Nehemia 9:1-38
9 Na a di fu 24 dei fu a mun disi, den Israelsma kon makandra. Den ben e faste,* den ben e weri den krosi di sma gwenti weri te den e sari èn den ben e trowe santi na tapu den ede.
2 Ne den bakapkin fu Israel kmoto na mindri den trakondre sma, dan den go tnapu na wan sei. Baka dati den taki sortu sondu den du èn sortu sondu den afo fu den du.
3 Dan den opo tnapu èn sma bigin leisi a wetbuku fu Yehovah, a Gado fu den. Dri yuru langa* den leisi a wetbuku nanga wan tranga sten. Baka dati a pipel teki ete dri yuru fu taki sortu sondu den du èn den boigi fu anbegi Yehovah, a Gado fu den.
4 Ne Yesuwa, Bani, Kadmiyel, Sebanya, Buni, Serebia, Bani nanga Kenani go tnapu na tapu a hei podium pe den Leifisma ben e tnapu èn nanga wan tranga sten den bari kari Yehovah, a Gado fu den.
5 Dan den Leifisma Yesuwa, Kadmiyel, Bani, Hasabneya, Serebia, Hodia, Sebanya nanga Petaya taki: „Un opo prèise Yehovah un Gado fu têgo èn fu ala ten.* Meki sma prèise yu bigi nen di warti fu kisi ala prèise nanga grani.
6 Yu w’wan na Yehovah. Yu srefi meki hemel, iya, srefi den moro farawe pisi fu hemel nanga ala sani di de na ini hemel. Na yu meki grontapu nanga ala den sani di de na tapu èn a se nanga ala den sani di de na ini. Na yu e hori ala sani na libi èn ala den sani na hemel e boigi gi yu.
7 Yu na Yehovah, a tru Gado di ben teki Abram leki futuboi. Na yu tyari en kmoto na Ur fu den Kaldeyasma èn na yu kenki en nen kon tron Abraham.
8 Yu ben si taki a lobi yu nanga en heri ati. Fu dati ede yu meki wan ferbontu nanga en fu gi en nanga den bakapkin fu en a kondre fu den Kanansma, den Hètsma, den Amorietsma, den Feresietsma, den Yeibus-sma nanga den Girgas-sma. Yu du san yu pramisi, fu di ala ten yu e du san reti.
9 Dati meki yu poti prakseri na den afo fu wi di den ben e pina na Egepte èn yu yere di den ben e bari kari yu na a Redi Se.
10 Yu du bigi sani nanga wondru na fesi a kownu fu Egepte, na fesi ala den futuboi fu en èn na fesi ala sma na ini a kondre fu en, bika yu ben sabi taki den sma disi ben e wiswasi den afo fu wi. Na so yu meki sma kon sabi yu nen te na a dei fu tide.
11 Leti na den fesi yu prati a se na tu, so taki den ben kan waka psa na ini a se na tapu drei gron. Ma den sma di ben e hari go na den baka, yu trowe na ini a se, neleki fa sma e trowe wan ston go na ini wan krasi se.
12 Na deiten yu sori den a pasi nanga yepi fu wan wolku di gersi wan pilari èn na neti yu meki wan pilari fu faya skèin gi den fu sori den pe den musu waka.
13 Dan yu saka kon na tapu Sinai-bergi èn yu taki nanga den kmoto fu hemel. Ne yu sori den fa fu koti krutu na wan reti fasi èn yu gi den wet fu sori den san tru.* Boiti dati, yu sori den san den musu du fu abi wan bun libi èn na sortu wet den musu hori densrefi.
14 Yu ferteri den fa den musu hori yu santa Sabat èn yu meki yu futuboi Moses taigi den san na den wet fu yu èn na sortu sani den musu hori densrefi.
15 Di angri kiri den, yu gi den brede fu hemel èn di watra kiri den, yu meki watra kmoto na ini wan stonbergi gi den. Bakaten yu taigi den fu go na ini a kondre èn fu teki en abra. Na yu ben sweri* taki yu ben o gi den a kondre dati.
16 Ma den afo fu wi ben kisi heimemre èn den ben kon tranga-ede.* Den no ben wani arki den wet fu yu.
17 Den no ben wani arki èn den fergiti ala den wondru di yu ben du gi den. Den ben kon tranga-ede* èn den poti wan edeman fu tyari den go baka na Egepte fu tron srafu. Ma yu na wan Gado di lobi gi sma pardon èn di e firi gi sma. Yu abi sar’ati, yu ati no e bron esi èn yu e sori sma bun-ati* psa marki. Dati meki yu no gwe libi den.
18 Den ben meki* wan gowtu popki di gersi wan pkin kaw èn den ben taki: ’Disi na un Gado di tyari un kmoto na ini a kondre Egepte.’ Ne den du ala sortu sani di sori taki den no abi nowan lespeki gi yu.
19 Tòg yu no gwe libi den na ini a sabana, fu di yu abi furu sar’ati. Na deiten yu tan sori den a pasi nanga yepi fu a wolku di gersi wan pilari èn yu no puru a pilari fu faya di ben e sori den pe den ben musu waka na neti.
20 Yu gi den a bun yeye fu yu, so taki den kisi koni. Ibri tron baka yu gi den mana fu nyan èn di watra kiri den, yu gi den watra fu dringi.
21 Yu gi den n’nyan na ini a sabana 40 yari langa. Den no ben e mankeri noti. Den krosi fu den no ben e broko èn den futu fu den no ben e sweri.
22 Yu meki den wini kownukondre nanga pipel èn te fu kba yu gi ibriwan fu den wan pisi fu a kondre. Na so den teki a kondre fu Kownu Sihon fu Hesbon abra èn den teki a kondre fu Kownu Ok fu Basan abra tu.
23 Yu meki den pkin fu den kon furu leki den stari na hemel. Dan yu tyari den go na ini a kondre di yu ben pramisi den afo fu den taki den ben o teki en abra.
24 Sobun, den pkin fu den go na ini a kondre èn den teki en abra. Yu meki den wini den Kanansma di ben e tan na ini a kondre, so taki den ben kan du san den wani nanga den kownu èn nanga den pipel fu a kondre.
25 Den teki den foto abra di abi bigi skotu. Den teki den fatu gron, den oso di abi ala sortu bun sani na ini, den watrabaki di sma koti puru na ini ston èn den gron pe sma prani droifi, olèif nanga furu froktubon. Ne den bigin nyan, den bere kon furu, den kon fatu èn den ben e prisiri srefsrefi, fu di yu du furu bun sani gi den.
26 Ma bakaten den kon trangayesi èn den opo densrefi teige yu. Den wiswasi a Wet fu yu* èn den kiri den profeiti fu yu di ben gi den dek’ati fu drai kon baka na yu. Den du ala sortu sani di sori taki den no abi nowan lespeki gi yu.
27 Fu dati ede yu ben libi den gi den feanti fu den di ben tan pina den. Ma te den ben de na nowtu, den ben e bari kari yu èn na ini hemel yu ben yere a b’bari fu den. Fu di yu abi furu sar’ati, meki yu ben seni sma fu ferlusu den fu den feanti fu den.
28 Ma te sani ben e waka bun gi den, dan den ben e go du sani baka di yu no feni bun. Dati meki yu ben e libi den gi den feanti fu basi den.* Dan den ben e drai kon baka na yu èn den ben e bari kari yu fu yepi den. Na ini hemel yu ben yere a b’bari fu den èn ibri tron baka yu ben e ferlusu den, fu di yu abi furu sar’ati.
29 Yu tan warskow den, so taki den ben o hori densrefi na yu Wet baka, ma tòg den ben abi heimemre èn den no ben wani arki den wet fu yu. Den sondu teige den wet fu yu di e hori wan sma na libi te a e hori ensrefi na den. Fu di den ben tranga-ede, meki den drai baka gi yu, den kakafutu gi yu èn den no ben wani arki.
30 Furu yari langa yu ben abi pasensi nanga den èn yu meki yu yeye kon na tapu den profeiti fu yu fu warskow den. Tòg den no ben wani arki yu. Te fu kba, yu libi den gi den trakondre sma.
31 Fu di yu abi furu sar’ati, meki yu no figi den alamala puru èn yu no drai baka gi den. Fu tru, yu na wan Gado di e firi gi sma èn di abi sar’ati.
32 Wi Gado, yu na wan bigi Gado. Yu abi furu makti èn sma abi bigi lespeki gi yu. Ala ten yu e hori yusrefi na a ferbontu fu yu èn yu e sori bun-ati gi sma. Sensi a ten fu den kownu fu Asiria teleki now, furu problema miti wi, den kownu, den granman, den priester, den profeiti nanga den afo fu wi. Wi e begi yu fu no si den problema fu wi leki soso sani.
33 Yu na wan sma di e du san reti. A no yu meki den sani disi psa nanga wi. Ala ten yu du san yu pramisi, ma na wi go du ogri.
34 Den kownu, den granman, den priester nanga den afo fu wi no du san yu Wet e taki. Den no poti prakseri na den sani di yu taigi den fu du èn na den pir’ai* di yu gi den fu warskow den.
35 Den ben abi wan kownukondre. Yu ben gi den bun sani psa marki èn yu ben gi den na okasi fu tan na ini wan bigi kondre pe sani e gro bun. Ma tòg den no dini yu èn den tan du ogri.
36 Now wi kon de srafu. Di yu gi den afo fu wi a kondre disi, yu ben wani taki den ben musu nyan den froktu nanga den tra bun sani fu a kondre. Ma now wi de srafu na ini a srefi kondre disi.
37 Fu di wi ben sondu, meki yu poti kownu fu tra kondre fu tiri wi èn na den e kisi ala a n’nyan di e gro so furu na ini a kondre. Den e du san den wani nanga wi èn nanga den meti fu wi. Fu tru, wi de na ini bigi problema.
38 Sobun, nanga ala den sani disi na prakseri, wi e meki wan sweri di wi o skrifi na tapu papira. Dan den granman, den Leifisma nanga den priester fu wi o poti a stampu fu den na tapu a papira.”
Futuwortu
^ Hebrewtongo: „Wan di fu fo pisi fu a dei”.
^ Noso: „fu têgo te go miti fu têgo”.
^ Noso: „wet di den kan frutrow”.
^ Hebrewtongo: „opo yu anu”.
^ Hebrewtongo: „den ben tranga a neki fu den”.
^ Hebrewtongo: „Den ben tranga a neki fu den”.
^ Noso: „Den smèlter gowtu fu meki”.
^ Hebrewtongo: „Den trowe a Wet fu yu na den baka”.
^ Noso: „masi den”.
^ Noso: „warskow”.
