Lukas e fruteri 12:1-59
12 Na a pisi ten dati someni dusun sma ben kon drape taki den ben trapu makandra. Dan Yesus bigin taki fosi nanga den disipel fu en: „Luku bun nanga a srudeki fu den Fariseiman, dati na a hoigrifasi fu den.
2 Nowan sani kibri so bun taki a no sa kon na krin, èn nowan kibritori de di sma no sa kon sabi.
3 Fu dati ede, san unu e taki te unu de unu wawan, na dati ala sma o yere. Sosrefi, san unu e taki safri na ini un kamra, na dati sma o preiki na tapu den daki fu den oso.
4 Mi mati, mi e taigi unu tu: No frede den sma di kan kiri yu èn baka dati den no man du noti moro.
5 Ma mi o taigi unu suma un musu frede: Frede a wan di abi a makti fu trowe wan sma go na ini Gehena,* baka te a kiri en. Iya, mi e taigi unu, na a sma disi un musu frede.
6 A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den.
7 Srefi ala den wiwiri na un ede a teri. No frede, unu warti moro leki furu pikin fowru.
8 Fu dati ede, mi e taigi unu: Efu wan sma e taigi trawan taki mi nanga en na wán, dan a Manpikin fu libisma o taigi den engel fu Gado tu taki en nanga a sma dati na wán.
9 Ma efu wan sma e taigi trawan taki a no sabi mi, dan mi o taigi den engel fu Gado tu taki mi no sabi a sma.
10 Efu wan sma no e taki bun fu a Manpikin fu libisma, dan a sa kisi pardon fu dati. Ma efu wan sma e taki ogri fu a santa yeye, dan a no sa kisi pardon fu dati.
11 Te sma e tyari unu go na den snoga fu den èn na den bigiman fu kondre nanga den tiriman, dan un no musu broko un ede fa unu o opo taki gi unsrefi noso san unu o taki.
12 Bika na a srefi momenti dati a santa yeye o leri unu san un musu taki.”
13 Dan wan fu den sma taigi en: „Leriman, taigi mi brada meki a prati a gudu nanga mi di wi papa libi gi wi.”
14 A taigi a man: „Suma poti mi leki krutuman fu unu, noso leki a sma di musu prati sani na un mindri?”
15 Baka dati a taigi den sma: „Tan na ai èn luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi.”
16 Dan a fruteri den wan agersitori. A taki: „A gron fu wan gudu man ben gi furu nyanyan.
17 Fu dati ede a bigin prakseri: ’San mi o du, now di mi no abi wan presi fu poti a nyanyan fu a gron?’
18 Dati meki a taki: ’Mi o du disi: Mi o broko den maksin fu mi puru, dan mi o bow moro bigiwan èn drape mi o poti ala mi aleisi nanga ala den bun sani fu mi.
19 Dan mi o taki na misrefi: „We, mi poti wan lo bun sani na wan sei gi furu yari. Mi o teki en safrisafri, mi o nyan, dringi èn meki prisiri.”’
20 Ma Gado taigi en: ’Yu don man, tideneti srefi yu o lasi yu libi.* Dan suma o kisi den sani di yu tyari kon na wán?’
21 Na so a sa waka nanga a sma di e tyari moro nanga moro gudu kon na wán gi ensrefi, ma di no gudu na ini Gado ai.”
22 Baka dati a taigi den disipel fu en: „Dati meki mi e taigi unu: No broko un ede moro nanga un libi, iya, nanga san unu o nyan, noso san unu o weri na un skin.
23 Bika a libi warti moro leki nyanyan èn a skin warti moro leki krosi.
24 Luku den fowru bun. Den no e sai, den no e koti nyanyan, èn den no abi maksin noso wan presi fu kibri nyanyan. Toku Gado e gi den nyanyan. Unu no warti moro leki den fowru?
25 Suma fu unu di e broko en ede nanga sani, kan meki en libi kon pikinso moro langa?
26 Fu dati ede, efu unu no kan du a pikin sani disi srefi, dan fu san ede unu e broko un ede nanga den tra sani?
27 Luku fa den leilibromki e gro. Den no e wroko tranga èn den no e brei titei, ma mi e taigi unu: Srefi Salomo di ben abi someni glori no ben weri so moi leki wan fu den bromki disi.
28 We, Gado e meki den sani di e gro na ini a sabana weri so moi, aladi den na sani di de tide, ma tamara sma e trowe den go na ini wan onfu. Efu dati de so, dan a de seiker taki a sa gi unu sani fu weri, un sma di no e bribi nofo.
29 Fu dati ede, no prakseri moro san unu o nyan nanga san unu o dringi, èn no broko un ede moro.
30 Bika ala den sani disi na san grontapusma e feti fu kisi, ma un Tata sabi taki unu abi den sani disi fanowdu.
31 Fu dati ede, tan suku en Kownukondre, èn unu o kisi ala den sani disi tu.
32 No frede, un pikin ipi, bika un Tata feni en bun fu gi unu a Kownukondre.
33 Seri den sani di unu abi èn du pôti sma wan bun. Meki monisaka di no e kon owru. Disi na den bun sani di unu abi na hemel èn di no e kaba noiti. Drape fufuruman no man doro èn woron no man nyan en.
34 Bika pe un gudu de, na drape un ati sa de tu.
35 Un musu weri un krosi, de srekasreka, èn meki un lampu tan leti.
36 Un musu de leki sma di e wakti den masra teleki a drai kon baka fu a trow-oso, so taki te a doro èn a e naki na tapu a doro, dan den kan opo a doro gi en wantewante.
37 Koloku fu den srafu te a masra doro èn a e si taki den de na ai! Fu tru, mi e taigi unu: A masra o tai en bere, dan a o meki den sidon na tafra èn a o gi den nyanyan.
38 Koloku fu den te a si taki den de na ai te a doro latilati neti noso te mindrineti pasa kaba!
39 Ma sabi disi, taki efu a masra fu na oso ben sabi sortu yuru a fufuruman ben o kon, dan a ben o tan na ai èn a no ben o meki sma broko kon na ini en oso.
40 Unu musu de srekasreka tu, bika a Manpikin fu libisma e kon na wan yuru di unu no ben prakseri.”
41 Dan Petrus taki: „Masra, na wi yu e fruteri na agersitori disi, noso yu e fruteri ala sma?”
42 Ne Masra taki: „Suma na a futuboi di de fu frutrow trutru, a koniwan, di en masra sa poti fu luku ala den futuboi fu en, so taki a kan tan gi den nofo nyanyan na a reti ten?
43 Koloku fu a srafu te en masra doro èn a si taki a srafu e du dati!
44 Fu tru, mi e taigi unu: A sa poti a srafu fu luku ala den sani di a abi.
45 Ma kon meki wi taki dati a srafu prakseri: ’Mi masra no e kon ete.’ Dan a bigin fon ala den man nanga uma di de futuboi tu, a e nyan, a e dringi, èn a e kon drungu.
46 Efu a masra fu a srafu dati kon na wan dei di a srafu no e fruwakti èn na wan yuru di a no sabi, dan a masra o gi en wan bun hebi strafu. A o gi a srafu san a musu kisi makandra nanga den sma di no e gi yesi na a masra.
47 Dan a srafu di ben frustan san en masra ben wani, ma di no ben sreka ensrefi, noso di no ben du san en masra ben wani, o kisi furu fonfon.
48 Ma a srafu di no ben frustan èn di ben du sani di meki taki a musu kisi fonfon, no o kisi someni fonfon. Sobun, efu wan sma kisi furu sani, dan den o aksi furu fu en tu. Efu den poti wan sma fu luku furu sani, dan den o aksi moro fu en leki san den gwenti.
49 Mi kon fu leti wan faya na grontapu, èn efu a faya leti kaba, dan san mi wani moro?
50 Iya, mi musu teki wan dopu ete èn solanga mi no du disi, mi o de na ini banawtu!
51 Yu denki taki na freide mi tyari kon na grontapu? Nôno, fu tru mi e taigi unu, mi tyari trobi kon.
52 Bigin fu now feifi sma o de na ini wán oso èn den o abi trobi nanga makandra. Dri fu den o abi trobi nanga tu fu den èn tu fu den o abi trobi nanga dri fu den.
53 Den o abi trobi nanga makandra, iya, wan papa nanga en manpikin èn wan manpikin nanga en papa, wan mama nanga en umapikin èn wan umapikin nanga en mama, wan mama nanga a wefi fu en manpikin èn wan wefi nanga a mama fu en masra.”
54 Baka dati a taigi den tra sma tu: „Te unu e si wolku e komopo fu west-sei, dan wantewante unu e taki: ’Wan sibibusi o kon’ èn na so a e pasa tu.
55 Te unu e si taki wan winti e wai komopo fu zuidsei, dan unu e taki: ’A o faya tide’, èn na dati e pasa tu.
56 Hoigriman, unu e frustan fu san ede grontapu nanga loktu tan wan fasi, ma fa a du kon taki unu no e frustan a spesrutu ten disi?
57 Fu san ede unu srefi no e ondrosuku fu sabi san bun?
58 Fu eksempre, te yu nanga a sma di wani tyari yu go na krutu, de na pasi fu go na wan krutuman, dan du muiti fu lusu a trobi di yu nanga en abi. Dan a no sa srepi yu go na fesi a krutuman, èn a krutuman no sa gi yu na a skowtu fu a krutu-oso. A no sa trowe yu go na strafu-oso.
59 Mi e taigi yu: Yu no o komopo drape solanga yu no pai a lasti sensi srefi.”
