Numeri 36:1-13
36 Bakaten den edeman fu den Gileadsma di de bakapikin fu Makir, Manase, nanga Yosef, kon na Moses nanga den edeman fu den lo fu Israel.
2 Den taki: „Yehovah taigi Masra Moses taki a musu iti lòt fu prati a kondre gi den Israelsma. Yehovah taigi Masra Moses tu taki a musu gi a pisi gron fu wi brada Selafeyad na den umapikin fu en.
3 Efu wan man fu wan fu den tra lo fu Israel ben o trow nanga den umapikin disi, dan a pisi gron fu den umapikin no o de moro fu a lo fu wi, ma a o tron fu a lo fu den masra fu den. Na so wi o lasi a pisi gron dati.
4 Efu a de wan Prisiri-yari* na ini Israel, dan a pisi gron fu den uma o tron fu a lo fu den masra fu den èn a lo fu wi o lasi a pisi gron dati.”
5 Dan Moses taigi den Israelsma san Yehovah taigi en. A taki: „A lo fu den bakapikin fu Yosef abi leti.
6 Disi na san Yehovah taki fu den umapikin fu Selafeyad: ’Efu wan man wani teki wan fu den leki wefi, dan a kan trow nanga en. Ma na soso wan man na ini a lo fu a papa fu den kan trow nanga den.
7 Nowan gron fu wan fu den lo fu Israel musu kon de fu wan tra lo, bika ibri Israelsma musu sorgu taki a gron fu en tan na ini a lo fu en.
8 Ibri umapikin di kisi wan pisi gron na ini a lo fu en, musu trow nanga wan man na ini a lo fu en papa, bika na so a pisi gron fu en o tan na ini a lo dati.
9 Nowan gron fu wan fu den lo fu Israel musu kon de fu wan tra lo, bika ibri lo fu Israel musu sorgu taki den gron fu den tan na ini a lo fu den.’”
10 Ne den umapikin fu Selafeyad du ala san Yehovah taigi Moses.
11 Sobun, Makla, Tirsa, Hokla, Milka, nanga Noa, den umapikin fu Selafeyad, trow nanga den manpikin fu den papa brada.
12 Den trow nanga man na ini a lo fu Manase, a manpikin fu Yosef. Na so a gron fu den tan na ini a lo fu den papa.
13 Disi na den komando nanga den wèt di Yehovah taigi Moses fu gi den Israelsma na ini Moab-sabana na Yordan-liba, abrasei fu Yerikow.
Futuwortu
^ Noso: „a yari pe sma nanga sani e kon fri.”
