Nahum 1:1-15
1 A krutuboskopu gi Ninefei skrifi na ini a buku di e taki fu a fisyun fu Nahum, wan man fu Elkos. Disi na san skrifi na ini a buku:
2 Yehovah na wan Gado di wani taki sma anbegi en wawan èn a e strafu sma te den e du ogri. Yehovah e strafu sma èn a o kisi bigi atibron. Yehovah e pai den gensman fu den ogri di den e du, èn a abi bita-ati gi den feanti fu en.
3 Yehovah ati no e bron esi èn a abi furu krakti. Te Yehovah musu strafu wan sma, a no o draidrai fu du dati.
A e gebroiki draiwinti nanga bigi winti. Den wolku de leki finifini doti na ondro en futu.
4 A e piri-ai gi a se, èn a e meki a se kon drei. Iya, a e meki ala den liba lon drei.
Basan nanga Karmel kon drei èn ala den bromki fu den bon fu Libanon kon drei tu.
5 A meki den bergi srefi seki, èn a meki den pikin bergi smèlter.
A grontapu, den gron, nanga ala sma di e tan drape, o beifi fu di a de drape.
6 Suma man tan tanapu te en ati e bron? Suma man opo ensrefi te a de nanga bigi atibron?
Neleki faya a o kanti en atibron na den tapu, èn a o hari den bigi ston kon na ondro.
7 Yehovah bun. A de wan fortresi na ini ten fu banawtu.
A sabi den sma di e kon kibri na en.
8 A o meki wan frudu pasa na ini a foto fu pori a foto krinkrin. Dungru o de na ala sei pe den feanti fu en e go.
9 San unu e denki fu du nanga Yehovah? A o pori unu krinkrin.
Banawtu no o kon ete wan leisi.
10 Den sma fu Ninefei de leki wan skotu fu makabon pe sma no man pasa na mindri. Den de leki drunguman di dringi biri. Ma toku den o bron gowe leki drei grasi.
11 Wan sma o komoto fu yu. A abi na prakseri fu du Yehovah pipel ogri. A e gi rai di no warti noti.
12 Disi na san Yehovah taki: „Den Asiriasma tranga srefisrefi. Iya, furu fu den no e mankeri noti. Ma awinsi dati de so, toku sma o kon feti nanga den èn kiri den alamala. Mi o strafu yu, Yuda, teleki a no de fanowdu fu strafu yu moro.
13 Now mi o broko a tyatyari di Asiria poti na yu tapu, èn mi o hari den banti koti di a gebroiki fu tai yu.
14 Disi na san Yehovah taki fu yu, Ninefei: ’Nowan sma o de moro di o tyari yu nen. Mi o broko den popki di de na ini den oso fu yu gado. Mi o meki wan beripe gi yu, fu di yu na noti.’
15 Luku den futu fu wan sma di e waka na tapu den bergi fu tyari bun nyunsu. A e fruteri sma fu wan bun ten. Yuda, yu musu hori den fesa fu yu. Du san yu ben sweri fu du. Noiti moro wan wisiwasi sma o pasa na ini yu foto. Ala den sma fu en o dede gowe.”
