Odo 12:1-28
12 A sma di lobi pir’ai lobi sabi,ma a sma di no lobi te trawan e bari en no abi ferstan.
2 Yehovah lobi sma di e du bun,ma a sma di abi takru prakseri a e si leki wan ogrisma.
3 Noiti sani o waka bun gi den sma di e du ogri,ma den ret’ati sma o tnapu steifi leki wan bon di rutu dipi.
4 Wan bun uma de leki wan kroon gi en masra,ma wan uma di e meki en masra kisi syen de leki wan siki di e pori en bonyo.
5 Den ret’ati sma e prakseri sani di bun,ma den ogrisma e gi trawan rai fu kori den.
6 Den wortu fu den ogrisma de leki wan sma di e luru fu kiri trawan,*ma a mofo fu den krin-ati sma o ferlusu den.
7 Te den puru den ogrisma na pasi, den no de moro,ma na osofamiri fu den ret’ati sma o tan.
8 Sma o prèise wan man di e taki koni sani nanga en mofo,ma den no o wani si a takru-ati sma na ai.
9 A moro betre fu de wan mofinasma di abi wan futuboi,leki fu de wan sma di e meki bigi aladi a no abi noti fu nyan.*
10 A ret’ati sma e sorgu bun gi en osometi,ma srefi a sar’ati fu den ogrisma na ogridu.
11 A sma di e wroko en gron o abi nofo n’nyan,ma a sma di e feti fu kisi sani di no warti noti no abi ferstan.*
12 Na ogrisma wani den sani di den takru-ati sma fanga,ma den ret’ati sma de leki wan bon di rutu steifi na ini a gron èn di e gi froktu.
13 Wan takr’ati sma e poti ensrefi na ini problema fu di a e sondu nanga en mofo.Ma a ret’ati sma e puru ensrefi na ini nowtu.
14 Den sani di wan man e taki kan meki sani waka bun gi enèn den sani di a e du o meki taki a kisi en pai.
15 Wan donsma denki taki ala ten a abi leti,ma wan konisma e arki rai.
16 Wan donsma e meki trawan si wantewante* taki en ati e bron,ma wan konisma no e piki te sma e taki sani fu gi en syen.
17 Wan sma di de fu fertrow e taki san tru* te a de na fesi krutu,ma wan falsi kotoigi o taki sani fu kori sma.
18 Te wan sma e taki sondro fu denki, dan a de neleki a e dyuku trawan nanga wan fet’owru,ma a tongo fu den koniwan na dresi.
19 Wan mofo di e taki san tru o tan fu têgo,ma a tongo di e taki lei no o tan langa.
20 Soso lei de na ini na ati fu den sma di e prakseri fu du ogri nanga trawan,ma den sma di e suku freide,* abi prisiri.
21 Nowan ogri o miti den ret’ati sma,ma soso problema o miti den ogrisma.
22 Yehovah e teige sma di e lei,ma a e prisiri nanga den sma di e du san reti.
23 Wan man di koni no e taki wantewante san a sabi,ma den sma di no abi ferstan e opo den mofo taki dondon sani.
24 A sma di e wroko tranga o de basi,ma wan lesiman o tron a srafu fu trawan.
25 Tumsi furu brok’ede e meki wan sma las’ati,ma te sma e taki switi nanga en, dan a e firi prisiri baka.
26 Wan ret’ati sma e luku bun sortu weigron bun gi en,ma wan ogrisma e teki wan pasi di e tyari en go lasi.
27 Wan lesiman no e go onti meti fu nyan,ma te wan sma e wroko tranga, dan dati na a bigi gudu fu en.
28 Te wan sma e waka a reti pasi a o kisi libièn te a e tan waka na tapu a pasi dati a no o si dede.
Futuwortu
^ Hebrewtongo: „di e d’don e wakti fu trowe brudu”.
^ Hebrewtongo: „brede fu nyan”.
^ Hebrewtongo: „e mankeri ati”.
^ Noso: „tapu a srefi dei”.
^ Hebrewtongo: „san reti”.
^ Hebrewtongo: „den sma di de raiman fu freide”.
