Nehemia 13:1-31
13 A dei dati, sma leisi a buku fu Moses gi a pipel. Na ini a buku ben skrifi taki noiti den Amonsma nanga den Moabsma ben musu kon moksi nanga a pipel fu a tru Gado,
2 fu di den no yepi den Israelsma di den ben abi brede nanga watra fanowdu. Na presi fu dati, den ben yuru Bileam fu go fluku den Israelsma. Ma wi Gado ben kenki a fluku fu Bileam kon tron wan blesi.
3 Di den Israelsma yere san a Wet e taki, den bigin puru ala den trakondre sma* na den mindri.
4 Fosi den sani disi psa, Priester Eliasib, wan famiri fu Tobia, ben de basi fu den maksin* fu na oso* fu wi Gado.
5 A ben gi Tobia wan fu den bigi maksin.* Fosi, sma ben e poti n’nyan-ofrandi, switismeri sani nanga wrokosani drape. Te den Leifisma, den singiman nanga den waktiman fu den portu, ben e kisi a di fu tin pisi* fu sani soleki aleisi, nyun win nanga oli, dan den ben e poti den sani disi na ini a maksin dati tu, makandra nanga den sani di den priester ben musu kisi.
6 Na a ten di den sani disi ben e psa, mi no ben de na Yerusalem. Mi ben drai go baka na Kownu Artakserkses na ini a di fu 32 yari di a ben e tiri Babilon. Bakaten mi aksi Kownu efu mi ben kan gwe baka fu wan pisi ten.
7 Di mi doro Yerusalem, mi si a bigi ogri di Eliasib du. A ben gi Tobia wan fu den maksin na ini a fesdyari fu na oso fu a tru Gado.
8 Mi no ben lobi a sani disi srefsrefi. Dati meki mi trowe ala den tafra, den sturu nanga den tra ososani fu Tobia go na dorosei fu a maksin.*
9 Baka dati mi taigi sma fu krin den maksin.* Dan mi poti den wrokosani fu na oso fu a tru Gado, den n’nyan-ofrandi nanga den switismeri sani baka na insei.
10 Mi ben yere tu taki a pipel no ben e gi den Leifisma san den ben musu kisi. Fu dati ede den Leifisma nanga den singiman tapu nanga den wroko, dan ibriwan fu den go wroko den eigi gron.
11 Dati meki mi pir’ai gi den ondro-granman. Mi aksi den: „Fu san ede unu no sorgu na oso fu a tru Gado?” Dan mi meki den Leifisma kon makandra èn mi poti den na wroko baka.
12 Ne ala den sma fu Yuda tyari a di fu tin pisi fu sani soleki aleisi, nyun win nanga oli fu poti dati na ini den maksin.
13 Dan mi poti Priester Selemia, a skrifiman Sadok nanga wan Leifisma di nen Pedaya leki basi fu den maksin. Hanan ben e yepi den. Hanan ben de a manpkin fu Sakur èn wan bakapkin fu Matanya. Mi gi den man disi a wroko fu prati sani gi den famiriman fu den, fu di sma ben e fertrow den.
14 Ne mi begi: „Mi Gado, memre mi èn no fergiti den bun* di mi du gi na oso fu mi Gado èn den sani di mi seti fu meki sma sorgu na oso disi.”
15 Na a ten dati, mi si taki den sma na ini Yuda ben e masi droifi na ini baki èn den ben e tyari aleisi kon na wán tapu Sabat-dei. Den ben e poti aleisi, win, droifi, figa nanga ala sortu lai na tapu buriki, dan den ben e tyari den sani disi kon na ini Yerusalem na Sabat-dei. Dati meki mi warskow den fu no seri n’nyan-sani na a dei dati.*
16 Den Tirus-sma di ben e tan na ini a foto ben e tyari fisi nanga ala sortu sani kon drape, dan den ben e seri den gi den sma fu a lo fu Yuda na ini Yerusalem tapu Sabat-dei.
17 Dati meki mi pir’ai gi den edeman fu Yuda. Mi aksi den: „San na a ogri di unu e du? Fu san ede unu no e sori lespeki gi a Sabat-dei?
18 A no a sani disi den afo fu unu ben e du? Dati meki wi Gado ben meki ala sortu ogri miti wi nanga a foto disi. Dan now unu e meki Gado ati bron moro tapu Israel fu di unu no e sori lespeki gi a Sabat-dei.”
19 Sobun, na a mofoneti fosi Sabat-dei, mi taigi den wantewante taki den musu tapu den portu fu Yerusalem. Boiti dati, mi taigi den taki den no musu opo den doro, solanga a Sabat-dei no psa. Dan mi poti wan tu fu mi eigi futuboi na den portu, so taki sma no ben man tyari nowan lai kon na insei tapu Sabat-dei.
20 Dati meki den bisnisman nanga den sma di ben e seri ala sortu sani ben abi fu sribi dorosei fu Yerusalem. Wán noso tu leisi a sani dati psa.
21 Ne mi warskow den fu no du a sani disi moro. Mi taigi den: „Fu san ede unu e sribi na fesi a skotu? Efu unu du dati ete wan leisi, dan nanga tranga mi o puru unu fu dya.” Sensi a ten dati, den no kon moro tapu Sabat-dei.
22 Baka dati mi taigi den Leifisma taki ibri tron te den ben o kon fu hori wakti na den portu, den ben musu krin densrefi. Na so den ben o sori lespeki gi a Sabat-dei. Ne mi begi: „Mi Gado, memre taki mi du den sani disi tu. Mi e begi yu, sori sar’ati gi mi, fu di yu na wan sma di abi bun-ati psa marki.
23 Na a ten dati, mi si tu taki son Dyu ben trow nanga* uma fu Asdod, Amon nanga Moab.
24 Afu fu den manpkin fu den ben e taki a tongo fu den Asdodsma èn afu fu den ben e taki den tongo fu tra pipel. Ma nowan fu den ben sabi taki a tongo fu den Dyu.
25 Fu dati ede mi pir’ai gi den Dyu disi èn mi fluku den. Mi naki wan tu fu den man èn mi hari den w’wiri puru. Dan mi meki den sweri na fesi Gado. Mi taigi den: „Un no musu meki den umapkin fu unu trow nanga den manpkin fu den èn un no musu teki den umapkin fu den gi den manpkin fu unu, noso gi unsrefi.
26 A no trakondre uma meki Kownu Salomo fu Israel sondu? Nowan kownu fu den tra pipel ben de leki a kownu disi. A Gado fu en ben poti en leki kownu fu heri Israel, fu di a ben lobi en. Ma tòg den trakondre uma meki a kownu disi sondu.
27 Unu no e syen fu du a bigi ogri disi? Unu trangayesi den wet fu wi Gado, fu di unu trow nanga trakondre uma.”
28 Wan fu den manpkin fu Yoyada, a manpkin fu Granpriester Eliasib, ben trow nanga wan umapkin fu Sanbalat fu Bet-Horon. Dati meki mi yagi en kmoto na mi tapu.
29 Ne mi begi: „Mi Gado, no fergiti taki den no sori nowan lespeki gi a priesterwroko nanga a ferbontu di yu ben meki nanga den priester èn nanga den Leifisma.”
30 Dan mi puru ala den trakondre sma nanga den sani fu den na ini Israel. Na so den Israelsma kon krin. Dan mi poti den priester nanga den Leifisma na wroko. Mi poti ibriwan fu den fu du en eigi wroko.
31 Boiti dati, mi poti wan tu fu den fu tyari udu kon na spesrutu ten èn fu tyari den fosi lepi froktu kon.
Ne mi begi: „Tye mi Gado, memre den bun sani di mi du.”
Futuwortu
^ Noso: „ala sma di de afu trakondre sma”.
^ Noso: „n’nyan-kamra”.
^ Noso: „a tempel”.
^ Noso: „n’nyan-kamra”.
^ Noso: „wan tiende”.
^ Noso: „n’nyan-kamra”.
^ Noso: „n’nyan-kamra”.
^ Noso kande: „A dei dati mi warskow den fu no seri den n’nyan-sani disi”.
^ Noso: „ben teki ini den oso”.
