Lukas e fruteri 16:1-31
16 Baka dati a taigi den disipel tu: „Wan gudu man ben abi wan futuboi di a ben poti fu sorgu gi en oso. Ma di a yere taki a futuboi frumorsu den gudu fu en,
2 a kari a futuboi kon èn a taigi en: ’San mi yere fu yu? Yu musu gi mi frantwortu fu san yu du, bika mi no sa meki yu sorgu moro gi na oso.’
3 Ne a futuboi prakseri: ’San mi o du? Mi si taki a masra fu mi o puru a wroko na mi anu. Mi no tranga nofo fu diki olo èn mi e syen fu go begi sma sani.
4 Ai, mi sabi san mi o du fu meki sma teki mi na ini oso te mi lasi mi wroko.’
5 Ne a kari ala den sma kon di ben abi wan paiman na en masra. A taigi a fosiwan: ’Omeni yu musu pai a masra fu mi?’
6 A man taki: ’Wán hondro bigi emre* olèif-oli.’ A futuboi taigi en: ’Teki a kontrakti fu yu baka, go sidon, dan yu skrifi feifitenti esi-esi.’
7 Baka dati a taigi wan trawan: ’Èn yu, omeni yu musu pai?’ A man taki: ’Wán hondro bari* aleisi.’* A futuboi taigi en: ’Teki a kontrakti fu yu baka, dan yu skrifi aititenti.’
8 We, aladi a futuboi no ben wroko na wan reti fasi, toku en masra prèise en, fu di a futuboi ben du sani na wan koni fasi. Den sma fu a grontapu disi koni moro den sma fu a leti, fu di den sabi fa fu seti den tori.
9 Mi e taigi unu tu: „Meki mati nanga yepi fu den gudu fu a grontapu disi pe retidu no de. Te yu no abi den gudu moro, dan den mati dati kan teki yu na ini den tanpresi pe sma man libi fu têgo.
10 Te wan sma de fu frutrow na ini a moro pikin afersi, a o de fu frutrow en na ini bigi afersi tu. Te wan sma e bedrigi trawan na ini a moro pikin afersi, dan a o bedrigi trawan na ini bigi afersi tu.
11 Fu dati ede, efu unu no de fu frutrow na ini a fasi fa unu e gebroiki den gudu fu a grontapu disi pe retidu no de, dan suma sa gi unu a trutru gudu?
12 Efu unu no de fu frutrow nanga den sani fu tra sma, dan suma sa gi unu den sani di unu musu kisi?
13 Nowan futuboi di e wroko na ini oso kan de wan srafu fu tu masra. Bika a sa teige a wan èn lobi a trawan, noso a sa tan nanga a wan èn wisiwasi a trawan. Unu no kan dini Gado èn dini Gudu na a srefi ten.”
14 Ma den Fariseiman di ben lobi moni yere ala den sani disi èn den bigin spotu en.
15 Dati meki a taigi den: „Unu e du sani fu meki trawan denki taki unu na reti-ati sma. Ma Gado sabi un ati, bika san bigi na sma ai, na wan tegu sani gi Gado.
16 A Wèt nanga den buku fu den Profeiti ben de te na a ten fu Yohanes. Sensi a ten dati, sma e fruteri a bun nyunsu fu a Kownukondre fu Gado na ala sma èn ala sortu sma e du muiti fu feni en.
17 Iya, a moro makriki fu hemel nanga grontapu lasi gowe, leki fu wán pikin pisi fu a Wèt no kon tru.
18 Efu wan sma broko trow nanga en wefi èn a trow nanga wan trawan, dan a du sutadu. Efu wan sma trow nanga wan uma di broko trow nanga en masra, dan a du sutadu.
19 We, wan man ben de di ben gudu èn a ben e weri soso diri redi-paars krosi nanga diri linnen krosi. Ibri dei a ben e meki prisiri èn a ben libi bigi.
20 Ma wan man Lasarus ben de tu di ben e begi sma sani. Den ben gwenti poti en na a portu fu a gudu man. En heri skin ben lai soro.
21 A ben winsi taki a ben kan furu en bere nanga den sani di ben fadon komoto fu a tafra fu a gudu man. Srefi den dagu ben kon fu leki den soro fu en.
22 Ma wan dei, Lasarus dede èn den engel tyari en go krosibei fu Abraham.
A gudu man dede tu èn den beri en.
23 We, di a ben de na ini Grebi,* a opo en ai. A ben e pina. Ne a si Abraham bun fara èn Lasarus ben de krosibei fu Abraham.
24 Dati meki a bari: ’Tata Abraham, abi sari-ati nanga mi. Seni Lasarus meki a dopu a topi fu en finga na ini watra, so taki a kan kon kowru mi tongo, bika mi e pina kefalek na ini a bigi faya disi.’
25 Ma Abraham taki: ’Mi pikin, prakseri taki di yu ben de na libi, yu ben kisi ala den bun sani, ma Lasarus ben kisi soso den takru sani. Now a e kisi trowstu dya, ma yu e pina kefalek.
26 Boiti dati, wan bigi olo de na mindri wi nanga unu. Te sma dyaso ben o wani abra go na unu, den no ben o man go èn den sma drape di wani abra kon na wi, no o man kon.’
27 Ne a gudu man taki: ’Efu dati de so, dan mi wani aksi yu, mi tata, seni Lasarus go na a oso fu mi papa,
28 bika mi abi ete feifi brada. Meki a warskow den, so taki den no sa kon na a presi disi pe sma e pina.’
29 Ma Abraham taki: ’Den abi den buku fu Moses èn den buku fu den Profeiti. Meki den du san den buku e taki.’
30 Ne a gudu man taki: ’Nôno, mi tata Abraham. Efu wan sma komoto na dede fu go na den, dan den o abi berow.’
31 Ma a taigi a gudu man: ’Efu den no e du san den buku fu Moses èn den buku fu den Profeiti e taki, dan awansi wan sma komoto na dede, toku dati no sa meki den kenki prakseri.’”
Futuwortu
^ Griki wortu: bat. Luku „Moro sani”, nr. 15.
^ Griki wortu: kor. Luku „Moro sani”, nr. 15.
^ Griki wortu: haides. Luku „Moro sani”, nr. 10.
