Odo 22:1-29
22 A moro betre fu abi wan bun nen,* leki fu abi furu gudu.A moro betre fu sma lespeki yu,* leki fu abi solfru nanga gowtu.
2 A guduman nanga a pôtiman na a srefi.*
Yehovah na a Mekiman fu den ala tu.
3 A koniwan e si taki ogri o miti en èn a e go kibri,ma a sma sondro ondrofeni e waka go doro èn dati meki sani no o waka bun gi en.*
4 Sakafasi nanga bigi lespeki gi Yehovahe gi wan sma gudu, glori nanga libi.
5 Wan sma di e du kruka sani e waka wan pasi di lai nanga maka nanga val di sma seti fu fanga en.Ma a sma di wani kibri en libi e tan fara fu den sani disi.
6 Leri wan boi* fu waka a yoisti pasi.Srefi te a kon owru, a no o kmoto fu a pasi dati.
7 A guduman e basi den pôtismaèn a sma di lobi leni moni, na wan srafu fu a sma di leni en a moni.
8 A sma di e sai ogri o koti bigi ogrièn na ogr’ati fasi fa a e basi sma* o kon na wan kba.
9 A sma di lobi gi sma sani* o kisi blesi,bika a e prati en n’nyan nanga den pôtiwan.
10 Yagi a spotuman gwe, dan trobi o gwe tu.Na so fasi sma no o hartaki* moroèn den no o taki hati sani moro fu broko trawan saka.
11 A sma di e du muiti fu abi wan krin ati èn fu taki na wan switi fasio de mati fu a kownu.
12 Yehovah e kibri sma di e waka nanga koni,*ma a e tyari den lei fu den bedrigiman kon na krin.
13 A lesiman taki: „Wan lew de na dorosei!
A o kiri mi leti na a pren!”*
14 A mofo fu huru-uma* na wan dipi olo.
A sma di Yehovah krutu o fadon go na ini na olo disi.
15 Don de na ini na ati fu wan boi.*Ma efu yu strafu en* fu leri en wan sani, dan a no o du don.
16 A sma di e bedrigi a pôtisma fu kan kon guduèn a sma di gwenti gi a guduman kadoo kon pôti te fu kba.
17 Kaka yu yesi èn arki san konisma abi fu taki,so taki yu kan teki a sabi fu mi nanga yu heri ati.
18 Bika a o gi yu prisiri te yu kibri den sani disi dipi na ini yu ati.Na so yu o man taki fu den ala ten.
19 Mi tyari sani kon na krin gi yu tide,so taki yu kan fertrow tapu Yehovah.
20 Mi ben skrifi furu sani gi yu kbafu gi yu rai èn fu tyari sani kon na krin gi yu.
21 Mi leri yu ala den sani disi èn yu kan bribi den.Dan yu kan go baka na a sma di seni yu èn gi en wan piki di tru.
22 No fufuru wan pôtisma fu di a pôtièn no pina wan mofinasma di de na a portu fu a foto,
23 bika na Yehovah o opo taki gi den na fesi krutuèn a o teki a libi fu den sma di e bedrigi den.
24 No tron mati fu wan sma di ati e bron esi.No bemui nanga wan sma di e kisi bigi atibron,
25 so taki noiti yu kon de leki enèn poti yusrefi na ini bigi problema.
26 No moksi nanga sma di e seki anu fu meki kruderinoso di e tnapu borgu gi sma di e leni moni.
27 Efu yu no abi a moni fu pai den,dan den o teki a bedi di yu musu sribi na tapu!
28 No skoifi den marki di e sori o bigi wan gron de.Na den afo fu unu ben poti den marki disi sensi ten.
29 Yu si wan man di sabi du en wroko bun?
Na fesi kownu a o tnapu.A no o tnapu na fesi sma di no prenspari.
Futuwortu
^ Hebrewtongo: „wan nen”.
^ Hebrewtongo: „feni yu bun”.
^ Hebrewtongo: „miti makandra”.
^ Noso: „a musu kisi strafu”.
^ Noso: „pkin, yonguwan”.
^ Hebrewtongo: „èn a tiki fu en atibron”.
^ Hebrewtongo: „A sma nanga wan bun ai”.
^ Noso: „sma no o tyari trawan go na fesi krutu”.
^ Hebrewtongo: „sabi”.
^ Noso: „pkin, yonguwan”.
^ Hebrewtongo: „gebroiki yu tiki”.
