu den bobi.
15 „Na Gilgal den ben e du ala den ogri fu den. Dati meki mi ben abi bita-ati gi den drape. Mi o yagi den gowe fu mi oso, fu di den e du soso ogri. Mi no o lobi den moro. Ala den granman fu den tranga-ede.
16 Efrayim musu kisi mankeri. A rutu fu en musu kon drei. A no o meki froktu. Te a meki wan pikin, dan mi o kiri a pikin dati di a lobi so te.”
17 Mi Gado o drai baka gi a pipel disi, bika den no arki en. Den o tron loweman na mindri den tra pipel.
