Mika 7:1-20
7 Pôti fu mi. Mi tron leki wan sma di no feni nowan bosu droifi fu nyan. A e lostu figa, ma nowan switi figa de. Sma piki ala den droifi nanga ala den froktu di e gro na a waran ten fu a yari.
2 Nowan bun-ati sma de moro na grontapu èn nowan sma de moro di e du san reti. Den alamala e luru fu kiri sma. Ibriwan fu den e poti wan nèt fu fanga en brada.
3 Den lobi fu du san ogri, èn den sabi fa fu du en tu. Den edeman wani taki sma musu gi den sani, èn den krutuman e du den wroko soso te sma pai den. Te wan heihei man taki dati a wani wan sani trutru, dan a e span anu makandra nanga den krutuman èn nanga den edeman fu du san a wani.
4 Srefi a moro bun sma na den mindri de leki wan makabusi. Srefi a moro reti-ati sma na den mindri e dyuku moro wan skotu fu makabon. Ma den waktiman fu unu ben taki dati wan dei o kon te Gado o poti prakseri na unu. A dei dati o kon trutru. Dan unu o bruya.
5 No bribi yu mati. Srefi yu bun mati yu no musu frutrow. Luku bun san yu e taigi yu wefi di e didon na yu sei.
6 Bika manpikin e wisiwasi den papa, èn umapikin e meki trobi nanga den mama. Wefi e meki trobi nanga a mama fu den masra. Sma abi feanti na ini den eigi osofamiri.
7 Ma mi dati o wakti Yehovah. Nanga pasensi mi o wakti mi Gado di o frulusu mi. Mi Gado o yere mi.
8 Mi feanti, yu no musu prisiri taki den sani disi e miti mi. Mi fadon, ma mi o opo baka. Mi e tan na ini dungru, ma Yehovah o de wan leti gi mi.
9 Mi o teki na atibron fu Yehovah teleki a krutu na afersi fu mi na wan reti fasi, bika mi sondu teige en. A o tyari mi kon na ini a leti baka èn mi o si a retidu fu en.
10 Te mi feanti o si dati, dan a o firi syen, bika a ben taigi mi: „Pe Yehovah yu Gado de?” Nanga mi eigi ai mi o si fa rampu o miti mi feanti. Sma o trapu en leki tokotoko na tapu strati.
11 Na a dei te unu o bow den ston skotu, den o puru a komando* di abi fu du nanga unu.
12 Na a dei dati sma o komoto fu ala sei kon na ini a kondre. Den o komoto fu Asiria èn fu den foto fu Egepte. Den o komoto fu a heri kontren fu Egepte te na a Gran Liba,* fu a wan se te na a tra se, èn fu a wan bergi te na a tra bergi.
13 Den sani di den sma drape e du, o meki taki a kondre tron wan brokopresi.
14 Tyari yu pipel leki wan skapuman di e tyari en skapu nanga en tiki. Den de yu skapu di ben e tan den wawan na ini wan froktudyari na mindri busi. Meki den nyan grasi na Basan nanga Gilead, soleki fa den ben e du fosi.
15 „Mi o meki unu si wondru, neleki fa mi ben du dati di unu komoto fu a kondre Egepte.
16 Te den tra pipel o si den sani disi, den o firi syen, fu di den o si taki a bigi makti fu den na noti. Nanga den anu den o tapu den mofo, èn den o kon dofu.
17 Neleki sneki den o nyan doti. Den o komoto fu den kibripresi neleki sneki di bruya. Beifibeifi den o kon na wi Gado Yehovah. Den o frede yu.”
18 Sortu gado de leki yu? Yu e gi yu pipel di tan abra, pardon fu den sondu èn yu no e tan prakseri a fowtu di den meki. Noiti yu o tan nanga atibron fu ala ten, bika yu lobi fu du bun.
19 Yu o abi sari-ati gi wi baka, èn yu o tapu den fowtu fu wi. Yu o trowe ala den sondu fu wi na ini a dipi se.
20 Ala sani di yu taigi Yakob ben tru èn yu ben du bun gi Abraham. Na so yu o libi nanga wi tu, bika na dati yu ben pramisi den afo fu wi sensi owruten.
