Mateyus e fruteri 25:1-46
25 A Kownukondre fu hemel de leki tin nyunwenke di ben teki den lampu fu den èn den waka go miti a trowmasra.
2 Feifi fu den ben don èn feifi fu den ben koni.
3 Den donwan ben tyari den lampu fu den, ma den no ben tyari oli.
4 Den koniwan ben tyari den lampu fu den èn den ben tyari oli tu na ini olibatra.
5 Fu di a trowmasra no ben kon ete, meki den alamala bigin dyonko èn den fadon na sribi.
6 Ma mindrineti sma bari: ’Luku, a trowmasra e kon! Un waka go miti en.’
7 Ne ala den nyunwenke opo èn den sreka den lampu fu den.
8 Den donwan taigi den koniwan: ’Gi wi pikinso oli, bika a faya fu den lampu fu wi e suku fu dede.’
9 Den koniwan piki den: ’Kande na oli no sari gi wi nanga unu. Ma go na den sma di e seri oli èn go bai gi unsrefi.’
10 Di den donwan gowe go bai oli, dan a trowmasra doro èn den nyunwenke di ben sreka densrefi go nanga en na a trow-oso na inisei. Ne a doro tapu.
11 Baka wan pisi ten den tra nyunwenke kon tu. Den taki: ’Masra, Masra, opo a doro gi wi!’
12 A piki den: ’Fu tru mi e taigi unu: Mi no sabi unu.’
13 Fu dati ede, tan na ai bika unu no sabi a dei noso a yuru.
14 A Kownukondre fu hemel de leki wan sma di ben de fu go na wan tra kondre. A kari den srafu fu en kon èn a gi den a gudu fu en meki den luku en.
15 A gi wan srafu feifi talenti,* wan trawan a gi tu talenti, ete wan trawan a gi wán talenti, fu di a ben sabi san ibriwan fu den ben man du. Baka dati a go na wan tra kondre.
16 Wantewante a srafu di ben kisi den feifi talenti, gowe go du bisnis nanga den talenti èn a kisi ete feifi talenti.
17 A srafu di ben kisi den tu talenti, du a srefi sani èn a kisi ete tu talenti.
18 Ma a srafu di ben kisi soso wán talenti, go diki wan olo èn a kibri a solfru moni fu en masra.
19 Baka wan heri pisi ten, a masra fu den srafu kon èn a kon seti moni-afersi nanga den.
20 Dati meki a srafu di ben kisi feifi talenti, kon nanga ete feifi talenti. A taki: ’Masra, yu ben gi mi feifi talenti. We, mi kisi ete feifi talenti.’
21 A masra fu en taigi en: ’Heri bun, yu na wan bun srafu di e du en wroko bun! Yu sorgu bun gi den pikinso sani di yu kisi. Mi o poti yu fu luku furu sani. Prisiri nanga yu masra.’
22 Baka dati, a srafu di ben kisi den tu talenti, kon èn a taki: ’Masra, yu ben gi mi tu talenti. We, mi kisi ete tu talenti.’
23 A masra fu en taigi en: ’Heri bun, yu na wan bun srafu di e du en wroko bun! Yu sorgu bun gi den pikinso sani di yu kisi. Mi o poti yu fu luku furu sani. Prisiri nanga yu masra.’
24 Te fu kaba, a srafu di ben kisi a wán talenti, kon èn a taki: ’Masra, mi sabi taki yu na wan muilek man, taki yu e koti nyanyan pe yu no sai èn taki yu e teki aleisi pe yu no wai aleisi.
25 Dati meki mi kon frede èn mi go kibri a talenti fu yu na ondro gron. Luku dya, disi na fu yu.’
26 A masra piki en: ’Yu takru èn lesi srafu, yu ben sabi taki mi e koti nyanyan pe mi no sai èn taki mi e teki aleisi pe mi no wai aleisi, a no so?
27 We, dan yu ben musu poti a solfru moni fu mi na bangi, so taki te mi ben o kon, mi ben o kisi mi moni baka nanga rente.
28 Fu dati ede, un puru a talenti na en anu, dan un gi dati na a srafu di abi den tin talenti.
29 Bika ibri sma di abi kaba, o kisi moro èn a o abi pasa marki. Ma a sma di no abi noti, den o teki srefi san a abi, puru dati na en anu.
30 Trowe a srafu di no warti noti, go na dorosei na ini a dungru. Drape a o krei èn a o kaw tifi.’
31 Te a Manpikin fu libisma kon nanga en glori, makandra nanga ala den engel, dan a o go sidon na tapu en gran kownusturu.
32 Den o tyari ala pipel kon na en fesi èn a o prati den sma neleki fa wan skapuman e prati den skapu fu den bokoboko.
33 A o poti den skapu na en reti-anusei, ma den bokoboko a o poti na en kruktu-anusei.
34 Dan a Kownu o taigi den sma na en reti-anusei: ’Un kon, unu di mi Tata blesi, èn teki a Kownukondre di sreka gi unu sensi a ten di grontapu seti.
35 Bika di angri kiri mi, unu gi mi wan sani fu nyan. Di watra kiri mi, unu gi mi wan sani fu dringi. Unu no ben sabi mi èn mi no ben abi wan presi fu tan, ma toku unu teki mi na ini oso.
36 Di mi ben de nanga sososkin, unu gi mi krosi fu weri. Di mi siki, unu sorgu gi mi. Di mi ben de na strafu-oso, unu kon luku mi.’
37 Dan den sma di Gado feni bun o piki en: ’Masra, o ten wi si taki angri kiri yu èn wi gi yu nyanyan? O ten wi si taki watra kiri yu èn wi gi yu wan sani fu dringi?
38 O ten wi si yu leki wan trakondre sma èn wi teki yu na ini oso? O ten yu ben de nanga sososkin èn wi gi yu krosi fu weri?
39 O ten wi si taki yu siki noso taki yu ben de na strafu-oso èn wi kon luku yu?’
40 Dan a Kownu o piki den: ’Fu tru mi e taigi unu: Efu unu du dati gi wan fu den moro mofina brada fu mi dya, dan unu du dati gi mi tu.’
41 Ma a o taigi den sma di de na en kruktu-anusei: ’Un komopo na mi tapu, un sma di Gado krutu. Unu o go na ini a têgo faya di sreka gi Didibri nanga den engel fu en.
42 Bika di angri kiri mi, unu no gi mi noti fu nyan. Di watra kiri mi, unu no gi mi noti fu dringi.
43 Mi ben de wan trakondre sma, ma toku unu no teki mi na ini oso. Di mi ben de nanga sososkin, unu no gi mi noti fu weri. Di mi siki èn mi ben de na strafu-oso, unu no luku mi.’
44 Dan den o piki en tu: ’Masra, o ten wi si taki angri kiri yu èn taki watra kiri yu? O ten wi si yu leki wan trakondre sma? O ten wi si taki yu ben de nanga sososkin, taki yu siki, taki yu ben de na strafu-oso, dan wi no yepi yu?’
45 Dan a o piki den, taki: ’Fu tru mi e taigi unu: Efu unu no du dati gi wan fu den mofinawan disi, dan unu no du en gi mi tu.’
46 Den sma disi o dede fu têgo, ma den sma di Gado feni bun o kisi têgo libi.”
Futuwortu
^ Luku „Moro sani”, nr. 15.
