Lukas e fruteri 4:1-44
4 Di Yesus drai kon baka fu Yordan-liba, a ben furu nanga santa yeye èn a yeye tyari en go na ini a sabana
2 fotenti dei langa. Ne Didibri kon tesi en. Yesus no ben nyan noti na a ten dati. Dati meki angri ben e kiri en baka di den dei dati pasa.
3 Ne Didibri taigi Yesus: „Efu yu na wan manpikin fu Gado, dan taigi a ston disi fu tron brede.”
4 Ma Yesus piki en: „Gado Buku taki: ’Sma no musu libi fu brede wawan.’”
5 Baka dati Didibri tyari en go na wan hei presi èn na ini wan syatu pisi ten a sori Yesus ala den kownukondre fu heri grontapu.
6 Dan Didibri taigi en: „Mi o gi yu ala a makti nanga a glori fu den kownukondre disi, bika den na fu mi èn mi kan gi den na suma mi wani.
7 Fu dati ede, efu yu anbegi mi wán leisi nomo, dan ala den sani disi sa de fu yu.”
8 Yesus taigi en: „Gado Buku taki: ’Na Yehovah yu Gado, yu musu anbegi èn na en wawan yu musu dini.’”
9 Didibri tyari en tu go na Yerusalem èn a poti en na tapu a skotu fu a tempel, dan a taigi en: „Efu yu na wan manpikin fu Gado, dan fringi yusrefi go na gron,
10 bika Gado Buku taki: ’A o taigi den engel fu en fu no meki nowan sani pasa nanga yu,
11 èn den o tyari yu na tapu den anu, so taki noiti yu o naki yu futu na wan ston.’”
12 Ne Yesus piki en: „Gado Buku taki: ’Yu no musu tesi Yehovah yu Gado.’”
13 Di Didibri kaba tesi en, a gowe libi en fu kon baka na wan moro bun ten.
14 Now Yesus drai go baka na Galilea nanga a krakti fu a yeye. Na ini a heri kontren den sma ben e taki bun fu en.
15 A ben gi sma leri tu na ini den snoga fu den èn ala sma ben e lespeki en.
16 Di a doro na Nasaret pe en papa nanga mama kweki en, a go na ini a snoga soleki fa a gwenti du na Sabat-dei èn a opo tanapu fu leisi.
17 Dati meki den gi en a bukulolo fu a profeiti Yesaya. Ne a opo a bukulolo èn a feni a pisi pe skrifi:
18 „A yeye fu Yehovah de na mi tapu, fu di a salfu mi fu fruteri den pôti sma bun nyunsu. A seni mi go fu preiki taki den katiboman o kon fri, taki den breniwan o si baka, èn taki den sma di e kisi kwinsi o gowe leki friman.
19 A seni mi tu fu fruteri sma fu a ten te Yehovah o sori sma bun-ati.”
20 Ne Yesus lolo a bukulolo tapu, dan a gi en baka na a dinari èn a go sidon. Ne ala sma na ini a snoga luku en fu si san a ben o du.
21 Dan a taigi den: „Tide den wortu di unu yere didyonsro kon tru.”
22 Now ala sma bigin taki bun fu en èn den ben fruwondru fu den moi sani di a ben taki. Den taki: „Disi a no wan manpikin fu Yosef?”
23 Ne a taigi den: „Mi sabi taki unu o koti na odo disi gi mi: ’Datra, dresi yusrefi.’ Dan unu o taki: ’Den sani di wi yere yu du na Kaperna-um, du den dyaso tu na ini yu eigi kontren.’”
24 Ma a taki: „Fu tru, mi e taigi unu taki noiti sma e bribi wan profeiti na ini en eigi kontren.
25 Fu eksempre, na ini a ten fu Elia di alen no ben fadon dri yari nanga siksi mun èn di wan bigi angriten ben de na ini a heri kondre, yu ben abi furu uma na ini Israel di den masra dede kaba.
26 Toku Gado no seni Elia go na nowan fu den uma disi, ma a seni en go soso na Sarfat na ini a kondre Sidon na wan uma di en masra ben dede.
27 Sosrefi, na ini a ten fu a profeiti Elisa furu gwasiman ben de na Israel, ma nowan fu den ben kon krin, soso a Siriaman Naman.”
28 Ne ala den sma di yere den sani disi na ini a snoga, ati bron srefisrefi.
29 Den opo èn den yagi en komopo na ini a foto. Dan den tyari en go na a lanki fu a bergi pe a foto fu den ben bow na tapu, fu di den ben wani trowe en go na gron.
30 Ma a ben man komopo na den mindri èn teki en pasi gowe.
31 Dan a saka go na Kaperna-um, wan foto na ini Galilea. A gi den sma drape leri na a Sabat-dei.
32 Den ben fruwondru fu a fasi fa a ben e gi leri, bika a ben e taki leki wan sma di kisi makti fu Gado.
33 Now wan man ben de na ini a snoga di ben abi wan ogri yeye na en tapu èn a ben e bari nanga wan tranga sten:
34 „Libi wi! Wi no abi noti fu du nanga yu, Yesus fu Nasaret. Yu kon dya fu kiri wi? Mi sabi heri bun suma na yu. Yu na a Santawan fu Gado.”
35 Ma Yesus piri-ai gi na ogri yeye èn a taki: „Tapu yu mofo èn komoto na a man tapu.” Fu dati ede na ogri yeye trowe a man go na gron na mindri den sma èn a komoto na a man tapu sondro fu gi en mankeri.
36 Ne ala den sma fruwondru trutru èn den taigi makandra: „San na den sani disi di a e taki? A abi a makti nanga a krakti fu gi den ogri yeye a komando fu komoto na sma tapu.”
37 Na so den sma panya a tori disi na ini a heri kontren.
38 Baka di a gowe fu a snoga, a go na Simon oso. Wan hebi korsu ben naki a mama fu a wefi fu Simon èn den aksi Yesus fu yepi na uma.
39 Dati meki a boigi ensrefi abra na uma èn a taigi a korsu fu gowe libi en. Ne a korsu saka èn wantewante na uma opo go sreka nyanyan gi den.
40 Ma di son dongo, dan sma tyari den siki sma fu den di ben abi difrenti sortu siki, kon na en. A poti en anu na tapu ibriwan fu den èn a meki den kon betre.
41 Boiti dati, a ben e puru ogri yeye na furu sma tapu. Den ben bari: „Yu na a Manpikin fu Gado.” Ma a piri-ai gi den èn a no gi den primisi fu taki, fu di den ben sabi taki en na a Krestes.
42 Now di dei opo, a go na dorosei na wan tiri presi. Dan den sma go suku en èn den kon pe a ben de. Den ben pruberi fu hori en fu a no gowe fu den.
43 Ma a taigi den: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon.”
44 Na so a tan preiki na ini den snoga fu Yudea.
