Nehemia 5:1-19
5 Ma den man nanga den frow fu den opo den sten èn den bigin krutu fu den sani di den tra Dyu ben e du.
2 Sonwan fu den sma ben e taki: „Wi abi furu manpkin nanga umapkin. Wi abi n’nyan fanowdu fu tan na libi.”
3 Trawan ben e taki: „Wi panti den gron, den droifidyari nanga den oso fu wi fu man feni n’nyan na ini na angriten disi.”
4 Wan tra grupu sma ben e taki: „Wi panti den gron nanga den droifidyari fu wi fu man abi moni fu pai Kownu a moni di a e aksi wi.
5 Den tra Dyu na wi famiri* èn den pkin fu den no bun moro den pkin fu wi. Ma tòg wi abi fu meki wi manpkin nanga wi umapkin tron srafu fu den. Wan tu umapkin fu wi na srafu fu den kba. Ma wi no man du noti, fu di den gron nanga den droifidyari fu wi na fu tra sma now.”
6 Di mi yere fa den sma ben e krutukrutu èn san den ben e taki, dan mi kisi bigi atibron.
7 Di mi go denki a tori disi bun, dan mi pir’ai gi den edeman nanga den ondro-granman. Mi taigi den: „Unu e teki tumsi furu rente fu den famiriman fu unu.”
Baka dati mi seti wan bigi konmakandra fu taki fu den sani di den man disi ben e du.
8 Ne mi taigi den: „Wi du ala muiti fu bai den Dyu brada fu wi fu den trakondre sma di ben bai den leki srafu. Dan now unu e seri un eigi kondreman leki srafu. Na bai wi musu bai den baka?” Di den yere disi, den tan pî. Den no ben man taki noti.
9 Dan mi taki: „A sani di unu e du, no bun. Un no e frede Gado noh? Dalek den trakondre sma di de feanti fu wi o spotu wi.
10 Mi, den brada fu mi nanga den futuboi fu mi e leni den sma moni tu èn den e borgu n’nyan na wi. Mi e begi unu, meki wi no aksi sma rente moro te den leni moni fu wi.
11 Mi e begi unu, un gi den sma den sani fu den baka, tide ete. Den musu kisi den gron baka pe den ben e prani droifi, olèif nanga tra sani èn den musu kisi den oso fu den tu. Boiti dati, un musu gi den sma wán procent* fu a moni, a n’nyan, a nyun win nanga na oli di unu ben teki fu den leki rente.”
12 Ne den man piki mi: „Wi o gi den sma ala den sani fu den baka èn wi no o aksi den noti moro. Wi o du ala san yu taki.” Dati meki mi kari den priester. Dan mi meki ala den sma di ben du den sortu ogri disi, sweri na fesi den priester taki den ben o du san den pramisi.
13 Boiti dati, mi seki ala sani puru na ini a borsusaka* fu mi krosi. Dan mi taki: „Na so a tru Gado musu seki ala gudu puru na ini na oso fu ibri sma di no e du san a pramisi. Na a fasi disi, Gado o seki ala sani puru, so taki a sma dati no abi noti moro.” Ne a heri pipel taki: „Amen!”* Dan a pipel prèise Yehovah èn den du san den pramisi.
14 Ete wan sani: Na ini a di fu 20 yari di Artakserkses ben e tiri leki kownu, a poti mi leki granman fu den Dyu na ini a kontren fu Yuda. Sensi a ten dati, te go miti a di fu 32 yari di Kownu Artakserkses ben e tiri, sobun na ini ala den 12 yari dati, mi nanga den brada fu mi no teki a n’nyan di mi leki granman ben abi reti na tapu.
15 Ma den sma di ben de granman fosi mi, ben e pina a pipel. Ibri dei, a pipel ben musu pai den granman 40 pisi solfru moni,* so taki den granman ben kan bai n’nyan nanga win gi densrefi. Den futuboi fu den ben e pina a pipel tu. Ma fu di mi ben abi bigi lespeki gi Gado, meki mi no du a sani dati.
16 Boiti dati, mi srefi yepi fu bow a skotu disi èn mi meki ala den futuboi fu mi kon yepi nanga a wroko. Nowan gron wi teki gi wisrefi.
17 Ala nanga ala, 150 Dyu nanga ondro-granman ben e nyan na mi tafra, makandra nanga den trakondre sma di ben kon na wi.
18 Ibri dei den ben e sreka* den sani disi gi mi: wán mankaw, siksi fu den moro bun skapu nanga difrenti sortu fowru. Ibri tin dei ala sortu win ben de bogobogo na a tafra fu mi. Tòg mi no dwengi a pipel fu gi mi a n’nyan di mi leki granman ben abi reti na tapu, fu di mi ben sabi o tranga a pipel ben e wroko.
19 Ne mi begi: „Tye mi Gado, memre mi leki wan bun sma èn no fergiti den sani di mi du gi a pipel disi.”
Futuwortu
^ Hebrewtongo: „A meti fu den brada fu wi na wi meti”.
^ Noso: „wan di fu hondro pisi”. Dati na san den ben musu gi ibri mun.
^ Noso: „ploi”. Den Israelsma ben abi wan ploi na a borsusei fu a krosi fu den. Den ben e gebroiki en leki saka fu poti sani na ini.
^ Noso: „Na so a de!”
^ Hebrew wortu: sikkel. Luku „Tra prenspari sani” B14.
^ Noso: „mi ben e meki sma bai”.
