Gi den Kolosesma 1:1-29
1 Mi, Paulus, di de wan apostel fu Krestes Yesus fu di Gado wani, èn wi brada Timoteyus,
2 e skrifi den santawan na Kolose. Den na wi brada di e gi yesi na Gado ala ten èn den de wán nanga Krestes:
Meki Gado, wi Tata, sori unu bun-ati èn meki a freide fu en de nanga unu.
3 Ala ten wi e taki Gado, a Tata fu wi Masra Yesus Krestes, tangi te wi e begi gi unu,
4 bika wi yere fu a bribi fu unu leki bakaman fu Krestes Yesus. Wi yere tu fa unu lobi ala den santawan.
5 Unu e du disi, fu di unu abi a howpu fu kisi a sani di poti na wan sei gi unu na ini hemel. Unu ben yere fu a howpu disi, di sma ben fruteri unu a tru boskopu. Dati na a bun nyunsu
6 di unu kisi fu yere. Neleki fa a bun nyunsu disi e gro èn e meki froktu na heri grontapu, na so a e gro èn e meki froktu na un mindri, sensi a dei di unu yere èn kon sabi finifini san a bun-ati fu Gado wani taki trutru.
7 Na wi lobi brada Epafras di de wan srafu neleki wi, leri unu den sani disi. En na wan dinari fu Krestes di e gi yesi na en ala ten èn di e teki presi gi wi fu yepi unu.
8 A fruteri wi tu fu a lobi di a yeye fu Gado yepi unu fu kon abi.
9 Sobun, sensi a dei di wi yere dati, wi no tapu fu begi gi unu èn fu aksi Gado fu meki unu kisi koni èn fu meki a yeye fu en yepi unu fu kon frustan sani moro krin, so taki unu kan kon sabi finifini san na a wani fu en.
10 Dan unu o tyari unsrefi na wan fasi di Yehovah feni bun, so taki unu kan tan prisiri en dorodoro. Na a srefi ten un musu tan du muiti fu abi bun bakapisi nanga ala san unu e du èn fu kon sabi den finifini tori fu Gado moro nanga moro.
11 Meki a bigi makti fu Gado gi unu ala a krakti di unu abi fanowdu, so taki unu kan horidoro nanga pasensi èn nanga prisiri awinsi san e pasa.
12 Un musu taki a Tata tangi taki a yepi unu fu tron den sortu sma dati, so taki unu sosrefi kan kisi a gudu di a pramisi den santawan di de na ini a leti.
13 A puru wi na ini a makti fu dungru èn a poti wi na ini a Kownukondre fu en lobi Manpikin,
14 di pai wan lusu-paiman fu fri wi. Sobun, wi kisi pardon fu wi sondu.
15 A Manpikin abi den srefi fasi fu Gado di sma no man si. Iya, en na a fosiwan* fu ala sani di Gado meki,
16 bika en na a sma di Gado gebroiki fu meki ala tra sani na hemel èn na grontapu, sobun, den sani di wi man si nanga den sani di wi no man si, awinsi dati na kownumakti, a makti fu heihei sma, tirimakti, noso tra makti. Gado gebroiki en fu meki ala tra sani èn ala sani de gi en.
17 Boiti dati, a ben de fosi ala tra sani èn Gado gebroiki en fu meki ala tra sani.
18 A de na ede fu a skin. Dati na a gemeente. A de a bigin, a fosiwan di kisi wan opobaka, so taki a ben kan tron a fosiwan fu ala sani,
19 bika Gado feni en bun taki Yesus bun dorodoro na ini ala sani.
20 Na a manpikin disi Gado gebroiki fu meki ala tra sani kon bun baka nanga en, awinsi na sani na grontapu, noso sani na ini hemel. A du disi nanga a brudu fu Krestes di lon na a pinapostu.
21 Iya, wan ten ben de taki unu no ben sabi Gado. Unu ben kon de feanti fu en, bika na soso ogri unu ben prakseri fu du.
22 Ma now di Krestes dede fu gi en libisma skin leki ofrandi, Gado meki unu kon bun baka nanga en. Na so fasi unu kan kon na en fesi leki santa sma di krin èn di nowan sma man feni fowtu na tapu.
23 Ma a no de fu taki dati un musu tan na ini a bribi èn un musu tanapu steifi na tapu a fondamenti fu a bribi disi. Un musu tanapu kánkan èn nowan sani musu meki unu lasi a howpu di unu ben kisi di unu yere a bun nyunsu di preiki gi ala sma na grontapu. Mi, Paulus, tron wan dinari di preiki a bun nyunsu disi.
24 Now mi e prisiri taki mi e kisi tesi fu unu ede, ma mi no pina dorodoro ete fu Krestes ede. Mi e pina gi a bun fu a skin fu Krestes, sobun, gi a gemeente.
25 Mi tron wan dinari fu a gemeente disi, fu di Gado gi mi a frantwortu fu preiki a wortu fu en dorodoro gi a bun fu unu.
26 Dati na a santa kibritori di no ben kon na krin na ini den ten* di pasa. Iya, nowan sma fu owruten ben kon sabi en. Ma now a santa kibritori disi tyari kon na krin gi den santawan fu Gado.
27 Gado ben prisiri fu meki trakondre sma kon sabi san na den bigi gudu di abi fu du nanga a santa kibritori disi. A kibritori disi na Krestes di de wán nanga unu, san wani taki dati unu abi a howpu fu kisi glori makandra nanga en.
28 Na fu en wi e preiki. Iya, wi e warskow ala sma èn nanga ala koni wi e gi leri na ala sma, so taki wi kan tyari ibri sma kon na fesi Gado leki lepi bakaman fu Krestes.
29 Na fu dati ede mi e wroko tranga trutru. Iya, mi e meki ala muiti èn a krakti fu en di e wroko na ini mi, e yepi mi.
