Lukas e fruteri 6:1-49
6 Wan Sabat-dei a ben e waka pasa na ini wan aleisigron di den disipel fu en piki na aleisi, dan den wrifi na aleisi na ini den anu èn den nyan.
2 Ne wan tu fu den Fariseiman taki: „Fu san ede unu e du wan sani di un no musu du na Sabat-dei?”
3 Ma Yesus piki den: „Noiti unu no leisi san David du di angri ben kiri en nanga den man fu en?
4 Unu no leisi taki David go na ini na oso fu Gado èn taki den gi en den brede di ben poti na fesi Gado leki wan ofrandi? A nyan den èn a gi den man fu en pikinso, a no so? A ben du disi aladi nowan sma ben musu nyan den brede. Soso den priester ben kan du dati.”
5 Yesus taigi den: „A Manpikin fu libisma na Masra fu Sabat.”
6 Wan tra Sabat-dei, Yesus go na ini a snoga èn a bigin gi sma leri. Wan man ben de drape di ben malengri na en reti-anu.
7 Den leriman fu Wèt nanga den Fariseiman ben e luku Yesus bun fu si efu a ben o dresi sma na Sabat-dei, so taki den ben kan feni wan sani na en tapu.
8 Ma a ben sabi san den ben e prakseri. Dati meki a taigi a man di ben abi wan malengri anu: „Opo go tanapu na mindrisei.” Ne a man opo go tanapu drape.
9 Baka dati Yesus taigi den: „Mi e aksi unu: A fiti fu du bun, noso fu du ogri na Sabat-dei? Noso a fiti fu yepi wan sma noso fu kiri wan sma na Sabat-dei?”
10 Baka di a luku den alamala, a taigi a man: „Langa yu anu.” A man langa en anu èn en anu kon betre.
11 Ma den leriman fu Wèt nanga den Fariseiman ati bron srefisrefi, èn den go taki nanga makandra san den ben kan du nanga Yesus.
12 Bakaten, a go na a bergi fu begi èn heri neti a begi Gado.
13 Ma di dei opo, a kari den disipel fu en kon èn a teki twarfu fu den di a ben kari apostel.
14 Yu ben abi Simon di a ben kari Petrus tu, nanga en brada Andreas, sosrefi Yakobus nanga Yohanes, Filipus nanga Bartolomeyus,
15 Mateyus, Tomas, Yakobus di de a manpikin fu Alfeyus, Simon di sma sabi tu leki „a fayafaya man”,
16 Yudas di de a manpikin fu Yakobus, nanga Yudas Iskariot di ben tori Yesus bakaten.
17 Dan a saka makandra nanga den fu a bergi èn a go tanapu na wan plata presi. Wan heri ipi disipel fu en ben de drape nanga wan lo sma di ben komoto fu heri Yudea, Yerusalem, nanga den kondre Tirus nanga Sidon di de na ini a birti fu a se. Den ben kon drape fu arki en èn fu a meki den kon betre.
18 A dresi srefi den wan di ben abi ogri yeye na den tapu.
19 Ala den sma ben pruberi fu fasi en, bika krakti ben komoto fu en èn a meki den alamala kon betre.
20 Dan a opo en ede luku den disipel fu en èn a taki:
„Koloku fu unu di pôti, bika a Kownukondre fu Gado na fu unu.
21 Koloku fu unu di de nanga angri now, bika un bere o furu.
Koloku fu unu di e krei now, bika unu o lafu.
22 Koloku fu unu te sma no lobi unu kwetikweti, te den e yagi unu, te den e gi unu porinen, èn te den e taki wan lo ogri fu unu fu di unu na bakaman fu a Manpikin fu libisma.
23 Na a ten dati un musu breiti èn prisiri pasa marki, fu di unu o kisi wan bigi pai na hemel, bika na den srefi sani dati den afo fu den ben e du nanga den profeiti.
24 Ma helu fu unu, un guduman, bika unu kisi ala bun sani kaba.
25 Helu fu unu di nyan un bere furu now, bika angri o kiri unu.
Helu fu unu di e lafu now, bika unu o sari èn krei.
26 Helu fu unu, te ala sma e taki bun fu unu, bika na den srefi sani disi den afo fu den ben du nanga den falsi profeiti.
27 Ma mi e taigi unu di e arki: Tan lobi un feanti, tan du bun gi den sma di no lobi unu kwetikweti,
28 tan blesi den sma di e fluku unu, tan begi gi den sma di e taigi unu hati sani.
29 Efu wan sma naki yu na yu seifesi, dan meki a naki a tra sei tu. Efu wan sma puru yu dyakti na yu skin, dan no tapu en fu teki yu empi tu.
30 Te wan sma aksi unu wan sani, dan gi en dati èn te wan sma teki wan sani fu unu, dan no aksi en a sani baka.
31 Sosrefi, san unu wani meki sma du gi unu, na dati un musu du gi den tu.
32 Efu unu lobi soso den sma di lobi unu, dan sortu bun unu du dan? Bika srefi sondari lobi den sma di lobi den.
33 Efu unu e du bun gi den sma di e du bun gi unu, dan sortu bun unu du dan? Srefi sondari e du a sani dati tu.
34 Sosrefi, efu unu e leni sma sani soso fu di unu e howpu taki den o pai unu baka, dan sortu bun unu du dan? Srefi sondari e leni tra sondari sani soso fu kan kisi a srefi sani baka.
35 Ma tan lobi un feanti, tan du bun, èn tan leni sma sani sondro fu howpu taki unu o kisi wan sani fu den baka. Na so fasi unu o kisi wan bigi pai èn unu o de manpikin fu a Moro Heiwan, fu di Gado du bun gi den sma di no de nanga tangi èn gi den ogri sma.
36 Tan abi sari-ati, neleki fa un Tata abi sari-ati.
37 Sosrefi, no krutu sma moro, dan Gado no sa krutu unu. No suku fowtu na sma moro, dan Gado no sa suku fowtu na unu. Tan gi sma pardon, dan unu sa kisi pardon tu.
38 Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e libi nanga trawan, na a fasi dati den sa libi nanga unu tu.”
39 Dan a fruteri den wan agersitori tu: „Wan breni man no man sori wan tra breni man a pasi, a no so? A no de so, taki den ala tu o fadon go na ini wan peti?
40 Wan disipel no bigi moro en leriman, ma ibri sma di kisi trutru bun leri o de leki en leriman.
41 Fu san ede yu e luku a fini pisi udu na ini yu brada ai, ma yu no e si a postu di de na ini yu eigi ai?
42 Fa yu kan taigi yu brada: ’Brada, kon meki mi puru a fini pisi udu di de na ini yu ai’, ma yusrefi no e luku a postu di de na ini yu eigi ai? Hoigriman! Puru a postu na ini yu eigi ai fosi, dan yu sa si krin fa yu kan puru a fini pisi udu di de na ini yu brada ai.
43 Nowan bun bon e meki pori froktu. Sosrefi, nowan siki bon e meki bun froktu.
44 Sma kan kon sabi wan bon na den froktu fu en. Fu eksempre, sma no e piki figa fu makabon èn den no e koti droifi puru fu wan makabon, a no so?
45 Wan bun sma e puru bun sani na ini en ati, ma wan ogri sma e puru ogri sani na ini en ati. Bika san furu na ati, na dati mofo e taki.
46 Fu san ede unu e kari mi ’Masra! Masra!’, ma unu no e du den sani di mi taki?
47 Mi o taigi unu suma a sma gersi di e kon na mi, di yere san mi taki èn di e du en tu:
48 A de leki wan man di ben e bow wan oso. A diki go dipi na ini a gron fu poti wan fondamenti na tapu ston-gron. We, di wan frudu kon, dan a liba naki na oso dati bun tranga, ma a no ben tranga nofo fu seki na oso, bika na oso ben bow bun.
49 Na a tra sei, a sma di yere, ma no e du san a yere, de leki wan man di bow wan oso na tapu gron sondro wan fondamenti. A liba naki na oso bun tranga èn wantewante a heri oso fadon broko.”
