Numeri 5:1-31
5 Dan Yehovah taigi Moses:
2 „Taigi den Israelsma taki efu wan sma abi gwasi, efu en syenpresi e puru wan sortu watrawatra sani, noso efu a no krin fu di a fasi wan dedeskin, dan den musu puru en na ini a kampu.
3 Un musu seni a sma gowe, awinsi na wan mansma noso wan umasma. Un musu seni en go na dorosei fu a kampu, so taki a no doti den tra sma na ini a kampu pe mi e tan.”
4 Dan den Israelsma seni den sortu sma disi go na dorosei fu a kampu. Den Israelsma du ala san Yehovah ben taigi Moses.
5 Yehovah taigi Moses tu:
6 „Taigi den Israelsma: ’Efu wan man noso wan uma sondu teige wan trawan, dan a trangayesi Yehovah. A du wan ogri.
7 A musu taki sortu sondu a du èn a musu pai a heri paiman fu na ogri di a du. Boiti dati, a musu pai ete wan di fu feifi pisi fu a paiman. A musu pai a trawan, fu di a du ogri nanga en.
8 Ma efu a trawan dede èn nowan krosibei famiri de fu teki a sani di a sma musu pai, dan a sma musu gi a sani dati na Yehovah. A priester o kisi dati makandra nanga a manskapu di a sma o tyari fu aksi pardon fu a sondu di a du.
9 Ala den santa sani di den Israelsma o tyari kon, den musu gi a priester. Den sani dati o tron fu en.
10 Den santa sani di ibriwan fu den Israelsma o tyari kon, o de fu a priester ala ten. Awinsi sortu sani den tyari gi a priester, a sani dati o de fu en.’”
11 Baka dati Yehovah taigi Moses:
12 „Taigi den Israelsma: ’Kon meki wi taki dati a wefi fu wan man waka gi en, sobun a du sutadu.
13 A doti ensrefi, fu di wan tra man didon nanga en. Ne a kibri a tori gi en masra èn gi tra sma, èn buweisi no de taki a du so wan sani. Nowan sma ben si en.
14 Efu toku en masra kon dyarusu, fu di a e denki taki en wefi du sutadu, dan awinsi a wefi doti ensrefi noso a no doti ensrefi,
15 a masra musu tyari en wefi go na a priester makandra nanga na ofrandi fu en wefi. Na ofrandi musu de wán koba groto-blon. A no musu poti oli noso switismeri na tapu na ofrandi, bika a e tyari a nyanyan-ofrandi, fu di a dyarusu. A nyanyan-ofrandi disi na fu memre Gado taki wan sani di no bun pasa.
16 A priester musu tyari na uma go tanapu na fesi Yehovah.
17 Dan a musu poti santa watra na ini wan prapi. A musu teki pikinso finifini doti fu a gron fu a tabernakel, dan a musu poti en na ini a watra.
18 A priester musu meki na uma tanapu na fesi Yehovah, a musu lusu na uma en ede-wiwiri, dan a musu poti a nyanyan-ofrandi na ini na anu fu na uma. Na uma musu hori a nyanyan-ofrandi di en masra tyari fu di a e dyarusu, èn a priester musu hori a prapi nanga a bita watra di e tyari fluku kon.
19 A priester musu taigi na uma fu meki wan sweri. A musu taigi en: „Efu nowan tra man didon nanga yu èn efu yu no du wan sani di no krin aladi yu abi yu masra, dan yu no sa kisi takru bakapisi fu a bita watra disi di e tyari fluku kon.
20 Ma efu yu waka gi yu masra èn efu yu doti yusrefi fu di wan tra man didon nanga yu, . . .”
21 A priester musu meki na uma sweri taki fluku kan kon na en tapu efu a du den sani disi. A musu taigi na uma: „Efu yu du a sani disi trutru, Yehovah o meki taki yu no man kisi pikin* èn a o meki yu bere sweri. Dan Yehovah o meki yu pipel gebroiki yu nen fu fluku trawan èn fu meki sweri.
22 A watra disi di e tyari fluku kon o go na ini yu bere, yu bere o sweri, èn yu no sa man kisi pikin.” Dan na uma musu taki: „Amen! Amen!”*
23 Dan a priester musu skrifi den fluku na ini a buku èn a musu wasi den puru nanga a bita watra.
24 A musu meki na uma dringi a bita watra di e tyari fluku kon. A watra o bita na ini en bere.
25 Dan a priester musu teki a nyanyan-ofrandi na a anu fu na uma. A masra ben tyari dati gi en, fu di a e dyarusu. A priester musu buweigi a nyanyan-ofrandi go-kon na fesi Yehovah, dan a musu tyari dati go na a altari.
26 A priester musu teki pikinso fu a nyanyan-ofrandi èn a musu bron en na tapu na altari, so taki Gado feni a heri ofrandi bun. Dan a priester musu meki na uma dringi a watra.
27 Te a meki na uma dringi a watra èn a tru taki na uma doti ensrefi fu di a du sutadu, dan a watra di e tyari fluku kon o kon bita na ini en bere, en bere o sweri, èn a no o man kisi pikin. Gi a pipel, na uma o de wan sma di kisi fluku.
28 Ma efu na uma no doti ensrefi, sobun a krin, dan a no sa kisi a strafu dati, èn en masra musu gi en bere.
29 Disi na a wèt di e sori san musu pasa te wan masra dyarusu fu di en wefi waka gi en èn a doti ensrefi,
30 noso te wan masra e dyarusu fu di a e denki taki en wefi du sutadu. A musu tyari en wefi go na fesi Yehovah èn a priester musu du nanga na uma soleki fa a wèt disi e taki.
31 A man no du nowan ogri, ma a wefi fu en musu gi frantwortu fu na ogri di a du.’”
