Markus e fruteri 6:1-56
6 Baka dati, a gowe fu drape èn a kon na ini en eigi kontren. Den disipel fu en go nanga en tu.
2 Na Sabat-dei a bigin gi leri na ini a snoga. Wan lo sma di ben de drape e arki en, ben fruwondru èn den aksi: „Fu pe a man disi komopo nanga den sani disi? Fu san ede a man disi ben musu kisi a koni disi, èn fu san ede na en musu du den bigi wondru disi?
3 A no en na a temreman, a manpikin fu Maria èn a no en na a brada fu Yakobus, Yosef, Yudas, nanga Simon? Den sisa fu en de dyaso nanga wi, a no so?” Fu dati ede den no ben wani bribi en.
4 Ma Yesus taigi den: „Na ala presi den e lespeki wan profeiti, boiti na ini en eigi kontren, na mindri den famiriman fu en, èn na ini en eigi oso.”
5 Dati meki a no ben man du nowan bigi wondru drape, boiti taki a ben poti en anu na tapu wan tu siki sma èn taki a meki den kon betre.
6 Iya, a ben fruwondru taki den sma no ben wani bribi. Baka dati, a go na ala den dorpu na ini a birti drape fu gi leri.
7 Dan a kari den twarfu apostel kon, a bigin seni den go na sma, tu na tu, èn a gi den makti tu fu puru ogri yeye na sma tapu.
8 A taigi den sosrefi taki te den ben o gowe, den no ben musu tyari noti moro nanga den, boiti wan tiki. Den no ben musu tyari nowan brede, nowan nyanyan-saka, èn nowan kopro moni na ini den monisaka na den seibere.
9 Den ben musu weri wan susu na den futu èn den no ben musu weri tu krosi.
10 A taigi den sosrefi: „Efu wan sma teki unu na ini oso, dan tan drape teleki unu komopo fu a presi dati.
11 Efu wan presi de pe sma no wani teki unu, noso den no wani arki unu, dan un musu komoto drape, naki a doti puru na un futu èn dati musu de wan buweisi taki den du wan sani di no bun.”
12 Baka dati den go preiki, so taki sma ben kan abi berow.
13 Den puru furu ogri yeye na sma tapu èn den lobi oli gi furu siki sma èn den ben meki den kon betre.
14 Now Kownu Herodes yere den sani disi, bika Yesus nen ben bari na ala presi èn sma ben e taki: „Yohanes a dopuman kisi wan opobaka. Na fu en ede a man du den bigi wondru.”
15 Ma tra sma ben taki: „Na Elia.” Trawan baka ben e taki: „A de leki den tra profeiti fu owruten.”
16 Ma di Herodes yere disi, a taki: „A Yohanes di mi koti en ede puru, kisi wan opobaka.”
17 Herodes ben seni sma go kisi Yohanes. Den tai en èn den poti en na strafu-oso, fu di Herodias, a wefi fu en brada Filipus, ben wani dati. Herodes ben trow nanga Herodias
18 èn someni leisi kaba Yohanes ben taigi Herodes: „A no fiti taki yu teki a wefi fu yu brada.”
19 Ma Herodias ben hori Yohanes na ati èn a ben wani kiri en. A no ben man,
20 fu di Herodes ben abi lespeki gi Yohanes, bika a ben de wan bun èn santa man. Dati meki a no ben wani meki wan sani pasa nanga Yohanes. Baka di Herodes yere san Yohanes ben abi fu taki, a no ben sabi san fu du, ma toku a ben lobi arki en ibri tron baka.
21 Ma wan bun okasi ben de di Herodes aksi den bigiman fu en, den srudati-edeman, nanga den heihei sma fu Galilea fu kon nyan na a fesa di a ben sreka na tapu en friyaridei.
22 Na umapikin fu Herodias kon na inisei èn a dansi. Disi ben plisi Herodes nanga den sma di ben sidon nanga en na tafra. A kownu taigi na umapikin: „Aksi mi ala san yu wani, dan mi o gi yu dati.”
23 Iya, Herodes ben sweri gi na umapikin: „Ala san yu e aksi mi, mi o gi yu, awansi na afu fu mi kownukondre.”
24 Dati meki na umapikin go na dorosei èn a aksi en mama: „San mi musu aksi?” A mama taki: „Na ede fu Yohanes a dopuman.”
25 Wantewante na umapikin lon go na inisei na a kownu, dan a taki san a ben wani: „Mi wani taki wantewante yu musu gi mi na ede fu Yohanes a Dopuman na tapu wan plata preti.”
26 A kownu ben sari trutru, ma toku a no ben wani taigi na umapikin taki a no wani, fu di a ben meki wan sweri na fesi den sma di ben sidon drape nanga en na tafra.
27 Dati meki wantewante a kownu gi wan fu den waktiman fu en a komando fu tyari Yohanes ede kon gi en. Dan a waktiman gowe èn a koti Yohanes ede puru na ini strafu-oso.
28 Baka dati a tyari na ede kon na tapu wan plata preti, a gi na umapikin a preti, èn na umapikin tyari disi go na en mama.
29 Di den disipel fu Yohanes yere disi, den kon teki a dedeskin fu en èn den poti en na ini wan grebi.
30 Den apostel kon na Yesus èn den fruteri en ala san den du èn san den ben leri sma.
31 Ne a taigi den: „Kon meki wi wawan go na wan presi fu kan rostu pikinso.” A ben taki disi fu di furu sma ben tan kon na en èn den disipel no ben abi ten fu nyan.
32 Dati meki den teki boto fu go na wan tiri presi pe den wawan ben kan de.
33 Ma sma si di den e gowe èn furu sma ben kon sabi dati. Nanga futu sma fu ala den foto lon go drape èn den doro fosi den.
34 Di a komopo na ini a boto, a si wan heri ipi sma. Ma a ben sari den, bika den ben de leki skapu di no abi wan skapuman. Dan a bigin leri den furu sani.
35 Di a ben kon lati kaba, den disipel fu en kon na en èn den taki: „A presi fara, èn a lati kaba.
36 Seni den sma gowe, so taki den kan go na den dorpu na ini a birti èn na den pikin foto fu bai wan sani fu nyan.”
37 A piki den: „Gi den wan sani fu nyan.” Ne den taigi en: „Wi musu teki tu hondro solfru moni* fu bai brede gi den sma meki den nyan?”
38 A taigi den: „Omeni brede unu abi? Go luku.” Baka di den go luku, den taki: „Feifi brede nanga tu fisi.”
39 Dan a taigi ala den sma meki den go sidon na ini grupu na tapu a grun grasi.
40 Na so den sma go sidon na ini grupu fu wán hondro sma èn na ini grupu fu feifitenti sma.
41 Dan a teki den feifi brede nanga den tu fisi, a luku go na hemel èn a taki Gado tangi. Baka dati a broko den brede èn a gi den disipel meki den prati den gi den sma. A prati den tu fisi èn a gi ala den sma.
42 Na so ala den sma nyan den bere furu.
43 Baka dati den piki den pisi brede èn den furu twarfu baskita nanga dati, ma fisi ben tan abra tu.
44 Feifi dusun man nyan fu den brede dati.
45 Wantewante a taigi den disipel fu en fu go na ini a boto, so taki den ben kan bigin go na abrasei na a tra syoro na a sei fu Betsaida. Baka dati a seni den sma gowe.
46 Baka di a taki den adyosi, a go na wan bergi fu begi.
47 A ben de neti di a boto ben de na mindrisei fu a se, ma en wawan ben de na syoro.
48 A si taki a ben hebi gi den disipel fu tyari a boto, fu di winti ben wai bun tranga kon na den tapu. Dati meki na musudei mamanten a waka na tapu a se fu kon na den, ma a ben du neleki a ben o waka pasa den.
49 Di den si taki a e waka na tapu a se, den prakseri: „San na a sani dati?” Ne den bari.
50 Den alamala frede di den si en. Ma wantewante a taigi den: „Abi deki-ati, na mi. No frede.”
51 Dan a kren go na ini a boto èn a winti saka. Di den si disi, den fruwondru srefisrefi.
52 Den no ben frustan ete san a wondru fu den brede ben wani taki. A ben tranga gi den fu frustan.
53 Di den abra a se, den doro na a kondre Geneisaret èn den libi a boto drape na a syoro.
54 Ma di den komopo na ini a boto, sma si taki na en.
55 Sma fu a heri kontren drape lon kon èn den tyari siki sma kon na tapu bedi na a presi pe den ben yere taki a de.
56 Na ala dorpu noso foto noso boitipresi pe a ben go, sma ben tyari siki sma kon na den wowoyo, èn den ben begi en efu den ben kan fasi a franya fu en dyakti nomo. Ala sma di ben fasi a franya, ben kon betre.
Futuwortu
^ Griki wortu: denari. Luku „Moro sani”, nr. 15.
